1, 2. (a) Mukunda natshi gujiya phamba jina dia muthu wajiyiwa muavula yamoneselego egi wamujiya muabonga? Kotelesa. (b) Athu ana guzuela egi Yesu wakhadile nanyi?

GUDI nu athu avula ajiyiwa ha mavu agasue. Wajiya gujiya jina dia mumoshi mukatshi diawo. Uvi gujiya jina dia muthu muene gushigo gukotelesa egi wamujiya muabonga. Handaga ushigo mujiya milonga yagasue ya lujingu luenji nga makalegelo enji.

² Yesu Klisto wakhadile ha mavu yabalega gale ivo hehi nu 2 000, yajiya gukhala egi wavile gale milonga yamutadila. Uvi athu avula anako gujiya gila Yesu wakhadile muthu wa luholo lutshi. Ako ana guzuela egi wakhadile muthu wabonga, ako gamba wakhadile profete, ako ana gutshigina egi udi Nzambi. Uvi aye, wana gutangiza luholo lutshi?—Tala longo 12 gu gisugishilo gia mukanda.

3. Mukunda natshi udi naye gujiya Yehowa Nzambi nu Yesu Klisto?

³ Gujiya giamatshidia mukunda nu Yesu gudi mulonga wa ndando. Mukunda natshi? Biblia yazuela egi: ‘Lujingu lua ivo nu ivo, ludi gujiya aye, Nzambi mumoshi wa giamatshidia, nu Yesu Kilisto uwatumine.’ (Yone 17:3) Gila wajiya giamatshidia giatadila Yehowa nu Yesu, wajiya gujinga ivo nu ivo mu phaladiso ha mavu. (Yone 14:6) Gujiya ndaga jia Yesu guajiya luko gugukuatesa handaga Yesu wamonesele lume luholo tuajiya gukhala muabonga nu athu. (Yone 13:34, 35) Mu Mukhapho wa 1, tualongugile giamatshidia giatadila Nzambi. Mu mukhapho owu mbatujiya ndaga Biblia yana gulongesa mukunda nu Yesu.

4. Mbimbi “Masiya” nu “Klisto” jiakotelesa itshi?

⁴ Ivo yavula gungima dia guvualewa gua Yesu, Yehowa watendelele mu Biblia egi mbawutuma Masiya, Klisto. Jina “Masiya” diazudiwa mu zuelelo dia Hebelu, jina “Klisto” diazudiwa mu zuelelo dia Greki. Batitre ene mbadi akotelesa egi Nzambi mbawutomba Masiya muene watendelewe, mbawumuhaga ha fundo dia lukuma. Masiya muene mbawutagenesa malaji agasue a Nzambi. Yesu wajiya gugukuatesa mangino. Uvi gutuama dia guvualewa gua Yesu, athu avula akhadile gudihula egi, ‘Nanyi mbawukhala Masiya?’

5. Alandudi a Yesu akhadile gutshigina egi muene udi Masiya ba?

⁵ Alandudi a Yesu akhadile lume gutshigina egi Yesu muene Masiya. (Yone 1:41) Lusugu luko, Simona Phetelo wawambelele Yesu egi: “Aye udi Klisto.” (Matayo 16:16) Itshi yajiya gututshiginyisa egi Yesu muene Masiya?

6. Luholo lutshi Yehowa wakuatesele athu a giamatshidia ha gujiya Masiya?

⁶ Ivo yavula gutuama dia guvualewa gua Yesu, profete jia Nzambi jiasonegele milonga yavula mukunda nu Masiya, ha gula egi athu amujiye. Luholo lutshi milonga yene yajiya gutukuatesa? Tangiza thomo egi watumiwa gu parkinge ha gukamba muthu mungoshi, uvi ushigo gujiya muthu muene. Gila aguleza ndaga jiatadila muthu muene, nu sudigilo dienji, jiajiya gugukuatesa ha gumumona. Yehowa nji wakalegele luholo lumoshi, watumine profete jienji ha gutuwambela ndaga jiavula jiatadila Masiya nu makalegelo enji nu milonga mbayimubuila. Gutagana gua profesi jiene jiagasue, guana gukuatesa athu a giamatshidia ha gujiya egi Yesu muene Masiya.

7. Profesi jitshi mbadi jiana gumonesa egi Yesu muene Masiya?

 ⁷ Tuzuelele gale profesi mbadi jiatadila Masiya. Ya thomo, ivo 700 gutuama dia guvualewa gua Yesu, Mika watendelele egi Masiya mbawuvualewa mu gadimbo gamoshi gazonda jina diago Betelehema. (Mika 5:1) Yesu wavualewe mu gadimbo gene! (Matayo 2:1, 3-9) Ya mbadi, Danyele watendelele egi Masiya mbawuzoga mu givo gia 29 gia sungi yetu. (Danyele 9:25) Tuazuelela phamba profesi mbadi, uvi gudi nu profesi jiko jiavula jiana gumonesa haphelo egi Yesu udi Masiya.—Tala longo 13 gu gisugishilo gia mukanda.

8, 9. Itshi yabalegele tangua Yesu wakhadile gubatijiwa, idi gumonesa egi muene Masiya?

⁸ Yehowa wamonesele haphelo egi Yesu muene Masiya. Nzambi walayile egi mbawuhana njimbu gua Yone Mubatiji hagula ajiye Masiya. Hayile Yesu mubatijiwa gudi Yone Mubatiji mu muta wa Yordani mu givo gia 29 gia sungi yetu, Yone wamonene njimbu yene. Biblia yatuwambela ndaga yabalegele: “habatshijiwe Yesu, wazogele mu meya. Gatshididi dilu diatuwuwe, wamuenene nyuma ya Nzambi mubulumuga gifua ganjila ga yembe mumubuila. Mbimbi yajile mu dilu yazuelele egi: ‘you udi mun’ami wazumbiwa udi mungusuanguluisa.’” (Matayo 3:16, 17) Havile Yone nu hamonele njimbu yene, wajiyile egi Yesu muene Masiya. (Yone 1:32-34) Lusugu luene, hamuangele Yehowa nyuma yenji holu dia Yesu, Yesu wabuile Masiya. Yehowa wamutombele ha gubua Mutuameji nu Fumu.—Yeshaya 55:4.

 ⁹ Profesi jia Biblia, nu mbimbi jia Yehowa, nu njimbu Yehowa wahanele lusugu Yesu abatshijiwe, jiamonesa lume egi Yesu muene Masiya. Uvi Yesu wakatugile guma gutshi, enji wakhadile muthu wa luholo lutshi? Tutale ndaga Biblia yana gulongesa mukunda nu mihu yene.

10. Itshi Biblia yana gulongesa mukunda nu lujingu Yesu wakhadile naluo gutuama dia guza ha mavu?

¹⁰ Biblia yana gulongesa egi Yesu wakhadile mu dilu tangua diavula gutuama dia guza ha mavu. Mika wazuelele egi Masiya ‘wasendesele gunuu mu masugu a gu mangima.’ (Mika 5:1) Yesu wakhadile guzuela matangua avula egi wakhadile mu dilu gutuama dia guvualewa ha mavu gifua muthu. (Tanga Yone 3:13; 6:38, 62; 17:4, 5.) Gutuama dia guza ha mavu, Yesu wakhadile gudivua muabonga nu Yehowa.

11. Mukunda natshi Yehowa ana guzumba Yesu muavula?

¹¹ Yehowa wana guzumba Yesu muavula. Mukunda natshi? Handaga, Nzambi wamufugile gutuama dia ima yagasue nu muthu wagasue. Hene Yesu atamegewa egi “Somi ya gifugiwi giagasue gia Nzambi.” * (Kolosai 1:15) Yesu udi luko nu ndando gu meso a Yehowa handaga udi gifugiwi phamba gimoshi Yehowa wafugile muene hakhenji. Giene gishina ana gutamegewa egi “Mun’enji mumoshi ha mumoshi.” (Yone 3:16) Luko, Yehowa wakadigile Yesu ha gufuga ima iko yagasue. (Kolosai 1:16) Phamba Yesu watamegewa egi “mbimbi,” handaga Yehowa wamukadigile ha guhana mbimbi gua anjelo nu gua athu.—Yone 1:14.

12. Luholo lutshi tuajiya egi Yesu nu Nzambi ashigo muthu mumoshi?

¹² Athu ako ana gutangiza egi Yesu nu Nzambi adi muthu mumoshi. Uvi Biblia yanako gulongesa luholo luene. Biblia yana guzuela egi Yesu wafugiwe, yakotelesa  egi Yesu udi nu gisendeselo. Uvi Yehowa muene mufugi wa ima yagasue, ashigo nu gisendeselo ndo. (Ngimbo 90:2) Yesu Mun’a Nzambi khenji atangijile ndo gubua gifua Nzambi. Biblia yana lume gulongesa egi Tata wabalega Mona. (Tanga Yone 14:28; 1 Kolinto 11:3.) Phamba Yehowa udi “Nzambi wa ngolo jiagasue.” (Gisendeselo 17:1) Yehowa udi wabalega gukoma, udi luko nu ngolo jiavula gubalega athu nu ima yagasue.—Tala longo 14 gu gisugishilo gia mukanda.

13. Mukunda natshi Biblia yazuela egi Yesu udi “gifuanesa gia Nzambi utuajiyilego gumona nu meso”?

¹³ Yehowa nu Mun’enji Yesu ajingile ivo inunu yavula gutuama dia gufuga dilu nu mavu. Adi naye gukhala adizumba muavula! (Yone 3:35; 14:31) Yesu wakhadile nu makalegelo gifua a sh’enji, hene Biblia yamutamega egi “gifuanesa gia Nzambi utuajiyileko gumona nu meso.”—Kolosai 1:15.

14. Luholo lutshi Yesu wavualewe gifua muthu?

¹⁴ Yesu, mona Yehowa wana gushila mutshima watshiginyile gukatuga mu dilu ha guvualewa ha mavu gifua muthu. Luholo lutshi? Yehowa wahagele lujingu lua Mun’enji mu vumo dia mukhetu mumoshi jina dienji Madiya, mukhetu muene wakhadile khenji ajiyile yala ndo. Hene, Yesu akhadilego nu tata ha mavu. Madiya wavualele mona wa gutagana, wamuhanele jina Yesu.—Luka 1:30-35.

15. Luholo lutshi wajiya gujiya Yehowa muabonga?

¹⁵ Gila watanga mikanda ya Matayo, Mako, Luka nu Yone, wajiya gujiya ndaga jiavula jiatadila lujingu lua Yesu nu makalegelo enji. Ndaga jiene jiajiya gugukuatesa ujiye Yehowa muabonga, handaga  Yesu udi gifua Sh’enji. Giene gishina Yesu wazuelele egi: “Wangumonyi ame wamonyi Tata.”—Yone 14:9.

16. Yesu walongesele itshi? Malongo a Yesu akatugile gudi nanyi?

¹⁶ Athu avula akhadile gutamega Yesu egi “Mulongeshi.” (Yone 1:38; 13:13) Mukatshi dia malongo a ndando alongesele Yesu, wazuelele “Lukuma luabonga lua Ufumu.” Ufumu wene, udi itshi? Udi guvernema wa Nzambi, mbawutuameza mavu agasue, mbawusuanguluisa athu ana gunemesa Nzambi. (Matayo 4:23) Milonga yagasue Yesu walongesele yakatugile gua Yehowa. Yesu wazuelele egi: ‘Ndaga ngudi mulongesa ishigo yami uvi yajile gudi Nzambi wangutumine.’ (Yone 7:16) Yesu wajiyile egi Yehowa wana gutshigina egi athu ajiye egi Ufumu wa Nzambi mbawutuameza mavu.

17. Yesu wakhadile gulongesa mafundo atshi? Mukunda natshi wakhadile gukalagala ngolo ha gulongesa athu?

¹⁷ Yesu wakhadile gulongesa mu mafundo atshi? Mafundo agasue akhadile gumona athu. Wakhadile gulongesa mu tumembo tuazonda, mu membo akoma, mu bavile, mu isalo, mu mafundo athu akhadile mukombelela, nu mu jinzo jia athu. Wakhadilego gunengenena egi athu aze gudi muene. Uvi, muene wakhadile guya gu membo awo. (Mako 6:56; Luka 19:5, 6) Yesu wabalegesele tangua nu ngolo jiavula ha gulongesa athu. Mukunda natshi? Handaga wajiyile egi Nzambi udi mutshigina egi akalagale luholo luene, wakhadile nji gunemesa Sh’enji. (Yone 8:28, 29) Yesu wakhadile luko gulongesa handaga wakhadile guvila athu khenda. (Tanga Matayo 9:35, 36.) Wakhadile gumona egi mafumu a mangumba akhadilego gulongesa giamatshidia gia Nzambi nu gia Ufumu wenji. Hene atshiginyile gukuatesa athu avula avue lukuma luabonga.

18. Makalegelo atshi abonga a Yesu wana gutshigina muavula?

 ¹⁸ Yesu wakhadile guzumba athu nu guavila khenda. Wakhadile guzuela nu muthu wagasue. Nu ana azonda akhadile gutshigina gukhala nenji. (Mako 10:13-16) Yesu wakhadile muabonga nu muthu wagasue. Atshiginyilego gabatshi’akano (corruption) nu milonga yabola. (Matayo 21:12, 13) Yesu wajingile ha sungi akhetu akhadilego nu ndando, akhadilego gunemesewa. Uvi Yesu wakhadile gunemesa akhetu. (Yone 4:9, 27) Yesu wakhadile nu gudibulumuna. Ngueze imoshi wawevele malu a alandudi enji, uvi yakhadile ginemo gia enya midimo.—Yone 13:2-5, 12-17.

19. Itshi yamonesa egi Yesu wajiyile ndaga jiakhadile gusagesa athu, watshiginyile nji guakuatesa?

¹⁹ Yesu wajiyile ndaga jiakhadile gusagesa athu, hene watshiginyile guakuatesa. Wayimonesele muabonga tangua wakadigile ngolo jia Nzambi ha gusaga athu mu njila ya milonga ya gushimana. (Matayo 14:14) Lusugu luko muenya hute mumoshi wayile gudi Yesu, wazuelele egi: “gula watshigina wajiya gungusaga.” Gikenene giakuatele Yesu mukunda nu lamba dia muthu muene. Wamuvuidile khenda nu watshiginyile gumukuatesa. Hene Yesu wasununuile koko, wamukuata, wamuwambela egi: “Ngatshigina ukhale wagusagewa.” Muthu muene wasagewe! (Mako 1:40-42) Tangiza luholo muthu muene wadivile.

20, 21. Luholo lutshi Yesu wahanele gifezegeselo giabonga gu mulonga wa gutumagela Yehowa?

²⁰ Yesu wahanele gifezegeselo giabonga gu mulonga wa gutumagela Yehowa. Yesu wakhadile gushila Sh’enji mutshima tangua diagasue, nga tangua mbalagaji  jienji jiamukalegele gubola. Yesu akalegelego masumu tangua Satana ajile gumulola. (Matayo 4:1-11) Enya fami ya Yesu ako akhadilego gutshigina egi Yesu muene Masiya, akhadile guzuela egi “wasaluga,” uvi Yesu walandudile gukalagala mudimo wa Nzambi. (Mako 3:21) Tangua mbalagaji jiamukalegele gubola, Yesu gaavutudilego gubola, uvi walandudile gushila Nzambi mutshima.—1 Phetelo 2:21-23.

²¹ Yesu wafile gufua gua lamba, uvi walandudile gushila Yehowa mutshima. (Tanga Filiphi 2:8.) Tangiza lamba diamonele Yesu lusugu lua gufua guenji. Amukuatele, amumbidile mambo egi wakhadile gushinga Nzambi, manzuji a mambo amufishile milonga, athu avula akhadile gumulela tola, gusuga masuta amumonesele lamba diavula, gungima, amukhokhele misumadi  ha mutshi. Ha gufua nguenji wakalulugile egi: “Ndaga yagasue yahua!” (Yone 19:30) Gungima dia gufua guenji, Yehowa wamufuzumuishile, enji wamuhanele muila wa nyuma. (1 Phetelo 3:18) Phoso jiazonda gungima, Yesu wavutugile mu dilu, ‘muene wayile muditumbiga gu koko dia madia dia Nzambi,’ ha gunenga egi Nzambi amubuise Fumu.—Hebelu 10:12, 13.

22. Luholo Yesu wakhadile gushila sh’enji mutshima luatukuatesa ha gukhala nu felala ditshi?

²² Gula mangino tudi nu felela dia guheta lujingu lua ivo nu ivo, luholo Yehowa wazuelele, idi mukunda Yesu wakhadile gushila sh’enji mutshima. Mu mukhapho walandula, mbatuzuelela luholo gufua gua Yesu guajiya gutukuatesa ha guheta lujingu lua ivo nu ivo.