1, 2. (a) Itshi yajiya gukalagala egi usuanguluge muavula nu kado imoshi ya guhanewa? (b) Mukunda natshi gibawu gidi nu ndando yavula gubalega ima yagasue yatuhanele Nzambi?

KADO itshi yabonga yaguhuiwe gale? Kado ishiko naye guta phamba falanga jiavula ha gugusuanguluisa. Gila kado yagusuanguluisa nga yatagenesa nzala yaye, yana gugutuma uhane mersi gudi muthu waguhanyi nayo.

² Mukatshi dia bakado agasue Nzambi watuhanele, gudi kado imoshi tudi nayo funu gubalega. Gibawu gidi nu ndando yavula gubalega ima yagasue Nzambi wahanele athu. Mu mukhapho ou mbatumona egi Yehowa watumine Mun’enji, Yesu Klisto, hagula tuhete lujingu lua ivo nu ivo. (Tanga Matayo 20:28.) Yehowa wamonesele lume egi wana gutuzumba luholo atumine Yesu ha mavu mukunda nu esue.

3. Mukunda natshi athu ana gufua?

³ Yehowa wahanele gibawu ha gukatula athu mu masumu nu gufua. (Efeso 1:7) Ha gukotelesa mukunda natshi gibawu giakhadile naye gufutshiwa, tudi naye gujiya ndaga yabuile mu gilanga gia Edene ivo yavula yabalega. Mvuaji jietu jia thomo, Adama nu Eva, jiasumugile hene jiafile. Esue nji tuana gufua handaga tuavualewe nu masumu a Adama nu Eva.—Tala longo 9 gu gisugishilo gia mukanda.

4. Adama wakhadile nanyi, enji wakhadile nu gima gitshi?

 ⁴ Hafugile Yehowa yala wathomo, Adama, wamuhanele gima gimoshi gia ndando. Wahanele Adama lujingu lua gutagana. Adama wakhadile nu matangi nu muila watagana. Ajiyileko gukata, gukola nga gufua. Luholo Yehowa wafugile Adama, wakhadile gifua tata wa Adama. (Luka 3:38) Yehowa wakhadile guzuela nu Adama tangua diagasue. Nzambi wamulezele mikhuala yenji haphelo, wamuhanele nji mudimo wabonga wagukalagala.—Gisendeselo 1:28-30; 2:16, 17.

5. Kotelesa mbimbi’eji: Adama wakalegewe “mu gifuanesa gia Nzambi”?

⁵ Adama wafugiwe “mu gifuanesa gia Nzambi.” (Gisendeselo 1:27) Yehowa wamuhanele makalegelo gifua enji, gula guzumba, ndunge, giamatshidia, nu ngolo. Wahanele Adama njila ya gudizudila badesizio. Adama gakhadilego robo. Nzambi wamufugile ha gula atombe hakhenji gukalagala ndaga jiabonga nga jiabola. Nga Adama atombe gutumagela Nzambi, nga wana gujinga mu phaladiso ivo nu ivo.

6. Tangua Adama atunyine gutumagela Nzambi, itshi atotesele? Luholo lutshi yatutadila esue nji?

⁶ Hatunyile Adama gutumagela Nzambi, nu hatewe muene mukumbu wa gufua, Adama watotesele gima giandando yavula. Watotesele ufuta wenji nu Yehowa, nu lujingu luatagana. (Gisendeselo 3:17-19) Adama nu Eva atombele gulumbugila Nzambi, hakiene, guakhadilego nu felela gudi ene. Ndaga yakalegele Adama yanginyishile ‘Disumu ha mavu, disumu diananele gufua, ngenyi gufua guakuatele athu agasue, handaga athu agasue atshitshile disumu.’ (Lomo 5:12) Hasumugile Adama, ‘wadidigile’, watudigile nji mu uhiga wa disumu nu gufua. (Lomo 7:14) Gudi luko felela mukunda nu esue ba? Ai, gudi felela.

7, 8. Gibawu gidi itshi?

 ⁷ Gibawu gidi itshi? Gibawu giakotelesa ima mbadi. Yathomo, gibawu gidi ndando yafutshiwa ha gukula muthu nga gima. Yangiadi, gibawu gidi ndando ana guhana ha gufuta gima gimoshi.

⁸ Gushigo ndo nu muthu wajiyile gufuta ndando ya gubola guakoma Adama wakalegele tangua wasumugile nu watubatele gufua. Uvi Yehowa watukatudile mu uhiga wa masumu nu gufua. Tutale mudimo gibawu giene giana gukalagala nu luholo tuajiya gugihetela gubonga.

9. Luholo lutshi gibawu giakhadile naye gufutshiwa?

⁹ Gushiko nu muthu wajiyile guhana gibawu gia lujingu luatagana luatotesele Adama. Mukunda natshi? Handaga mukut’etu agasue tushigo athu agutagana. (Ngimbo 49:8, 9) Gibawu giakhadile naye gukhala lujingu lua muthu muko wagutagana. Biblia yazuela egi Yesu “wadihanene” handaga wakhadile nu lujingu luatagana luholo lumoshi nu lujingu luatotesele Adama.—1 Timote 2:6.

10. Luholo lutshi Yehowa wahanele gibawu?

¹⁰ Luholo lutshi Yehowa wahanele gibawu? Yehowa watumine Mun’enji wabalega ndando ha mavu. Mona muene, Yesu, wakhadile gifugiwi gienji gia thomo. (1 Yone 4:9, 10) Yesu wasuangulugile ha gubemba fundo diakhalele muene mu dilu nu Sh’enji. (Filiphi 2:7) Yehowa wakatudile lujingu lua Yesu mu dilu uu nu ha mavu, wavualewe muthu wa gutagana, akhadilego nu masumu.—Luka 1:35.

11. Luholo lutshi muthu mumoshi wajiyile gukhala gibawu mukunda nu athu agasue?

¹¹ Hatunyile gutumagela Nzambi, Adama, yala wa thomo watotesele lujingu luatagana mukunda nu  athu agasue. Guakhadile nu muthu muko wajiyile gukatula gufua gua an’a Adama agasue ba? Ai. (Tanga Lomo 5:19.) Yesu, akhadileko nu masumu, wahanele lujingu luenji luatagana gifua gibawu. (1 Kolinto 15:45) Lujingu luenji luatagana luakhadile nu ngolo jia gukatula gufua gua an’a Adama agasue.—1 Kolinto 15:21, 22.

12. Mukunda natshi Yesu wakhadile naye gumona malamba akola?

¹² Biblia yamonesa luholo Yesu wamonele lamba gutuama dia gufua. Amubetele mangololo, amukhokhele misumadi ha mutshi wa lamba, wakhadile naye gukenga, nu gufua, gufua gumoshi gua lamba. (Yone 19:1, 16-18, 30) Mukunda natshi Yesu wakhadile naye gukenga luholo luene? Handaga Satana wazuelele egi gushiko nu muthu nga mumoshi mbawukhala nu gutshigina gua Nzambi gila udi mukatshi dia malamba. Yesu wamonesele egi muthu wa gutagana wajiya gukhala nu gutshigina gua Nzambi nga mu tangua dia malamba abalega gukola. Tangiza luholo Yehowa wasuangulugile mukunda nu Yesu!—Ishima 27:11; tala longo 15 gu gisugishilo gia mukanda.

13. Luholo lutshi gibawu giafutshiwe?

¹³ Luholo lutshi gibawu giafutshiwe? Yesu wahanele Sh’enji ndando ya lujingu luenji. Mu lusugu lua 14 lua mbeji ya Nisana ya givo 33 mu kalandriye ga Bayuda, Yehowa wabembele egi mbalagaji jia Yesu jimushiye. (Hebelu 10:10) Masugu thathu gungima, Yehowa wafuzumuishile Yesu, ishiko gifua muthu uvi gifua nyuma. Gungima, tangua wavutugile gudi Sh’enji mu dilu, wahanele Yehowa ndando ya lujingu luenji luatagana gifua gibawu. (Hebelu 9:24) Luholo gibawu giafutshiwa, tuaheta luholo lua guzoga mu uhiga wa masumu nu wa gufua.—Tanga Lomo 3:23, 24.

14, 15. Itshi tudi naye gukalagala hagula masumu etu atotesewe?

¹⁴ Kado yabalega gukoma Nzambi watuhanele, yana gutubatela gubonga guavula. Tuzuelele luholo yajiya gutubatela gubonga guene mangino nu mu masugu adi muza.

¹⁵ Masumu etu atotesewa. Yakhala yakola ha gukalagala ndaga jiabonga tangua diagasue. Tuana gujimbila, matangua ako tuana guzuela nga gukalagala milonga yabola. (Kolosai 1:13, 14) Luholo lutshi tuajiya gutoteselewa? Tudi naye guvua gikenene gia gubola guetu, nu gutoga luko Yehowa nu gudibulumuisa egi atutotesele. Hakiene, tuajiya gusha mutshima egi masumu etu atotesewa.—1 Yone 1:8, 9.

16. Itshi tuajiya gukalagala ha gukhala nu mitshima ya guhuima?

¹⁶ Tuajiya gukhala nu mutshima wa guhuima. Gila mutshima watuwambela egi tuakalagala gima giabola, tuana gudivua gifua tuamona milonga, tangua diko tuajiya gudivua gifua tushigo nu ndando nga nu felela. Uvi tulebigo muila. Gila tuatoga Yehowa atutotesele, tuajiya gusha mutshima egi mbawutuvua nu mbawututotelesela. (Hebelu 9:13, 14) Yehowa watshigina egi tumuwambele ndaga jietu jiagasue nu guleba guetu. (Hebelu 4:14-16) Gusuga, tuajiya guheta guhuima mu ufuta wetu nu Nzambi.

17. Gufua gua Yesu guajiya gutubatela gubonga gutshi?

¹⁷ Tudi nu felela dia lujingu lua ivo nu ivo. ‘Gishimbigo gia gubola gidi gufua, uvi guhana gua khenda gua Nzambi gudi lujingu lua ivo nu ivo mu Klisto Yesu Fumi’etu.’ (Lomo 6:23) Tuajiya gujinga ivo nu ivo nu muila wa gutagana handaga yesu wafile mukunda nu esue. (Yatuwuwe 21:3, 4) Gima gitshi tuajiya gukalagala ha guheta gubonga guene?

18. Luholo lutshi tuajiya egi Yehowa wana gutuzumba?

¹⁸ Tangiza luholo wana gudivua gila muthu waguhana kado imoshi yabonga. Gibawu gidi kado yabalega bakado agasue; tudi naye guhana Yehowa mersi mukunda nu kado yene. Yone 3:16 yatuwambela egi “Nzambi wabalegele guzumba a ha mavu, muene waahuile Mun’enji mumoshi ha mumoshi.” Ai, Yehowa wana lume gutuzumba muavula hene ahanele Mun’enji, Yesu. Tuajiya luko egi Yesu wana gutuzumba, handaga watshiginyile gufua mukunda nu esue. (Yone 15:13) Gibawu gidi naye gugutshiginyisa egi Yehowa nu Yesu ana guguzumba.—Galatiya 2:20.

19, 20. (a) Luholo lutshi wajiya gubua futa dia Yehowa? (b) Luholo lutshi wajiya gumonesa egi wana gutshigina mulambu wa gibawu giahanele Yesu?

¹⁹ Hawalonguga guzumba gua Nzambi, luholo lutshi wajiya gubua futa dienji? Guzumba muthu khenji ujiya, ishigo ndaga yaleba. Yone 17:3 yazuela egi tuajiya gujiya Yehowa. Gila wajiya Yehowa, guzumba guaye gudi muene mbagukola, mbawumusuanguluisa, nu mbawubua futa dienji. Hakiene, landula gulonguga milonga yatadila Yehowa mu njila ya Biblia.—1 Yone 5:3.

²⁰ Tshigina mulambu wa gibawu wahanele Yesu. Biblia yazuela egi “watshigina mona udi nu lujingu lua ivo nu ivo.” (Yone 3:36) Gutshigina mona guakotelesa itshi? Guakotelesa gutshita ndaga Yesu watulongesele ha gutshita. (Yone 13:15) Tuajiyilego phamba guzuela egi tuana gutshigina Yesu. Ha gutshigina gibawu, tudi naye gutshita ndaga jiko jiatadila gutshigina guetu. Yakoba 2:26, yazuela egi: ‘Gutshigina gushigo nu midimo gudi gua gufua.’

21, 22. (a) Mukunda natshi tudi naye guwunguluga gufua gua Yesu ivo yagasue? (b) Itshi mbatuzuelela mu Mukhapho 6 nu 7?

 ²¹ Dibungise Tangua dia guwunguluga (Kuyabuluka) gufua gua Klisto. Ngueze ya suga ya Yesu ha mavu, watulongesele egi tudi naye guwunguluga gufua guenji. Tuana guyikalagala ivo yagasue, yana gutamegewa egi Guwunguluga nga “Mesa a Fumu.” (1 Kolinto 11:20; Matayo 26:26-28) Yesu watshigina egi tuwunguluge egi wahanele lujingu luenji luatagana gifua gibawu mukunda nu esue. Wazuelele egi “tshitshienu ngenyi ha gunguwunguluga ame.” (Tanga Luka 22:19.) Tangua wana gudibungisa ha Guwunguluga gufua gua Yesu, wana gumonesa egi wana gutangiza gibawu nu guzumba guakola Yehowa nu Yesu atumonesele.—Tala longo 16 gu gisugishilo gia mukanda.

²² Gibawu gidi nu ndando yavula gubalega ima yagasue Nzambi wahanele athu. (2 Kolinto 9:14, 15) Nu millio jia athu jiafile gale ajiya guheta gubonga gua kado yene ya ndando. Mu Mukhapho wa 6 nu wa 7 mbatuzuelela luholo ndaga yene yajiya gukalegewa.