1, 2. Mukunda natshi wana gutadila gisambu gifua kado ya ndando? Mukunda natshi tudi naye gujiya ndaga yana gulongesa Biblia mukunda nu gisambu?

GILA WAFUANESA mavu nu ima iko yafugile Yehowa, mavu akhala azonda. Gila Yehowa watala mavu, athu agasue a ha mavu akhala gifua noso dia meya moshi’a gantinyi. (Ngimbo 115:15; Yeshaya 40:15) Gila wafuanesa athu nu ima iko yafugile Yehowa, ima yene yatubalega gukoma. Uvi, mukanda wa Ngimbo 145:18, 19 wazuela egi: ‘Yehowa wanakhala hehi gudi athu adi gumutamega nu mitshima yabonga. Athu agasue ana gumunemesa, muene wana guahua ima idi ene n’ayo funu, handaga wanavua gudila guawo, wana guahuluisa.’ Tudi lume nu luendu luabonga! handaga, Yehowa Mufugi wa ngolo jiagasue, wana gusuanguluga ha gutegelela gukombelela guetu. Yadiago, gisambu gidi lume luendu luabonga, gidi gifua kado ya ndando Yehowa wahanele gudi muthu wagasue.

² Uvi Yehowa mbawututegelela phamba gila tudi gumukombelela mu luholo luana gutshigina muene. Luholo lutshi tuajiya guyikalagala? Tutale ndaga yana guzuela Biblia mukunda nu gisambu.

3. Mukunda natshi udi naye gukombelela Yehowa?

³ Yehowa wana gutshigina muzuele n’enji mu njila ya gisambu. Itshi yatutshiginyisa ndaga yene? Tanga gale Filiphi 4:6, 7. Tangiza ndaga verse yene yazuela. Mufugi wa mavu agasue wana gugutangiza, wana gutshigina umuwambele milonga yaye, nu luholo wana gudivua.

4. Luholo lutshi gusamba Yehowa tangua diagasue guajiya gukolesa ufuta wetu nenji.

 ⁴ Gisambu giana gutukuatesa ha gubua mafuta a Yehowa. Gula tangua diagasue mafuta adi gudiwambela matangi awo, nu milonga yawo iko, ufuta wawo wana gukola. Idi nji luholo lumoshi nu Yehowa. Muene wana gukalegela Biblia ha gutuwambela matangi enji nu luholo luana gudivua muene, wana gutuwambela nji ndaga mbaatukalegela masugu adi muza. Wajiya gumuwambela ndaga udi najio mu mutshima, mu njila ya gisambu. Hawudi gukalagala ngenyi, ufuta waye nu Yehowa mbawukola muavula.—Yakoba 4:8.

5. Itshi idi gutumonesa egi Yehowa anategelelago isambu yagasue?

⁵ Yehowa wana gutegelela gisambu giagasue ba? Ndo. Hakhadile profete Yeshaya ha mavu, Yehowa wawambelele enya Isalele egi: “Hamudi musununa mago enu mu gukombelela, ngushigo mutala guene. Nga muavudisa tshima gukombelela, mbangutegelelago, ndaga ya mago enu adi azala pha nu mahatshi.” (Yeshaya 1:15) Ndaga yene  yamonesa egi, gula tushigo gutema, tuajiya gukalagala ndanga jiko jiajiya gutukhaphumuna nu Yehowa, ha gula atune gututegelela isambu yetu.

6. Mukunda natshi gutshigina gudi nu ndando yavula? Luholo lutshi tuajiya gumonesa egi tudi nu gutshigina?

⁶ Gila tuatshigina egi Yehowa ategelele gukombelela guetu, tudi naye gukhala nu gutshigina gudi muene. (Mako 11:24) Mupostolo Pholo wasonegele egi: “Muthu udi gashigo nu gutshigina gajiyilego gulola gusuanguluisa Nzambi. Muthu udi musetuga hehi nu Nzambi udi n’ayo ya gutshigina egi, Nzambi yowu. Muene udi mushimbiga adi mumukamba.” (Hebelu 11:6) Uvi, gutshigina guana monesewago phamba mu guzuela. Tudi naye gutumagela Yehowa masugu agasue, ha gumonesa egi tudi nu gutshigina.—Tanga Yakoba 2:26.

7. (a) Hatudi gukalagala gisambu, mukunda natshi tudi naye gunemesa Yehowa nu gudibulumuisa guagasue? (b) Luholo lutshi tuajiya gumonesa matshidia tangua dia gukalagala gisambu?

⁷ Tudi naye gukhala nu gudibulumuisa nu gunemesa Yehowa tangua tudi gumukombelela. Mukunda natshi? Gila tudi nu laji dia guta maga nu fumu mumoshi nga prezida, tudi naye guyikalagala nu gunemesa guagasue. Yehowa udi Nzambi wa Ngolo jiagasue, hakiene, tuajiyileko gumunemesa nu gudibulumuisa tangua tudi gusolula n’enji ba? (Gisendeselo 17:1; Ngimbo 138:6) Tangua tudi mukombelela, tudi naye gukhala nu giamatshidia. Tudi naye nji gumuwambela ndaga tudi nayo mu mutshima, uvi tushigo naye guvutugila khuta mbimbi jimoshi mahugo avula.—Matayo 6:7, 8.

8. Gila tuakombelela Yehowa mukunda nu mulonga umoshi, itshi luko tudi naye gukalagala?

⁸ Gila tudi gukalagala gisambu mukunda nu ndaga imoshi, tudi naye gukalagala ngolo ha gutaganyisa mbimbi jietu. Tufezegese, gila tuakombelela Yehowa egi atukuatese ha guheta ima yagudia, gila tudi nu ngolo jiagukalagala mudino tushigo naye gushia umonya ha gutangiza egi Yehowa mbawutuhana ima yagasue, ata tudi nu ngolo jiagukalagala mudimo. Tudi naye gukalagala ngolo ha guheta mudimo wagasue tuajiya gukalagala.  (Matayo 6:11; 2 Tesalonike 3:10) Luko, gila tuatoga Yehowa egi atukuatese ha gubemba mulonga umoshi wabola, tudi naye gulenga ndaga jiagasue jiajiya gutubata ha gukalagala mulonga wene. (Kolosai 3:5) Tuzuelele mihu iko idi gutadila gisambu.

9. Nanyi tudi naye gukombelela? Mukanda wa Yone 14:6 watulongesa itshi mukunda nu gisambu?

⁹ Nanyi tudi naye gukombelela? Yesu walongesele alandudi enji akombelele egi “Tata udi mu dilu.” (Matayo 6:9) Wazuelele luko egi: ‘Ame ngudi njila, ngudi giamatshidia nu ngudi lujingu. Gushigo muthu udi muheta gudi Tata gula gabalegelego gudi ame.’ (Yone 14:6) Hakiene, tudi naye gukombelela phamba Yehowa mu jina dia Yesu. Gukombelela mu jina dia Yesu guakotelesa itshi? Ha gula egi Yehowa atshigine isambu yetu, tudi naye gunemesa mudimo wandando, muene ahanele gua Yesu. Tualongugile gale egi Yesu wajile ha mavu ha gutukatula mu uhiga wa masumu nu wa gufua. (Yone 3:16; Lomo 5:12) Yehowa watombele gale Yesu ha gukhala Muzueledi Wakoma nu Nzuji.—Yone 5:22; Hebelu 6:20.

10. Ha gukalagala gisambu, tudi naye gutomba pozisio imoshi ba? Kotelesa.

¹⁰ Ha gukalagala gisambu, tudi naye gutomba pozisio imoshi ba? Ndo, Yehowa anago gututoga egi tushiwuge ha mabongo, tukhale hashi, nga egi tukhale ya gumagana tangua dia gukombelela. Biblia yana gutulongesa egi tuajiya guzuela nu Yehowa mu pozisio yagasue yajiya gumunemesa. (1 Gudilanduluila 17:16; Nehemiya 8:6; Danyele 6:10; Mako 11:25) Tangua dia gukombelela, ndaga idi nu ndando yavula gudi Yehowa, ishigo pozisio ndo, uvi gukhala nu matangi nu makalegelo abonga. Tuajiya gukombelela mu dizui diakola, nga diazonda; tuajiya gukombelela mu fundo diagasue, mu muanya nga mu phipha. Tangua  tudi mukombelela Yehowa, tuajiya gusha mutshima egi udi gututegelela, ikohale gila muthu muko gashigo gututegelela.—Nehemiya 2:1-6.

11. Gima tshi tuajiya gutoga Yehowa mu gisambu?

¹¹ Gima gitshi tuajiya gutoga mu gisambu gietu? Tuajiya gutoga gima giagasue gidi Yehowa mutshigina. Biblia yazuela egi: “gula tudi mumulomba nga gima’tshi gifua mudi gutshigina guenji, muene udi mutuvuila.” (1 Yone 5:14) Tuajiya gukombelela mukunda nu ndaga jietu ba? Ai. Gukombelela Yehowa gudi naye gukhala gifua guta maga nu futa dietu wamutshima. Tuajiya guwambela Yehowa gima giagasue tudi nagio mu mutshima nga mu matangi. (Ngimbo 62:8) Tuajiya gumutoga atuhane nyuma yenji ha gula itukuatese ha gukalagala ndaga jiabonga. (Luka 11:13) Tuajiya nji gutoga Yehowa atuhane gutema ha guzula badesizio abonga, nga gumutoga ngolo jia gulua nu malamba. (Yakoba 1:5) Tudi naye gutoga Yehowa egi atutotesele gubola guetu. (Efeso 1:3, 7) Tudi naye luko gukombelela mukunda nu athu ako, gifua enya fami yetu nga aphangi’etu aklisto.—Makalegelo 12:5; Kolosai 4:12.

12. Ndaga jitshi jiandando tudi naye gusha ha fundo diathomo mu isambu yetu?

¹² Itshi idi naye gukhala nu ndando yavula mu gisambu gietu? Yehowa nu gutshigina guenji. Tudi naye gumuhana mersi nu mutshima wetu wagasue mukunda nu ndaga jiagasue ana gutukalegela. (1 Gudilanduluila 29:10-13) Tuajiya mulonga wene handaga, hakhadile Yesu ha mavu, walongesele alandudi enji luholo luagukalagala gisambu. (Tanga Matayo 6:9-13.) Wazuelele egi akhadile naye gukombelela thomo hagula jina dia Nzambi dinemesewe, yakotelesa egi jina diene dizudiwe gifua gima gia gijila. Gungima dienji, Yesu wamonesele egi tudi naye gukombelela egi Ufumu wa Nzambi uze, egi gutshigina gua Yehowa gutshitshiwe ha mavu. Gungima dia gukombelela mukunda nu ndaga jiene jiandando, Yesu wazuelele egi tuajiya giwa gukombelela mukunda nu ndaga jidi gututadila. Guhaga Yehowa nu gutshigina guenji ha fundo  diathomo mu isambu yetu, idi luholo lua gumonesa egi jidi ndaga jia ndando gu meso etu.

13. Isambu yetu idi naye guzula matangua guvula gutshi?

¹³ Isambu yetu idi naye guzula ma tangua guvula gutshi? Biblia yatuhanelego guvula gua tangua dia gukombelela. Gisambu gietu giajiya gukhala giahihia nga gialeha, ha gutadila mulonga tudi nawo. Tuajiya gukalagala gisambu giahihia tangua dia gudia, uvi tuajiya nji gukalagala gisambu gialeha tangua tudi guhana Yehowa mersi, nga tangua dia  gumuwambela ndaga jidi gututadila. (1 Samuele 1:12, 15) Hakhadile Yesu ha mavu, athu ako akhadile gukalagala isambu yaleha ha gula athu a amone, uvi gutshita luholo luene gushigo ndaga yabonga. (Luka 20:46, 47) Isambu ya luholo luene yajiyilego gusuanguluisa Yehowa. Yehowa wana gusuanguluga gila tudi gumukombelela nu mutshima wetu wagasue.

14. Tudi naye gukombelela mahugo guvula gutshi? Ndaga yene, yana gutulongesa itshi mukunda nu Yehowa?

¹⁴ Tudi naye gukombelela mahugo guvula gutshi? Yehowa udi gututoga ha gumukombelela tangua diagasue. Biblia yazuela egi tudi naye gukombelela “mahugo agasue,” tudi naye luko gufubidila “mu gukombelela”. (Matayo 26:41; Lomo 12:12; 1 Tesalonike 5:17) Yehowa wana gututegelela tangua diagasue. Masugu agasue, tuajiya gumuhana mersi mukunda nu guzumba guenji nu mutshima wenji wabonga. Tuajiya nji gutoga egi atutuameze, atuhane ngolo nu gikhesa. Gila tuajiya lume egi gukombelela Yehowa gudi nu  ndando yavula, mbatukalagala ngolo ha gumukombelela mahugo agasue.

15. Gusuga ya gisambu, mukunda natshi tudi naye guzuela egi “amen”?

¹⁵ Gusuga ya gisambu, mukunda natshi tudi naye guzuela egi “amen”? Mbimbi “amen” yakotelesa egi “yadiago” luko egi “ikhale ngenyi.” idi luholo luagumonesa egi tuatshigina ndaga tuazuedi mu gisambu, yana gumonesa nji egi ndaga yazuelewa mu gisambu idi ya giamatshidia. (Ngimbo 41:13) Biblia yana gumonesa egi hakalegewa gisambu mu katshi dia athu avula, ha gumonesa egi tuatshigina ndaga yazuelewa mu gisambu giene tuajiya guzuela “amen” mu dijui diakola nga diazonda.—1 Gudilanduluila 16:36; 1 Kolinto 14:16.

16. Yehowa wana guhana mvutu gu gukombelela guetu ba? Kotelesa.

¹⁶ Yehowa wana guhana diago mvutu gu gukombelela guetu ba? Ai, wana guhana mvutu. Biblia yana guzuela egi muene “wanavua gukombelela guetu.” (Ngimbo 65:3) Yehowa wana guvua isambu y’athu agasue a mitshima yabonga, wana guahana mvutu, wana guyikalagala mu maluholo avula.

17. Luholo lutshi Yehowa wana gukalegela anjelo nu akombeledi enji ako, ha guhana mvutu gu isambu yetu?

¹⁷ Ha guhana mvutu gu isambu yetu, Yehowa wana gukalegela anjelo nu akombeledi enji ako adi ha mavu. (Hebelu 1:13, 14) Athu avula akalegele isambu ha gula ahete ukuateshi wa gukotelesa Biblia, tangua diazonda gungima, Matemue a Yehowa ajile guatala. Biblia yana gumonesa egi anjelo ana gutukuatesa mu mudimo wa gulongesa “lukuma luabonga” ha mavu agasue. (Tanga Yatuwuwe 14:6.) Athu avula mukatshi dietu akombelele gale ha gula Yehowa a akuatese gu mulonga umoshi nga mukunda nu gima gimoshi akhadile nagio funu, gungima, athu ene ahetele  ukuateshi wa phangi muklisto mumoshi wa yala nga wa mukhetu.—Ishima 12:25; Yakoba 2:16.

18. Luholo lutshi Yehowa wana gukadigila nyuma yenji ya gijila nu Biblia ha guhana mvutu gu isambu yetu?

¹⁸ Yehowa wana gukalegela nyuma yenji ya gijila ha guhana mvutu gu isambu yetu. Gila tuakalagala gisambu egi Yehowa atukuatese gu mulonga umoshi, muene wajiya gukalegela nyuma yenji ya gijila ha gututuameza nu gutuhana ngolo. (2 Kolinto 4:7) Ha guhana mvutu gu isambu yetu, Yehowa wana gukalegela luko Biblia ha gutukuatesa tuzule badesizio abonga. Tangua tudi mutanga Biblia, tuajiya gumona baverse ajiya gutukuatesa. Tangua tuana gudibungisa mu hungu Yehowa wajiya gukalegela muthu mumoshi ha guzuela ndaga imoshi yajiya gutukuatesa. Wajiya luko gukalegela mukulu mumoshi ha gutuwambela ndaga imoshi ya Biblia.—Galatiya 6:1.

19. Mukunda natshi tangua diko yajiya gumonega gifua Yehowa anago guhana mvutu gu isambu yetu?

¹⁹ Tangua diko tuajiya gudihula egi: ‘Mukunda natshi Yehowa khenji ahanago mvutu mu gukombelela guami?’ Uvi tujimbilago egi, Yehowa wana gujiya tangua nu luholo luaguhana mvutu gu isambu yetu. Wana gujiya muabonga ima tudi naye funu. Yajiya gutoga egi tufubidile mu gisambu ha gumonesa egi tudi lume nu funu ya gima tudi gumutoga, nu ha gumonesa egi tuana gushila Yehowa mutshima. (Luka 11:5-10) Matangua ako Yehowa wajiya guhana mvutu mu gukombelela guetu mu luholo tuajiyilego gutangiza. Tuajiya gukombelela mukunda nu lamba dimoshi, uvi ha fundo dia gukatula lamba diene, Yehowa wajiya gutuhana ngolo jia gukolesela.—Tanga Filiphi 4:13.

20. Mukunda natshi tudi naye gukombelela Yehowa muavula?

²⁰ Tudi nu luendu luabonga lua gukombelela Yehowa! Tuajiya gusha lume mutshima egi wana gututegelela. (Ngimbo 145:18) Gila tudi mukombelela Yehowa muavula nu mutshima wetu wagasue, ufuta wetu nu muene mbawubua wakola.