1, 2. Mukunda natshi tuajiya guzuela egi Biblia idi kado yakatuka gua Nzambi?

LUHOLO lutshi wajiya gudivua, gila futa diaye waguhana kado? Wajiyilego gushipha ha gukangula kado yene. Yagusuanguluisa ha gumona egi futa diaye wana gu gutanginza. Wamuhana mersi mukunda nu kado yene.

² Biblia idi kado yatuhana Nzambi. Yana gutukuatesa ha gujiya mene jituajiyilego gujiya luholo luko. Yana gutuleza egi Nzambi wafugile dilu, mavu, yala wathomo nu mukhetu wathomo. Yana gutuhana malongo ajiya gutukuatesa gila malamba atubuila. Biblia yana gutuleza luko luholo Nzambi mbawutaganyisa laji dienji dia gubuisa mavu phaladiso. Biblia idi kado ya gusuanguluisa!

3. Milonga itshi mbawujiya gila udi mulonguga Biblia?

³ Luholo udi mulonguga Biblia, mbawumona egi Nzambi wana gutshigina egi ubue futa dienji. Gila udi mulonguga milonga yatadila Nzambi muavula, ufuta waye nu Nzambi mbawukola.

4. Milonga itshi yatadila Biblia, yana guyitugisa (kukemesa)?

⁴ Biblia yabalumuiwe gale mu mazuelelo hehi nu 2 600, Biblia yazolewe gale milio yavula. Athu avula adi nu Biblia mu mazuelelo awo. Phoso yagasue, athu gubaleka milio imoshi ana guheta Biblia! Gushiko nu mukanda uko udi luholo lumoshi nu Biblia.

5. Mukunda natshi tuajiya guzuela egi Biblia “yafundjishiwe gudi Nzambi”?

 ⁵ Biblia “yafundjishiwe gudi Nzambi.” (Tanga 2 Timote 3:16.) Uvi athu ako ajiya gudihula egi: ‘Biblia yafundjiwe (yasonegewe) gudi athu, luholo lutshi yakatuga luko gudi Nzambi?’ Biblia yahana mvutu egi: ‘Nyuma ya Nzambi yakhadile gutuameza athu azuelele ndaga jia Nzambi.’ (2 Phetelo 1:21) Idi gifua fumu wa mudimo wawambela sekretere wenji afunde (asonege) mukanda. Tuajiya guzuela egi mukanda wene wa nanyi? Wa fumu wa mudimo, ushigo wa sekretere ndo. Luholo lumoshi, Biblia mukanda wa Nzambi, ushigo wa athu a ufundjile. Nzambi waatuamezele asonege matangi enji. Biblia idi lume “mbimbi ya Nzambi.” —1 Tesalonika 2:13; tala longo 2 gu gisugishilo gia mukanda.

6, 7. Mukunda natshi tuajiya guzuela egi Biblia yanako guzuela ndaga jiagudisha?

⁶ Ivo gubalega 1 600 yabalegele gu gufundjiwa gua Biblia. Athu ayifundjile akhadile gujinga mu sungi jiagudisha. Ako mukatshi diawo alongugile muavula, uvi ako ndo. Mumoshi wakhadile munganga. Guakhadile luko adimi a mahia, alowi a shui, abambi a imeme, baprofete, manzuji, nu mafumu. Athu afundjile Biblia akhadile avula, uvi itshinyi yagasue ya Biblia ishigo yagudisha. Biblia yanago guzuela ndaga jiagudisha mu mikapho yayo. *

⁷ Mikhapho yathomo ya Biblia yana guzuelela luholo malamba a athu asendesele, mikhapho yasuga yana gukotelesa luholo Nzambi mbawusugisa malamba ene. Biblia yana guzuelela ivo inunu nu inunu ya lumene lua athu, yana gumonesa luko egi felela diagasue dia Nzambi diana gutagana.

8. Hana gifezegeselo gidi mumonesa egi Biblia yana guzuelela ndaga ya sianse nu giamatshidia giagasue.

⁸ Biblia yasonegewego ha gulongesa sianse, nga hagukalegewa mu khalasa, uvi gila yazuelela ndaga jia sianse, jiakhala jia giamatshidia. Ndaga jidi mu Biblia jiana gumonesa lume egi udi mukanda wakatuga gua Nzambi. Tufezegese: mukanda wa Levi udi nu mikhuala Nzambi wahanele enya Isalele ha gukalagala egi misongo imuangunugago. Mukanda wene wasonegewe ivo yavula gutuama dia gujiya  luholo microbe nu virus jiana gubata misongo. Biblia yana gulongesa luko egi mavu ashigo agutumbiga holu dia gima. (Yobo 26:7) Tangua athu avula akhadile mutangiza egi mavu akhala gikhalala (plat), Biblia yazuelele egi mavu adi gifua bundu.—Yeshaya 40:22.

9. Giamatshidia gia afundji a Biblia giajiya gutukuatesa ha gukotelesa itshi?

⁹ Biblia yana guzuelela mene jia athu (histoire) nu giamatshidia. Uvi mikanda ya mene jia athu yakhalako gifua Biblia, handaga afundji ayio akhadilego nu giamatshidia. Athu ene, asonegelego mahugo ako membo awo akhadilego gununga ita. Uvi afundji a Biblia afundjile nga matangua Isalele yabingilego ita. Afundjile nu ndaga jiabola akhadile gukalagala. Tufezegese: mu mukanda wa Lutango, Moise watuwambela egi wakalegele gubola, hene Nzambi amuhuile ndola. (Lutango 20:2-12) Giamatshidia ya asonegi a Biblia giana gumonesa egi Biblia yene yakatugile gudi Nzambi. Ndaga yene yakotelesa egi tuajiya gushila Biblia mutshima.

10. Mukunda natshi malongo a Biblia adi nu ndando mangino?

¹⁰ Biblia “yafundjishiwe gudi Nzambi, nu idi yatagana ha gulongesa giamatshidia, ha gutungununa gujimbila gua athu, nu ha gubela.” (2 Timote 3:16) Malongo a Biblia ana gutukuatesa mangino. Yehowa wana gutujiya muabonga, wana gujiya matangi etu nu luholo tuana gudivua. Wana gutujiya muabonga gubalega luholo tuana gudijiya esue, wana gutshigina egi tusuanguluge. Wajiya ndaga jiajiya gutukalagala gubola nga gubonga.

11, 12. (a) Malongo atshi a Yesu adi mu Matayo mukhapho wa 5 uu nu mu mukhapho wa 7? (b) Itshi tuajiya luko gulonguga mu Biblia?

¹¹ Mu Matayo mukhapho wa 5 uu nu mukhapho wa 7, tuajiya gutanga malongo a Yesu adi gumonesa luholo  lua gukhala nu gusuanguluga, lua gukhala muabonga nu athu, lua gukombelela nu lua gutadila falanga. Yesu wahanele malongo ene ivo 2 000 yabalega, uvi adi nu ngolo jia gutukuatesa mangino.

¹² Mu Biblia, Yehowa wana guhana malongo ajiya gutukuatesa ha gujiya luholo lua gukhala nu fami yagusuanguluga, lua gukhala enya midimo yabonga nu lua gukhala muabonga nu athu ako. Ukhale nanyi, ikhale fundo ditshi udi, nga mulonga utshi udi nawo, malongo a Biblia ajiya gu gukuatesa.—Tanga Yeshaya 48:17; tala longo 3 gu gisugishilo gia mukanda.

13. Yeshaya wazuelele egi mulonga utshi mbawubuila dimbo dia Babilona?

¹³ Malaji avula a Biblia ataganyile gale. Tufezegese: Yeshaya watendelele egi dimbo dia Babilona mbadishiyiwa. (Yeshaya 13:19) Wamonesele lume luholo dimbo diene mbaditambuiwa. Dimbo dia Babilona diakhadile diagubamba muabonga nu ijidigo yaleha nu muta. Uvi Yeshaya wazuelele egi muta wene mbawukondomuesewa, ijidigo mbayisala ya uhululu. Mbalagaji mbajitambula dimbo, uvi mbaashigo gulua ita. Yeshaya watendelele luko egi muthu mbawutambula Babilona jina dienji Siluse.—Tanga Yeshaya 44:27–45:2; tala longo 4 gu gisugishilo gia mukanda.

14, 15. Luholo lutshi profesi ya Yeshaya yataganyile?

¹⁴ Hafundjile Yeshaya ndaga jiene, ivo khama jiyadi yabalegele, gungima masuta amoshi adilondele ha guluisa dimbo dia Babilona. Nanyi wakhadile guatuameza? Luholo yatendelewe, fumu mumoshi wa dimbo dia Perse, jina dienji Siluse. Profesi ya Yeshaya yasendesele gutagana.

¹⁵ Phipha ya tambuiwe Babilona, enya Babilona  akhadile gukalagala fete. Akhadilego guvua woma, handaga dimbo diene diakhadile diagubamba mu ibayi (ibindji) yaleha nu muta wakoma. Uvi hanze, Siluse nu masuta enji akalegele njila ya gukondomona muta wene hagula ubululuge. Meya abululugile, hene masuta a Siluse azawugile muta wene ha malu. Luholo lutshi masuta ene abalegele ibayi yaleha ya dimbo dia Babilona?  Luholo luatendelele Yeshaya, mifulo ya dimbo dia Babilona yabembewe ya uhululu, hene masuta aluilego ita ha gungina mu dimbo diene.

16. (a) Ndaga itshi profesi ya Yeshaya yazuelele mukunda nu Babilona? (b) Luholo lutshi tuajiya egi profesi ya Yeshaya yataganyile?

¹⁶ Yeshaya wazuelele mu profesi yenji egi gungima dia ivo, gushigo nu muthu mbawujinga luko mu dimbo dia Babilona ndo. Wasonegele egi: “Nga muthu mungoshi mbagakhadigo luko muene.” (Yeshaya 13:20) Mulonga wene wataganele ba? Mangino fundo diakhadile Babilona diasala makhulu, didi 80 Km gu sud ya dimbo dia Bagdad mu gifutshi gia Irak. Mangino gushigo nu muthu wana gujinga guene. Yehowa wakombele Babilona “nu lukombo ludi gukatula gima giagasue [gushiya].”—Yeshaya 14:22, 23. *

17. Mukunda natshi tuajiya gushila malaji agasue a Nzambi mutshima?

¹⁷ Luholo profesi jiavula jia Biblia jiataganyile gale,  yamonesa egi tuajiya gushila malaji a Biblia mutshima. Tuajiya gutshigina egi Yehowa mbawutaganesa laji dienji dia gubuisa mavu phaladiso. (Tanga Lutango 23:19.) Tuajiya gukhala nu felela dia ‘lujingu lua ivo nu ivo, luatulayile Nzambi anago gumba mambo.’—Tito 1:2. *

18. Pholo wazuela egi “mbimbi ya Nzambi” yakhala luholo lutshi?

¹⁸ Tualonguga egi gushiko nu mukanda uko udi gifua Biblia. Yakhalago yagudisha, tangua yana guzuelela sianse nga mene jia athu, yana guzuela giamatshidia. Yana gutuhana malongo abonga, yakhala nu profesi jiavula jiataganyile gale. Biblia idi luko nu milonga yavula gubalega. Pholo wasonegele egi: ‘Mbimbi ya Nzambi idi nu lujingu, idi nu ngolo.’ Yakotelesa itshi?—Tanga Hebelu 4:12.

19, 20. (a) Luholo lutshi Biblia yajiya gu gukuatesa ha gudijiya muabonga? (b) Luholo lutshi wajiya gumonesa egi wana gusuanguluga nu Biblia?

¹⁹ Biblia yajiya gubalumuna lujingu luaye. Yajiya gu gukuatesa udijiye muabonga. Yajiya gu gukuatesa ujiye lume matangi aye nu luholo wana gudivua. Tufezegese: Tuajiya gutangiza egi tuana guzumba Nzambi. Uvi ha gumonesa egi tuana gumuzumba, tudi naye thomo gukalegela malongo a Biblia.

²⁰ Biblia idi lume mukanda wakatuka gua Nzambi. Nzambi wana gutshigina egi utange Biblia, uyilonguge nu uyizumbe. Suanguluga nu kado yene, khala guyilonguga. Hakiene, mbawukotelesa felela dia Nzambi mukunda nu athu. Mu mukhapo walandula, mbatulonguga milonga iko yavula mukunda nu felela diene.