1. Felela ditshi Nzambi adi nadio mukunda nu athu?

NZAMBI udi nu felela diabonga mukunda nu athu. Wafugile Adama nu Eva, yala nu mukhetu wathomo, ha gujinga mu dihia dimoshi diabonga. Felela dienji diakhadile egi Adama nu Eva avuale ana, abuise mavu agasue phaladiso nu abambe shitu jiagasue.—Gisendeselo 1:28; 2:8, 9, 15; tala longo 6 gu gisugishilo gia mukanda.

2. (a) Luholo lutshi tuajiya egi Nzambi mbawutaginyisa felela dienji? (b) Itshi Biblia yazuela mukunda nu lujingu lua ivo nu ivo?

² Watangiza egi mbatujinga diago mu phaladiso ba? Yehowa watuwambela egi: ‘Ndaga eji jingazuela mbangujitaginyisa.’ (Yeshaya 46:9-11; 55:11) Mbawutaganesa felela dienji, gushigo nu gima mbagimutunyisa ndo. Yehowa wazuela egi wafugile mavu nu gishina. ‘Alondelego mavu ha gukhala agituhu.’ (Yeshaya 45:18) Wana gutshigina egi athu ajinge ha mavu. Athu a luholo lutshi Nzambi wana gutshigina ajinge ha mavu? Wana gutshigina egi athu ene ajinge masugu guvula gutshi? Biblia yazuela egi: ‘Athu abonga mbaakhala ha mavu, mbaajinga hene ivo nu ivo.’—Ngimbo 37:29; Yatuwuwe 21:3, 4.

3. Luholo athu ana gukata nu ana gufua, yajiya gu gutuma ha gudihula muhu utshi?

³ Mangino athu ana gukata nu ana gufua. Mu mafundo avula, ana gulua itumba, nu ana gudishiya. Ishigo lume felela dia Nzambi ndo. mukunda natshi milonga yabalumugile ha mavu? Phamba Biblia yajiya gutukotelesela.

4, 5. (a) Mu dihia dia Edene nanyi wazuelele nu Eva mu njila ya nyoga? (b) Luholo lutshi muthu wabonga wajiya gubua Nzangi?

⁴ Biblia yana gutuwambela egi Nzambi wakhala nu mbalagaji, jina dienji ‘Satana Diabulu.’ Satana wazuelele nu Eva mu dihia dia Edene mu njila ya nyoga. (Yatuwuwe 12:9; Gisendeselo 3:1) Yakhadile gumonega gifua nyoga idi muzuela.—Tala longo 7 gu gisugishilo gia mukanda.

⁵ Nzambi wafugile Satana Diabulu ba? Ndo! Muanjelo mumoshi wakhadile mu dilu tangua Nzambi wakhadile mulondega mavu mukunda nu Adama nu Eva, muanjelo muene wabuile Diabulu. (Yobo 38:4, 7) Luholo lutshi? Tangiza gale, luholo lutshi muthu wabonga wajiya gubua nzangi? Muthu ganago guvualewa nzangi. Uvi unzangi wana gusendesa nu nzala ya ima yangene. Gila walandula guyitangiza, nzala yene yabola yana gukola. Gungima, gila waheta luholo lua gukuya (kueba), wana gukuya. Luene luholo muthu wana gudibuisa nzangi.—Tanga Yakoba 1:13-15; tala longo 8 gu gisugishilo gia mukanda.

6. Luholo lutshi muanjelo mumoshi wabuile mbalagaji ya Nzambi?

⁶ Wene mulonga wabuidile muanjelo muene. Yehowa wafugile Adama nu Eva, gungima waawambelele egi avuale ana, nu “amuangunuge ha mavu agasue.” (Gisendeselo 1:27, 28) Tangua diko muanjelo muene watangijile gamba: ‘Athu awa agasue ajiya gungukombelela hafundo dia gukombelela Yehowa!’ Gutangiza milonga yene muavula, guamuhanele nzala ya gima giangene gia Yehowa. Muanjelo muene wakhadile gudifelela egi athu amukombelele, hene ajile guleza Eva ndaga jiamambo. (Tanga Gisendeselo 3:1-5.) Mu tangua diene, wabuile Satana Diabulu, mbalagaji ya Nzambi.

7. (a) Mukunda natshi Adama nu Eva Afile? (b) Mukunda natshi tuana gukola nu tuana gufua?

⁷ Adama nu Eva alumbugile Nzambi, hene adile bundu diaatunyishile Nzambi. (Gisendeselo 2:17; 3:6)  Abuile athu a masumu guphala ya Yehowa, hene afile, luholo Yehowa wazuelele. (Gisendeselo 3:17-19) Ana a Adama nu Eva akhadile nji nu masumu, hene afile. (Tanga Lomo 5:12.) Ha gujiya mukunda natshi ana a Adama nu Eva abuile nji athu a masumu, tadila gifezegeselo egi: Gila ginzanza (kifolo) gia gukalegela mampha gidi giafoboga, mampha agasue akalegewa muene mbaazoga afoboga. Halumbugile Adama, wabuile muthu wa masumu. Luholo tudi ana a Adama, mukut’etu agasue tuana guvualewa nu masumu. Hene, tuana gukola nu tuana gufua handaga tudi athu a masumu.—Lomo 3:23; tala longo 9 gu gisugishilo gia mukanda.

8, 9. (a) Satana wakhadile gutshigina egi Adama nu Eva atangize itshi? (b) Mukunda natshi Yehowa ashiyilego alumbugi ene mu tangua diene?

⁸ Satana wasendesele gulumbugila Yehowa tangua washinjigile Adama nu Eva alumbugile Nzambi. Wakhadile gutshigina egi Adama nu Eva atangize egi Yehowa udi muenya mambo, udi mutuameji wabola, anako gutshigina gubonga guawo. Satana wamonesele egi athu ashiko nu funu ya utuameji wa Nzambi, wakhadile luko gumonesa egi Adama nu Eva akhadile naye guzula desizio dia guditombela ndaga itshi idi yabonga nga yabola. Ndaga itshi Yehowa wakhadile naye gukalagala gu mulonga wene? Wakhadile nu ngolo jia gushiya alumbugi ene ha gusugisa ulumbugi wawo. Uvi, Gutshita ngenyi guajiyile gumonesa egi Satana muenya mambo ba? Ndo!

⁹ Yehowa ashiyilego alumbugi ene giphungu gimoshi. Hafundo dia guashiya, waabembelele tangua dia gudituameza. Gukalagala ngenyi, guajiyile gumonesa egi Satana muenya mambo, guajiyile luko gumonesa egi Yehowa wana gujiya luholo athu ajiya guheta gubonga. Mu Mukhapho wa 11 mbatuzuelela luko ndaga jiavula mukunda nu mulonga wene. Uvi itshi watangiza  mukunda nu desizio Adama nu Eva azudile? Atshitshile muabonga ha gutshigina Satana nu ha gutuna Yehowa ba? Ima yagasue Adama nu Eva akhadile nayo, Yehowa waahanele. Waahanele lujingu luagutagana, nu fundo diabonga dia gukhala, nu mudimo wagusuanguluisa. Uvi Satana gaahanelego ata gima gimoshi. Gula ukhale ha fundo dia Adama nu Eva, nga wakalegele itshi?

10. Gutomba gutshi gua ndando muthu wagasue adi naye gukalagala?

 ¹⁰ Mangino, muthu wagasue udi naye gutomba gulandula Yehowa nga ndo, gutomba guene guajiya gumonesa luholo lua lujingu mbaakhala naluo. Ha gumonesa egi Satana muenya mambo, tuajiya gutomba gutumagela Yehowa akhale Mutuameji wetu. Uvi tuajiya luko gutomba Satana akhale mutuameji wetu. (Ngimbo 73:28; tanga Ishima 27:11.) Athu phamba azonda ana gutumagela Nzambi. Uvi Nzambi anago gutuameza mavu. Gila ishigo Nzambi mutuameji, nanyi giwa?

11, 12. (a) Longo ditshi tuazula ha gutadila luholo Satana wadile egi ahane Yesu maufumu agasue a ha mavu? (b) Mikhapho itshi ya Biblia yamonesa egi Satana wana gutuameza mavu?

¹¹ Yesu wakhadile gujiya muthu wana gutuameza mavu. Lusugu lumoshi, Satana ‘wamulezele maufumu agasue a ha mavu nu gutumbuga guawo.’ Hangima wawambelele Yesu egi: “Ima eyi yagasue mbanguguhua nayo gula wangufugamena ha mabongo ha gungukombelela.” (Matayo 4:8, 9; Luka 4:5, 6) Dihule gale, ‘Gila maufumu ene akhadilego a Satana, nga waahanele Yesu ba?’ Ndo. Satana udi fumu wa maguvernema agasue.

¹² Wajiya gudihula egi: ‘Luholo lutshi Satana ajiya gukhala mutuameji wa maguvernema agasue? Yehowa ashiko Nzambi wa ngolo jiagasue nu mufugi wa ima yagasue ba?’ (Yatuwuwe 4:11) Ai, Yehowa Nzambi wa ngolo jiagasue, muene mufugi wa ima yagasue, uvi Yesu watambigile Satana egi: ‘fumu wa mavu awa.’ (Yone 12:31; 14:30; 16:11) Pholo watamegele Satana Diabulu egi: “nzambi yabola ya ha mavu awa.” (2 Kolinto 4:3, 4) Yone wafundjile egi: “mavu agasue adi mu uhinyinyi wa muthu wabola.”—1 Yone 5:19.

13. Mukunda natshi tudi nu funu ya mavu ahe-ahe?

¹³ Lusugu nu lusugu mavu awa adi gubola. Mu ifutshi yagasue tudi gumona itumba, tubatshia kano (corruption), mulebo, nu gushiyiwa. Athu ajiyilego gumanesa milonga yene yagasue nga akalagala luholo lutshi. Uvi mu ita ya Halemagedona Nzambi mbawusugisa mavu wawa abola, hafundo diawo mbawuhaga mavu abonga ahe-ahe.—Yatuwuwe 16:14-16; tala longo 10 gu gisugishilo gia mukanda.

14. Nzambi watombele nanyi ha gukhala Fumu ya Ufumu Wenji? Mulonga utshi Biblia yadiangele guzuela mukunda nu Yesu?

¹⁴ Yehowa watombele Yesu Klisto abue Fumu ya Ufumu Wenji wa mu Dilu. Ivo yavula gumatuamena, Biblia yazuelele egi Yesu mbawutuameza mavu gifua “Phingua ya guhuima,” yazuelele luko egi guvernema yenji mbayikhala masugu agasue. (Yeshaya 9:5, 6) Yesu walongesele alandudi enji luholo lua gukombelela mukunda nu Ufumu wene egi: ‘Ufumu waye uze, gutshigina guaye gutshitshiwe ha mavu, gifua mu dilu.’ (Matayo 6:10) Mu Mukhapho wa 8, mbatumona luholo Ufumu wa Nzambi mbawuzula fundo dia maguvervenema agasue a ha mavu. (Tanga Danyele 2:44.) Hakiene, Ufumu wa Nzambi mbawubuisa mavu agasue phaladiso.—Tala longo 11 gu gisugishilo gia mukanda.

15. “Mavu ahe-ahe” akotelesa itshi?

¹⁵ Biblia yatendelela egi: ‘Gudi nu dilu dihe-dihe nu mavu ahe-ahe, mbagukhala giamatshidia,’ yazuela luko egi ‘ene tudi munenga.’ (2 Phetelo 3:13; Yeshaya 65:17) Mu mafundo ako Biblia yana guzuelela “mavu,” yana gukotelesa athu ana gujinga hene. (Gisendeselo 11:1) Hakiene, “mavu aheahe, mbagukhala  giamatshidia,” akotelesa athu agasue Nzambi adi gusagumuna handaga ana gumutumagela.

16. Kado yitshi yabonga Nzambi mbaahana athu mbaakhala ha mavu ahe-ahe, enji gima gitshi tudi naye gukalagala ha guheta kado yene?

¹⁶ Yesu watendelele egi athu mbaajinga ha mavu ahe-ahe a Nzambi, mbaaheta lujingu lua “ivo nu ivo.” (Mako 10:30) Itshi tudi naye gukalagala ha guheta kado yene? Tanga Yone 3:16 nu 17:3 ha guheta mvutu. Tutale ndaga Biblia yana guzuela mu luholo lujingu mbalukhala mu phaladiso.

17, 18. Luholo lutshi tuajiya egi guhuima mbagukhala ha mavu agasue, enji mbatushigo luko guvua woma?

¹⁷ Gubola, ita, gudishiya nu gumonesa athu ako lamba mbaguhua. Athu abola agasue mbaashigo gusala ha mavu ene. (Ngimbo 37:10, 11) Nzambi ‘mbawusugisa ita yagasue ha mavu.’ (Ngimbo 46:10; Yeshaya 2:4) Mavu mbaazala nu athu ana guzumba nu gunemesa Nzambi. Guhuima mbagukhala ha mavu ivo nu ivo.—Ngimbo 72:7.

¹⁸ Athu ana gunemesa Yehowa mbaajinga mu guhuima. Biblia yana guzuela egi tangua enya Isalele akhadile gunemesa Yehowa, akhadile nu guhuima, handaga Yehowa wakhadile guabamba. (Levi 25:18, 19) Mu phaladiso, mbatushigo guvua woma wa muthu nga wa gima gimoshi ndo. Mbatujinga mu guhuima ivo nu ivo!—Tanga Yeshaya 32:18; Mika 4:4.

19. Mukunda natshi tuajiya gusha mutshima egi ha mavu ahe-ahe a Nzambi, ima yagudia mbayikhala yavula?

¹⁹ Ima yagudia mbayizala ha mavu. ‘Mbuto mbajikhala jiavula ha mavu; mbajitutumuga holu dia milundu.’ (Ngimbo 72:16) Yehowa “Nzambi wetu, mbawutusuanguluisa,” hene, ‘mavu mbaazola mbuto jiavula.’—Ngimbo 67:7.

20. Luholo lutshi tuajiya egi mavu mbaabua phaladiso?

²⁰ Mavu agasue mbaabua phaladiso. Athu mbaakhala  nu jinzo jiabonga nu ilanga. (Tanga Yeshaya 65:21-24; Yatuwuwe 11:18.) Mavu agasue mbaakhala abonga lume gifua dihia dia Edene. Yehowa mbawutuhana ima yagasue tudi nayo funu. Biblia yazuela mukunda nu Nzambi egi: ‘Aye wana guahua ima yatagana yajiya gumanesela nzala yawo.’—Ngimbo 145:16.

21. Luholo lutshi tuajiya egi athu nu shitu mbaajinga mu guhuima?

²¹ Athu nu shitu mbaajinga mu guhuima. Shitu mbajishigo luko gukalagala athu gubola. Mona wa galenge mbaashigo guvua woma, nga wasuena hehi nu shitu jiabala, tuana gulenga mangino.—Tanga Yeshaya 11:6-9; 65:25.

22. Ndaga itshi Yesu mbaakalegela enya misongo?

²² Gushiko nu muthu mbawukata luko. Tangua Yesu akhadile ha mavu, wasagele athu avula. (Matayo 9:35; Mako 1:40-42; Yone 5:5-9) Uvi mangino Yesu udi Fumu wa Ufumu wa Nzambi, mbawusaga athu agasue. Gushigo nu muthu mbawuzuela luko egi: “ngudi muvua misongo.”—Yeshaya 33:24; 35:5, 6.

23. Ndaga itshi Nzambi mbaakalagala mukunda nu athu afile gale?

²³ Athu agufua mbaajinga luko. Nzambi watendelele egi inunu y’athu yafuile gale mbaafuzumuga “Gufuzumuga gua athu abola nu abonga mbagukhala.”—Tanga Yone 5:28, 29; Makalegelo 24:15.

24. Luholo lutshi wana gudivua gila watangiza lujingu mu phaladiso?

²⁴ Tudi naye gutomba. Tuajiya gutomba gulonguga milonga ya Yehowa nu gumukalegela, nga gutomba gukalagala yagasue tuatshigina gukalagala. Gila tuatomba gukalegela Yehowa, tuajiya gukhala nu lujingu luabonga masugu adi muza. Tangua muthu mungoshi watogele Yesu amuwunguluge (amuyabuluke) gungima dia gufua guenji, Yesu wamulayile egi: ‘Aye mbawukhala nu ame mu phaladiso.’ (Luka 23:43) Tuzuelele milonga yatadila Yesu Klisto nu luholo mbaatagenesa malaji abonga a Nzambi.