1. Gisambu gitshi giajiyiwa muavula mbatuzuelela?

ATHU avula ajiya gisambu giana gutambegewa egi Tata udi mu dilu. Yesu wakadigile gisambu giene haguleza alandudi enji luholo lua gukombelela. Wakombelele mukunda nu ndaga jitshi? Mukunda natshi gisambu giene gidi nu ndando mangino?

2. Yesu watulongesele ha gukombelela mukunda nu ndaga jitshi thathu jia ndando?

² Yesu wazuelele egi: “Mukombelele Nzambi etshi: ‘Tata udi mu dilu: Jina diaye dia gijila dinemesewe. Ufumu waye uze, gutshigina guaye gutshitshiwe ha mavu, gifua mugudi mutshitshiwa mu dilu.’” (Tanga Matayo 6:9-13.) Mukunda natshi Yesu watulongesele gukombela hamulonga nu ndag’eji thathu?—Tala longo dia 20 gu gisugishilo gia mukanda.

3. Ndaga jitshi tudi naye gujiya mukunda nu Ufumu wa Nzambi?

³ Tualonguga gale egi jina dia Nzambi Yehowa. Tuazuelela gale felela dia Nzambi mukunda nu athu nu mavu. Uvi itshi Yesu watshiginyile guzuela tangua wazuelele egi: “Ufumu waye uze”? Mbatulonguga ndag’eji: Ufumu wa Nzambi udi itshi, mbawukalagala mulonga utshi, enji luholo lutshi Ufumu wene mbawumonesa egi jina dia Nzambi didi dia gijila.

4. Ufumu wa Nzambi udi itshi, nanyi udi Fumu wa Ufumu wene?

⁴ Yehowa walondele guvernema umoshi mu dilu, watombele Yesu ha gukhala Fumu wa guvernema wene. Biblia yatamega guvernema wene egi Ufumu wa Nzambi. Yesu udi “Fumu ya mafumu nu Galamba ga tulamba tua  ifutshi.” (1 Timote 6:15) Yesu wajiya gukalagala ndanga jiabonga gubalega mutuameji wagasue ha mavu, udi nu ngolo jiavula gubalega mafumu agasue.

5. Ufumu wa Nzambi wakhala guma gutshi? Mbawutuameza itshi?

⁵ Masugu 40 gungima dia gufuzumuga guenji, Yesu wavutugile mu dilu. Yehowa wamutombele hagubua Fumu wa Ufumu wene. (Makalegelo 2:33) Ufumu wa Nzambi udi mu dilu, uvi mbawutuameza mavu. (Yatuwuwe 11:15) Giene gishina, Biblia yana gutamega Ufumu wa Nzambi egi “Ufumu wa mu dilu.”—2 Timote 4:18.

6, 7. Mukunda natshi Yesu wabalega mafumu agasue ana gutuameza?

⁶ Biblia yazuela egi Yesu wabalega mafumu agasue, handaga “ muene hakhenji gajiyilego gufua.” (1 Timote 6:16) Mafumu agasue ana gutuameza mavu ajiya gufua, uvi Yesu ajiyilego gufua. Ndaga jiabonga jiagasue Yesu mbaakalagala mukunda nu esue mbajisala mayilago.

⁷ Profesi jia Biblia jiana guzuela egi Yesu mbawukhala Fumu wa bonga, mbawuvuila athu khenda: ‘Nyuma ya Yehowa mbayimuhua jindunge, nu gutema nu uthemengi wa guwendesa athu enji. Muene mbawujiya Yehowa, mbawumutumbuisa. Muene mbawukhala nu gusuanguluga ha gumutumagena. Muene mbagazuelesago milonga gifua mudi muene mumona gumeso, nga gifua mudi muene muvua gu matshui. Muene mbawuzuelesa jiphutu nu giamatshidia, mbawuzuelela athu agudibulumuisa a ha mavu. Muene mbawubeta mavu nu mbimbi yenji gifua fimbo. Athu mbamuenesewa lamba mu mbimbi yenji, muene mbawushiya athu abola khuta nu muhehe wa mukano guenji.’ (Yeshaya 11:2-4) Wana gutshigina egi Fumu waye akhale luholo luene ba?

8. Luholo lutshi tuajiya egi Yesu mbashigo muhinyina hakhenji?

 ⁸ Nzambi watombele athu ako ha gutuameza nu Yesu mu guvernema wene wa mu dilu. Pholo walezele Timote egi: ‘Gula tuakolesela, mbatuhinyina nji n’enji gifua mafumu.’ (2 Timote 2:12) Athu guvula gutshi mbaahinyina nu Yesu gifua mafumu?

9. Athu guvula gutshi mbahinyina nu Yesu? Tangua ditshi Nzambi wasendesele gutomba athu ene?

⁹ Luholo tualongugile mu Mukhapho wa 7, mupostolo Yone wamonele Yesu mu gishigo gumona (vizio) gifua Fumu wa mu dilu nu mafumu ako 144 000. Athu ene 144 000 adi akuatshi? Yone wakotelesele egi mafumu “ene akhalele nu jina dienji [Yesu] nu dia Sh’enji agufunda ha mbombo”. Wazuelele luko egi: “Enyawa ene athu adi mulandula mon’a gimeme [Yesu] guagasue gudi muene muya, ene akudiwe mukatshi di’athu.” (Tanga Yatuwuwe 14:1, 4.) Athu ene 144 000 adi Aklisto agutshigina Nzambi watombele “ha guhinyina mavu” hamoshi nu Yesu. Tangua ana gufua, ana gufuzumuga ha guya mujinga mu dilu. (Yatuwuwe 5:10) Sendesa tangua dia atumiwi, Yehowa wana gutomba aklisto agutshigina ha gutaganyisa thundu yene ya mafumu 144 000.

10. Mukunda natshi tuajiya guzuela egi Yehowa watumonesele guzumba luholo wahagele Yesu nu athu 144 000 egi atuameze mavu?

¹⁰ Yehowa wana gututangiza muavula hene walondegele egi athu ahinyine nu Yesu. Yesu mbawukhala mutuameji wabonga handaga wana gutujiya muabonga. Wajiya ndaga jiana gusuanguluisa athu nu ndaga jiana guahana lamba. Pholo wamonesele luholo Yesu ana gututalela, wazuelele egi Yesu wajiya ‘gutuvila khenda mukunda nu guleba guetu’, luko “walolewe mu ndaga jiagasue gifua esue.” (Hebelu 4:15; 5:8) Athu ene 144 000 ajiya nji luholo athu ana gukhala. Ene akhadile  gulua nu guleba gua muila nu misongo. Tuajiya gushia mutshima egi Yesu nu athu 144 000 mbaadihaga ha fundo dietu, mbaajiya nji malamba etu.

11. Mukunda natshi Yesu walongesele alandudi enji akombelele egi gutshigina gua Nzambi gukalegewe mu dilu?

¹¹ Yesu walongesele alandudi enji ha gukombelela hagula gutshigina gua Nzambi gukalegewe mu dilu. Mukunda natshi? Tualongugile mu Mukhapho wa 3 egi Satana Diabulu walumbugile Yehowa. Halumbugile Satana, Yehowa wamuhanele nu bademo enji, njila yagukhala tangua diazonda mu dilu. Yene yakadigile egi, mu dilu mukhale nu ifugiwi iko yanago gukalagala gutshigina gua Nzambi. Mu Mukhapho wa 10, mbatulonguga ndaga jiavula jiatadila Satana nu bademo.

12. Ndaga jitshi mbadi jiandando mukanda wa Yatuwuwe 12:10 udi muzuelela?

¹² Biblia yakotelesa egi hahagewe Yesu Fumu wa Ufumu wa Nzambi, tangua diazonda gungima wakhadile naye gulua ita nu Satana. (Tanga Yatuwuwe 12:7-10.) Verse 10 yazuelela ndaga mbadi jia ndando. Yesu wasendesa guhinyina gifua Fumu wa Ufumu wa Nzambi, Satana wabishidiwa hashi ha mavu. Mbatumona egi ndaga jiene jiataganyile gale.

13. Habishidiwe Satana hashi, ndaga itshi yabuile mu dilu?

¹³ Biblia idi mumonesa luholo anjelo a Nzambi asuangulugile tangua Satana nu bademo enji abishidiwe hashi. Anjelo ene azuelele egi: “Suangulugenu, aye dilu nu enue muana khala muene.” (Yatuwuwe 12:12) Dilu diaheta gudivua nu guhuima guatagana, handaka mukut’awo agasue adi gutumagela Nzambi.

14. Habishidiwe Satana, ndaga jitshi jiabuile ha mavu?

 ¹⁴ Uvi ha mavu lujingu ludi luholo luko. Ndaga jia lamba jiana gubuila athu ‘handaga Diabulu wabulumuga gale,’ udi nu ‘khabu jiabala handaga, muene wajiya gamba: Kumbi diami diasala diazonda.’ (Yatuwuwe 12:12) Satana udi nu khabu. Wabishidiwe hashi, umujiya egi gualeha ndo mbaamushiya. Wana gukalagala yagasue yatshigina muene ha guzola malungu, malamba, nu ha gusagesa athu ha mavu.

15. Felela ditshi Nzambi adi nadio mukunda nu mavu?

¹⁵ Uvi felela dia Nzambi mukunda nu mavu mbadishigo mubalumuga. Wana gutshigina egi athu agutagana ajinge ivo nu ivo mu phaladiso ha mavu. (Ngimbo 37:29) Luholo lutshi Ufumu wa Nzambi mbawutaganyisa ndaga jiene?

16, 17. Mukanda wa Danyele 2:44 watuwambela itshi mukunda nu Ufumu wa Nzambi?

¹⁶ Profesi idi mu mukanda wa Danyele 2:44 yazuela egi: “Mu hugo dia mafumu anyi, Nzambi wa mu dilu mbawuhaga ufumu uko, mbawukhadigo nu gisugishilo ndo sha. Wene mbawubalegewago jingolo gudi ifutshi iko. Uvi mbawukulula maufumu anyi hangima wene mbosala ivo nu ivo.” Profesi yene idi gutulongesa gima gitshi mukunda nu Ufumu wa Nzambi?

¹⁷ Yathomo, idi gutuwambela egi Ufumu wa Nzambi mbawusendesa guhinyina “mu hugo dia mafumu anyi.” Yakotelesa egi Ufumu wa Nzambi mbawusanga maguvernema ako ha mavu. Yangiadi, idi gutuwambela egi Ufumu wa Nzambi mbawukhala ivo nu ivo, gushigo nu guvernema uko mbawuwukatula. Yathathu idi gumonesa egi Ufumu wa Nzambi mbawuluisa maguvernema a ha mavu awa. Ufumu wa Nzambi mbawubinga, mbawusala wene hakhawo hagutuameza mavu. Athu mbaaheta guvernema umoshi wabonga gubalega.

18. Jina ditshi diana gutamegewa ita ya suga ya Ufumu wa Nzambi nu maguvernema a ha mavu awa?

 ¹⁸ Luholo lutshi Ufumu wa Nzambi mbawutuameza mavu? Gutuama dia ita ya gisugishilo, giana gutamegewa egi Halemagedona, bademo mbaadimba “mafumu agasue a ha mavu ha guabungisa mukunda nu ita ya lusugu luakoma lua Nzambi wa Ngolo Jiagasue.” Mafumu a maguvernema a ha mavu wawa mbaaluisa Ufumu wa Nzambi.—Yatuwuwe 16:14, 16; tala longo 10 gu gisugishilo gia mukanda.

19, 20. Mukunda natshi tudi nu funu egi Ufumu wa Nzambi uhinyine ha mavu?

¹⁹ Mukunda natshi tudi nu funu ya Ufumu wa Nzambi? Mukunda nu ishina thatu. Yathomo, tudi athu a masumu, tuana gukata nu gufua. Uvi Biblia yana gutuwambela egi tangua dia Ufumu wene, mbatujinga ivo nu ivo. Mukanda wa Yone 3:16 wazuela egi: “Nzambi wabalegele guzumba a ha mavu, muene waahuile Mun’enji mumoshi ha mumoshi, ha muthu yagasue wamutshigina gafuigo uvi akhale nu lujingu lua ivo nu ivo.”

²⁰ Yambadi, tudi nu funu ya Ufumu wa Nzambi, handaka tuana gujinga nu athu abola. Athu avula adi enya mambo, adi nu unzangi, ana gukalagala uthambi. Tushigo nu luholo lua guakatula, uvi Nzambi mbawuakatula. Mu ita ya Halemagedona, Nzambi mbawushiya athu agasue ana gukalagala ndaga jiabola. (Tanga Ngimbo 37:10.) Yathathu, tudi nu funu ya Ufumu wa Nzambi, handaka maguvernema a ha mavu adi abola, ashiko nu khenda ndo, ana gutshigina tubatshi’a kano. Anako gukuatesa athu atumagele Nzambi. Biblia yana guzuela gamba “muthu udi muhinyina muthu na muko nu gumubuisa muenya lamba.”—Mulongeshi 8:9.

21. Luholo lutshi Ufumu wa Nzambi mbawukuatesa athu agasue ha gutshita gutshigina gua Nzambi?

 ²¹ Gungima dia Halemagedona, Ufumu wa Nzambi mbawukuatesa athu agasue ha gutshita gutshigina gua Nzambi. Mbawukatula Satana nu bademo enji. (Yatuwuwe 20:1-3) Gushigo nu muthu mbawukata nga mbawufua luko. Mukunda nu gibawu, athu agasue a gutshigina mbaajinga ivo nu ivo mu phaladiso. (Yatuwuwe 22:1-3) Ufumu wene mbawunemesa jina dia Nzambi. Yakotelesa itshi? Yakotelesa egi tangua guvernema wa Nzambi mbawuhinyina mavu, athu agasue mbaanemesa jina dia Yehowa.—Tala longo dia 21 gu gisugishilo gia mukanda.

22. Luholo lutshi tuajiya egi Yesu wabuilego Fumu tangua wakhadile ha mavu nga tangua diazonda gungima dia gufuzumuga guenji?

²² Yesu wawambelele alandudi enji akombelele egi: “Ufumu waye uze.” Ndaga yene yamonesele egi guvernema wa Nzambi wakhadile naye guza gungima. Yehowa wakhadile naye thomo guhaga guvernema wenji, nu gutomba Yesu gifua Fumu wa guvernema wene. Havutugile Yesu mu dilu, wabuile Fumu tangua diene ba? Ndo, wakhadile naye gunengenena. Masugu azonda gungima  dia gufuzumuga gua Yesu, Phetelo nu Pholo ayimonesele haphelo tangua azuelele egi profesi idi mu mukanda wa Ngimbo 110:1, yakhadile guzuelela Yesu. Mu profesi yene Yehowa udi muzuela egi: ‘Khala haha gukoko guami guamadia, uu mbanguhaga mbalagaji jiaye goshi’a ikanzo yaye.’ (Makalegelo 2:32-35; Hebelu 10:12, 13) Yesu wakhadile naye gunengenena matangua guvula gutshi hagula Yehowa amushe Fumu?

23. (a) Tangua ditshi Yesu wasendesele guhinyina gifua Fumu wa guvernema wa Nzambi? (b) Ndaga jitshi mbatulonguga mu mukapho walandula?

²³ Ivo yavula gutuama, hunji dimoshi dia Aklisto a giamatshidia diakotelesele egi givo 1914 mbagikhala givo gia ndando mukunda nu profesi jia Biblia. Ndaga jiana gubalega ha mavu sendese mu 1914, jia tshiginyisa etshi Aklisto ene azuelele ndaga jia giamatshidia. Yesu wasendesele guhinyina gifua Fumu mu givo giene. (Ngimbo 110:2) Tangua diazonda gungima, Satana wabishidiwe ha mavu, henyaha ‘kumbi dienji diasala diazonda.’ (Yatuwuwe 12:12) Mu mukhapho walandula, mbatumona ndaga jiavula jiamonesa egi tudi mujinga mu sungi yene. Mbatulonguga luko egi gualeha ndo Ufumu wa Nzambi mbawukuatesa mavu agasue ha gukalagala gutshigina gua Nzambi.—Tala longo dia 22 gu gisugishilo gia mukanda.