1. Muhu utshi wajiya gudihula gungima dia gulonguga muabonga mukanda owu?

WALONGUGA malongo a giamatshidia a Biblia avula mu mukand’owu, gifua laji dia Nzambi mukunda nu lujingu lua ivo nu ivo, luholo muthu wana gubua gila wafua, nu felela dia gufuzumuga gua athu agufua. (Mulongeshi 9:5; Luka 23:43; Yone 5:28, 29; Yatuwuwe 21:3, 4) Yajiya gukhala wasendesele gale guya mu gudibungisa  gua Matemue a Yehowa, tangua diko wana gutshigina diago egi adi mu gikombelelo gia giamatshidia. (Yone 13:35) Yajiya gukhala luko egi wasendesele gale gukolesa ufuta waye nu Yehowa, tangua diko wazudile gale desizio dia gumukombelela. Hakiene, wajiya gudihula gamba: ‘Itshi ngudi naye gukalagala luenyelu ha gukombelela Nzambi?’

2. Mukunda natshi yala wa gu Etiopi watshiginyile gubatijiwa?

² Mu tangua dia Yesu yala mumoshi wa gifutshi gia Etiopi wahudile muhu wene. Hafuzumugile Yesu, tangua diazonda gungima, mulandudi wenji Filipho walongesele yala muene mbimbi ya Nzambi. Filipho wamukotelesele egi Yesu wakhadile Masiya. Yala muene wa gu Etiopi wasuangulugile muavula nu ndaga amulongesele, wahudile egi: ‘Meya mba enyawa! Itshi idi mungutunyisa ha gubatijiwa?’—Makalegelo 8:26-36.

3. (a) Ndaga itshi Yesu watumine alandudi enji ha gukalagala? (b) Luholo lutshi muthu adi naye gubatijiwa?

³ Biblia yana guzuela haphelo egi gila watshigina gukombelela Yehowa, udi naye gubatijiwa. Yesu walezele alandudi enji egi: “Hene ndienu, mubuise athu a ifutshi yagasue alandudi ami. Muabatize.” (Matayo 28:19) Yesu nji wahanele gifezegeselo gu ndaga yene tangua wabatijiwe. Amuvuwile muila wagasue mu meya, uvi amumbilego meya ha muto. (Matayo 3:16) Mangino nji gila muklisto wagubatijiwa, udi naye guvuwiwa muila wagasue mu meya.

4. Gubatijiwa guaye gudi naye gumonesa itshi gudi athu ako?

⁴ Gila wabatijiwa, yana gumonesa gudi athu ako egi watshigina diago gubua futa dia Nzambi nu gumukombelela. (Ngimbo 40:7, 8) Hakiene wajiya gudihula egi: ‘Itshi ngudi naye gukalagala ha gubatijiwa?’

5. (a) Hagubatijiwa, ndaga itshi udi naye gukalagala thomo? (b) Mukunda natshi guya mu gudibungisa gudi nu ndando?

⁵ Gutuama dia gubatijiwa, udi naye gujiya Yehowa nu Yesu. Wasendesele gale guajiya tangua wana gulonguga Biblia. (Tanga Yone 17:3.) Uvi yasugilego. Biblia yazuela egi udi naye gukhala ya “guzalesewa pha nu ujiyi” wa gutshigina gua Yehowa. (Kolosai 1:9) Guya mu gudibungisa gua Matemue a Yehowa guajiya gu gukuatesa ha gukhala nu ufuta wakola nu Yehowa. Ndaga yene yamonegesa egi guya mu gudibungisa guene tangua diagasue gudi nu ndando yavula.—Hebelu 10:24, 25.

6. Ndaga jia Biblia guvula gutshi udi naye gujiya gutuama dia gubatijiwa?

⁶ Yehowa anago gutoga egi ujiye ndaga jiagasue jidi mu Biblia gutuama dia gubatijiwa. Hagula yala wa gifutshi gia Etiopi abatijiwe, Yehowa amutogelego egi ajiye thomo ndaga jiagasue. (Makalegelo 8:30, 31) Esue nji tudi naye gujiya egi gulonguga ndaga jia Yehowa gushigo nu suga. (Mulongeshi 3:11) Uvi ha gubatijiwa, udi naye gujiya nu gutshigina malongo a gishina a Biblia.—Hebelu 5:12.

7. Gulonguga guaye gua Biblia guagukuatesele ha gukalagala itshi?

⁷ Biblia yazuela egi: “Muthu udi gashigo nu gutshigina gajiyilego gulola gusuanguluisa Nzambi.” (Hebelu 11:6) Hakiene, hagubatijiwa udi naye thomo gukhala nu gutshigina. Biblia yatuwambela egi mu tangua dikulu, enya dimbo dia Kolinto ako ategelele ndaga alandudi a Yesu akhadile gulongesa, gungima dienji, “atshiginyile Fumu, abatijiwe.” (Makalegelo 18:8) Luholo lumoshi nji, gulonguga guaye gua Biblia guagukuatesele ha gukhala nu gutshigina mu malaji a Nzambi, nu mu gibawu gia Yesu, handaga giajiya gutuhuluisa gu masumu nu gu gufua.—Yoshua 23:14; Makalegelo 4:12; 2 Timote 3:16, 17.

8. Itshi yajiya gu gutuma ha guwambela athu ako ndaga wa longugile?

⁸ Luholo wana gulonguga ndaga jiavula jia Biblia, nu luholo wana gumona egi ndaga jiene jiana gugukuatesa mu lujingu luaye, gutshigina guaye mbagukola. Mbawutshigina guwambela athu ako ndaga wana gulonguga. (Yelemiya 20:9; 2 Kolinto 4:13) Uvi akhuatshi udi naye guwambela ndaga jiene?

9, 10. (a) Athu atshi wajiya gusendesa guwambela ndaga walongugile? (b) Gila watshigina gulongesa lukuma luabonga hamoshi nu hungu itshi udi naye gukalagala?

⁹ Ndaga jiene walongugile wajiya gujiwambela enya fami yaye, mafuta aye, akuenu, nga athu wana gukalagala nawo mudimo. Idi ndaga yabonga, uvi tangua diagasue ikalagale nu gusuanguluga nu guzumba guagasue. Gukalagala luholo luene guajiya gugukuatesa ha gusendesa gulongesa lukuma luabonga nu hungu. Gula wamona egi udi hehi ha guyikalagala, wajiya guwambela muthu wana gugulongesa Biblia egi aye udi nu funu ya guya mu mudimo wa gulongesa nu hungu. Gila muthu muene wana gugulongesa Biblia wamona egi wajiya gulongesa nu hungu, luko, gila khadilo diaye diadivua nu mikhuala ya Biblia, muajiya gutadila mulonga wene hamoshi nu muthu wana gugulongesa Biblia nu akulu mbadi a hungu.

¹⁰ Ndaga jitshi mbamutadila nu akulu ene? Akulu ene mbaatala gila wana gukotelesa malongo a gishina a Biblia, gila wana guatshigina nji. Mbaatala luko gila mu lujingu luaye wana gukalegela ndaga Biblia yana gulongesa, gila wana gutshigina diago gubua temue wa Yehowa. Ujimbilago egi akulu ana gubamba athu agasue a mu hungu, aye nji udi mukatshi dia athu ene, hakiene uvigo woma ha gusolula nawo. (Makalegelo 20:28; 1 Phetelo 5:2, 3) Gungima dia gusolula guene, akulu ene mbaaguwambela  gila wajiya gusendesa gulongesa lukuma luabonga nu hungu.

11. Mukunda natshi gubalumuna milonga iko ya mu lujingu luaye gudi nu ndando yavula ha gusendesa gulongesa lukuma luabonga hamoshi nu hungu?

¹¹ Akulu ene ajiya guguwambela egi ha gulongesa lukuma luabonga hamoshi nu hungu udi naye thomo gubalumuna milonga iko ya mu lujingu luaye. Mukunda natshi gubalumuna milonga iko ya mu lujingu luaye idi nu ndando yavula? Handaga tangua tuana gulongesa athu ako mbimbi ya Nzambi, tuana guzuela ha fundo dia Yehowa, hakiene, tudi naye gukhala nu khadilo didi gumunemesa.—1 Kolinto 6:9, 10; Galatiya 5:19-21.

12. Mukunda natshi athu agasue adi naye gubalumuna mitshima?

¹² Ha gula egi ubatijiwe, gudi nu ndaga iko udi naye gukalagala. Mupostolo Phetelo wazuelele egi: “Balumunyenu mitshima yenu, vutugienu gudi Nzambi ha gubola guenu gutotesewe.” (Makalegelo 3:19) Gubalumuna mutshima guakotelesa itshi? Guakotelesa guvua gikenene giavula gundaga jiagasue jiabola tuakalegele. Gila wakhadile gukalagala uthambi, udi naye gubalumuna mutshima. Yajiya gukhala egi mu lujingu luaye, wana gukalagala ngolo ha gutshita ndaga jiabonga, ata ngenyi udi naye kaka gubalumuna mutshima, handaga athu agasue ana gukalagala masumu. Hakiene tudi naye gutoga egi Nzambi atutotesele.—Lomo 3:23; 5:12.

13. Mbimbi “guvutuga” yakotelesa itshi?

¹³ Ya suga phamba ha guvua gikenene mukunda nu ndaga yabola wakalegele ba? Ndo. Phetelo wazuelele egi aye nji udi naye “guvutuga.” Ndaga yene yakotelesa egi udi naye gubemba khadilo diagasue diabola ha gusendesa gukalagala ndaga jiabonga. Tangiza, gifua udi muya  gu dimbo dimoshi, uvi khenji wahetele gale gu dimbo diene ndo. Gungima dia guwenda tangua diazonda, wakotelesa egi njila udi guya ishiko ya dimbo diene. Itshi wajiya gukalagala? Gushigo giphapha egi udi naye ya gumagana, gungima guvutuga, ha guya mu njila yabonga. Luholo lumoshi, tangua udi mulonguga Biblia, wajiya gumona egi mu lujingu luaye gudi nu ndaga jiko nga makalegelo ako udi naye gubalumuna. Zula desizio dia “guvutuga”—yakotelesa egi, gubalumuna khadilo diaye nga ndaga jiko jia mu lujingu luaye—gungima, sendesa gukalagala ndaga jiabonga.

14. Luholo lutshi wajiya gudihana gudi Nzambi?

¹⁴ Ndaga iko ya ndando ya gukalagala gutuama dia gubatijiwa idi gudihana gudi Yehowa. Ha gudihana gudi Yehowa udi naye gukalagala gisambu ha guhana Nzambi laji egi mbawumukombelela phamba muene, mbawusha luko gutshigina guenji ha fundo diathomo mu lujingu luaye.—Mikhuala 6:15.

15, 16. Itshi yana gutuma muthu ha gudihana gudi Nzambi?

¹⁵ Guhana Yehowa laji dia gumukombelela phamba muene, gudi gifua guhana lujingu luaye luagasue gua muthu wana guzumba. Tangiza ndaga yana gubalega gila yala umutshigina guzula mukhetu mu ulo. Yala muene wana gujiya thomo makalegelo a mukhetu muene, makalegelo ene ana gumutuma ha gumuzumba, gungima dienji, wana gumuzula diago mu ulo. Didi desizio dimoshi dia ndando, uvi yala wana gutshigina guzula ginemo giene handaga wana guzumba mukhetu muene.

¹⁶ Luholo wana gulonguga ndaga jiatadila Yehowa, jiene jidi gugutuma ha gumuzumba nu ha gukalagala yagasue ha gumukombelela. Ndaga jiene mbajigutuma ha gumulaya mu gisambu egi mbawumukombelela. Biblia yazuela  egi muthu wagasue watshigina gulandula Yesu udi naye ‘gudibuita mutshima.’ (Mako 8:34) Gudibuita mutshima guakotelesa itshi? Guakotelesa egi gutumagela Yehowa gudi naye gukhala ha fundo dia thomo mu lujingu luaye. Ndaga Yehowa ana gutshigina idi nu ndando yavula gubalega nzala jiaye nu matangi aye.—Tanga 1 Phetelo 4:2.

17. Mukunda natshi athu ako anagutuna gudihana gudi Yehowa?

¹⁷ Athu ako anako gutshigina gudihana gudi Yehowa handaga ana guvua woma egi mbaatagenesago laji diawo dia gumukombelela. Anako gutshigina egi Yehowa avue sonyi, ajiya gutangiza egi gila adihanelego gudi Yehowa, muene mbaashigo guahana fote gu ndaga ana gukalagala.

18. Itshi yajiya gu gukuatesa ha gukatula woma waguhana Yehowa sonyi?

¹⁸ Guzumba guaye gudi Yehowa guajiya gugukuatesa ha gukatula woma wa gumuhana sonyi. Luholo wana gumuzumba, mbawutshita ngolo ha gutagenesa laji diaye. (Mulongeshi 5:4; Kolosai 1:10) Mbawushigo gutangiza egi gukalagala gutshigina gua Yehowa gudi mulonga wakola gubalega. Mupostolo Yone wasonegele egi: “Ndaga ya guzumba gua Nzambi gudi ha gubamba mikhuala yenji. Mikhuala yenji ishigo mutukolela.”—1 Yone 5:3.

19. Mukunda natshi ushigo naye ndo guvua woma ha gudihana gudi Yehowa?

¹⁹ Gudihana gudi Yehowa gushigo gutoga egi ukhale yagutagana. Yehowa anako gututoga ndaga jiabalega gukola. (Ngimbo 103:14) Yehowa mbawugukuatesa ha gukalagala ndaga jiabonga. (Yeshaya 41:10) Zegemena gudi Yehowa nu mutshima waye wagasue, “muene mbawugudijiga njila yabonga.”—Ishima 3:5, 6.

20. Gungima dia gudihana guaye gudi Yehowa, ndaga itshi wajiya giwa gukalagala?

²⁰ Watangiza egi udi hehi ha gudihana gudi Yehowa ba? Gudihana guaye gudi Yehowa, guajiya gugukuatesa ha gukalagala ndaga iko. Wajiya giwa gubatijiwa.

21, 22. Luholo lutshi wajiya “gulondolola gutshigina guaye” gutuama di’athu?

²¹ Wambela mutuameji wa hunji dia akulu wa mu hungu dienu egi aye wadihanyi gale gudi Yehowa, luenyelu umutshigina egi ubatijiwe. Gila wamuwambela, muene  mbawutomba akulu ha gutadila gila udi mujiya malongo a gishina a Biblia. Gila akulu ene amona egi aye udi mujiya malongo ene a gishina, mbaaguwambela egi wajiya gubatijiwa tangua dia gudibungisa guakoma gua Matemue a Yehowa. Tangua dia gudibungisa guene, diskur dimoshi mbadihanewa ha gukotelesa gishina gia gubatijiwa. Muthu mbawukalagala diskur diene mbawuhula mihu iyadi yaleba gudi athu adi gutshigina gubatijiwa. Guhana mvutu gu mihu yene guamonesa egi: ‘walondolola gutshigina guaye’ gutuama di’athu.—Lomo 10:10.

 ²² Gungima dienji mbawubatijiwa. Muila waye wagasue mbawuvuwiwa mu meya. Gubatijiwa guaye mbagumomesa athu agasue egi wadihanyi gudi Yehowa, wabua giwa temue wa Yehowa.

23. Gubatijiwa ‘mu jina dia Tata nu dia Mona nu dia nyuma yabonga’ guakotelesa itshi?

²³ Yesu wazuelele egi alandudi enji adi naye gubatijiwa ‘mu jina dia Tata nu dia Mona nu dia nyuma yabonga.’ (Tanga Matayo 28:19.) Ndaga yene yakotelesa itshi? Ya kotelesa egi watshigina egi Yehowa udi nu ufumu holu diaye, watshigina luko mudimo wa Yesu mu ulondegi wa Nzambi nu luholo Nzambi wana gukadigila nyuma yenji ha gutagenesa felela dienji.—Ngimbo 83:18; Matayo 28:18; Galatiya 5:22, 23; 2 Phetelo 1:21.

24, 25. (a) Batisimo yakotelesa itshi? (b) Mulonga utshi mbatuzuelela mu mukhapho wa gusugisa?

²⁴ Gubatijiwa guana gumonesa mulonga umoshi wandando yavula. Gila wa vuwiwa mu meya, yakotelesa egi aye wafua nga wabemba khadilo diaye dikulu (dia kinono). Gila wazoga mu meya, wasendesa lujingu luheluhe ha gukalagala gutshigina gua Nzambi. Ndaga yene yamonesa egi wasendesa gukalegela Yehowa. Ujimbilago egi wadihanelego gudi muthu, nga gu ulondegi umoshi, nga gu mudimo umoshi. Wahanyi lujingu luaye gudi Yehowa.

²⁵ Gudihana guaye mbagugukuatesa hagukolesa ufuta waye nu Nzambi. (Ngimbo 25:14) Ndaga yene yakoteleselego egi muthu mbawuhuluishiwa phamba mukunda nu batisimo. Mupostolo Pholo wasonegele egi: “Tshitshienu mudimo nu woma nu gudigita ha ndaga ya guhuluga gua mionyo yenu.” (Filiphi 2:12) Gubatijiwa gudi gisendeselo. Uvi luholo lutshi wajiya gukhala tangua diagasue hehi nu Yehowa? Mukhapho wagusugisa wa mukanda owu mbawuhana mvutu gu muhu wene.