1, 2. Muhu utshi udi naye gudihula? Mukunda natshi udi naye gudihula muhu wene?

GULONGUGA guaye gua Biblia guagukuatesa ha gujiya egi athu avula ana guzuela mangino egi ana gukombelela Nzambi uvi ana gukalagala ndaga Yehowa wana gutuna. (2 Kolinto 6:17) Giene gishina Yehowa wana gututoga egi tuzoge mu ikombelelo ya mambo, “Babilona Diakoma.” (Yatuwuwe 18:2, 4) Itshi wajiya gukalagala? Muthu nu muthu udi naye gutomba gila watshigina guzoga nga ndo. Tudi naye luko gudihula egi, ‘Ngudi naye gukombelela Nzambi luholo muene wana gutshigina nga gumukombelela luholo luagasue ngatshigina?’

² Gila watunyile gale gikombelelo gia mambo, idi desizio diabonga. Uvi, guajiya gukhala nu makalegelo nga mishambo iko ya ikombelelo ya mambo, yana gugusuanguluisa muavula uu nu mangino. Tuzuelele makalegelo nu mishambo iko nu gishina tudi naye gujitadila luholo Yehowa wana gujitadila.

3. (a) Mukunda natshi athu ako ajiya gumona lamba ha gubemba gukalegela isongo mu gukombelela guawo? (b) Itshi Biblia yazuela mukunda nu gukalegela isongo ha gukombelela Nzambi?

³ Ha gukombelela Nzambi athu ako ana gukalegela isongo nga ima iko mu jinzo jiawo. Gila aye nji wana guyikalagala, wajiya gumona gifua gubemba isongo ha gukombelela Nzambi idi ndaga yabola. Uvi ujimbilago egi Yehowa wana gutulongesa luholo lua gumukombelela. Biblia yana gutuwambela haphelo egi Yehowa anago gutshigina egi tukalegele  isongo mu gukombelela guetu.—Tanga Guzoga 20:4, 5; Ngimbo 115:4-8; Yeshaya 42:8; 1 Yone 5:21.

4. (a) Mukunda natshi tushigo naye gukombelela akhakha etu? (b) Mukunda natshi Yehowa awambelele akombeledi enji egi alodigo guzuela nu athu afile gale?

⁴ Athu ako ana gukalagala yagasue ha gusuanguluisa akhakha awo afile gale. Ako ajiya nji gukombelela akhakha ene afile gale. Uvi tualongugile egi athu agufua ajiyilego gutukuatesa nga gutukalagala gubola. Ashigo luko ndo nu lujingu. Gulola guzuela nu athu afile gale gudi ndaga yabola, mukunda ndaga yagasue wajiya gutangiza gifua yakatuga gua phangiaye wafile gale, yajiya gukatuga diago gua bademo. Gishina giene, Yehowa wawambelele enya Isalele egi alodigo guzuela nu athu afile gale nga gudinginyisa mu ndaga jia bademo.—Mikhuala 18:10-12; tala Malongo 26 nu 31 gu gisugishilo gia mukanda.

5. Itshi yajiya gugukuatesa ha gubemba gukalegela isongo nga akhakha ha gukombelela Nzambi?

⁵ Itshi yajiya gugukuatesa ha gubemba gukalegela isongo nga akhakha ha gukombelela Nzambi? Udi naye gutanga Biblia nu gutadila muabonga matangi a Yehowa mukunda nu ndaga jiene. Yehowa wana “gutuna,” ndaga jiene, wana gujimona gifua ndaga jiawusala. (Mikhuala 27:15) Kombelela Yehowa tangua diagasue agukuatese ha gutadila ndaga luholo muene wana gujitadila, nu ha gumukombelela luholo muene wana gutshigina. (Yeshaya 55:9) Wajiya gusha mutshima egi Yehowa mbawuguhana ngolo udi najio funu ha gubemba ndaga yagasue yana gudivua nu gikombelelo gia mambo.

6. Mukunda natshi atombele date ya le 25 Desambre ha gukalagala fete ya guvalewa gua Yesu?

⁶ Mu ifutshi yagasue, Nowele yakhala fete yakoma athu ana gukalagala, athu avula ana gutangiza egi idi fete ya guvalewa gua Yesu. Uvi Nowele yana  gudivua nu ikombelelo ya mambo. Mukanda umoshi wana gukotelesa ndaga (encyclopedie) wazuela egi mu gifutshi gia Loma, aphaganu akhadile gukalagala fete ya guvalewa gua tangua mu date ya 25 Desambre. Mafumu a ikombelelo atshiginyile egi aphaganu avula abue aklisto, hene azudile desizio dia gukalagala fete ya guvalewa gua Yesu mu date yene. Uvi Yesu avalewego mu date ya 25 Desambre. (Luka 2:8-12) Alandudi a Yesu akhadilego gukalagala fete ya Nowele. Mukanda umoshi (Les origines sacrées de choses profondes) wazuela egi ivo gubalega 200 gungima dia guvalewa gua Yesu, “gushigo nu muthu wakhadile gujiya dati diavalewe Yesu, athu phamba azonda akhadile guzuelela tangua dia guvalewa guenji.” Fete ya Nowele yasendesele gukadigiwa ivo khama jiavula gungima dia Yesu.

7. Mukunda natshi akombeledi a giamatshidia anago gukalagala fete ya Nowele?

⁷ Athu avula ana gujiya egi Nowele nu mishambo yayo ya gudihana bakado yakatugile gudi aphaganu. Mu ginono, enya dimbo dia Angletere nu enya ifutshi iko ya gu Amerika, akhadilego gukalagala fete ya Nowele, handaga yakatugile gudi aphaganu. Muthu wagasue wakhadile gukalagala fete yene, akhadile gumuhana ndola. Uvi, mu ifutshi yene athu asendesele gale gukalagala fete yene. Mukunda natshi akombeledi a giamatshidia anago gukalagala fete ya Nowele? Handaga ana gutshigina gusuanguluisa Yehowa mu ndaga jiagasue ana gukalagala.

8, 9. Mukunda natshi aklisto ana gutuna gukalagala fete ya lusugu lua guvalewa?

⁸ Fete iko athu avula ana gutshigina idi fete ya lusugu lua guvalewa guawo. Aklisto adi naye gukalagala fete ya lusugu lua guvalewa ba? Biblia yazuelela phamba fete mbadi jia lusugu lua guvalewa, athu ayikalegele akhadilego  akombeledi a Yehowa. (Gisendeselo 40:20; Mako 6:21) Fete ya lusugu lua guvalewa yakhadile gukalegewa ha gutumbuisa nzambi jiamambo. Giene gishina Aklisto athomo akhadile “guzuela egi fete ya lusugu lua guvalewa gua muthu idi mushambo w’aphagano.”—The World Book Encyclopedia.

⁹ Mu tangua dikulu enya gifutshi gia Loma nu gia Greki akhadile mutangiza egi muthu wagasue ha guvalewa guenji, nyuma imoshi yana gutala, yana gumubamba mu lujingu luenji luagasue. Mukanda umoshi wana guzuelela ndaga jia fete ya masugu a guvalewa “Les traditions des anniversaires (angl.)” yakotelesa egi: “Nyuma yene yakhadile gudivua nu nzambi mumoshi wavalewe nji lusugu luene.”

10. Mukunda natshi mangino Aklisto ana gutuna gukalagala fete ya lusugu lua guvalewa?

¹⁰ Watangiza egi Yehowa wana gutshigina fete jiana gudiva nu gikombelelo gia mambo ba? (Yeshaya 65:11, 12) Ndo. Gishina giene tuana gutuna gukalagala fete ya lusugu lua guvalewa nga fete jiko jiana gudivua nu gikombelelo gia mambo.

11. Mukunda natshi athu ako ana gukalagala fete? Ufuta utshi udi naye gubamba muabonga gubalega?

¹¹ Athu ako ana gujiya egi feti ya Nowele nu fete jiko jiakatugile gudi aphagano, uvi ana gulandula gujikalagala. Ana gumona egi didi phamba tangua dia gusuanguluga nu enya fami jiawo. Aye nji wana gutangiza luholo luene ba? Gubalegesa tangua nu enya fami yaye gushigo ndaga yabola. Yehowa mufugi wa fami, wana gutshigina egi tudive muabonga nu enya fami yetu. (Efeso 3:14, 15) Uvi, ha fundo dia gukalagala fete jia mangumba a mambo mukunda nu gusuanguluisa aphangietu, tudi naye gubamba ufuta wetu nu Yehowa. Gu ndaga yene mupostolo Pholo wazuelele egi: “Mulole gukhaphumuna idi musuanguluisa Fumu.”—Efeso 5:10.

12. Itshi yajiya gukalagala egi Yehowa atune fete imoshi?

 ¹² Athu avula ana gutangiza egi gujiya fundo fete jiakatuga gushigo nu funu, uvi Yehowa anago gutangiza luholo luene. Yehowa anago gutshigina fete jiakatuga mu ikombelelo ya mambo nu fete jiana gutumbuisa athu nga ifutshi. Enya gifutshi gia Ejipitu akhadile mukalagala fete jiavula mukunda nu nzambi jiawo jia mambo. Hazogele anya Isalele mu uhiga gu Ejipitu, azudile khadilo dia enya Ejipitu. Lusugu lumoshi, akalegele fete y’aphagano, ayitamegele egi ‘fete ya Yehowa.’ Uvi Yehowa waahanele ndola gu ndaga yene. (Guzoga 32:2-10) Luholo profete Yeshaya wazuelele, tushigo naye gukuata “gima giabola gia usala.”—Tanga Yeshaya 52:11.

13. Mihu itshi wajiya gudihula gila wazula desizio dia gubemba gukalagala fete jiko?

¹³ Gila wazula desizo dia gubemba gukalagala fete jiko, wajiya gudihula mihu gifua: Itshi ngajiya guwambela mafut’ami a mudimo gila anguhula egi mukunda natshi ngana gutuna gukalagala nawo fete ya Nowele? Itshi ngajiya gukalagala gila muthu mumoshi wanguhana kado ya Nowele? Itshi ngajiya gukalagala gila mukaji’ami nga mulumi’ami wanguwambela egi tukalagale fete? Luholo lutshi ngajiya gukuatesa an’ami ha gula gikenene giakuatshigo mukunda ashigo gukalagala fete ya lusugu lua guvalewa guawo nga fete jiko?

14, 15. Itshi wajiya gukalagala gila muthu mumoshi waguwambela egi: “fete yabonga” nga waguhana kado?

¹⁴ Tangua dia guhana mvutu gu mihu yene, idi muabonga egi utangize thomo ndaga wajiya guzuela. Gila muthu waguwambela egi: fete yabonga! Ushiko naye guhena tedie. Wajiya gumuvutudila egi, “Mersi.” Uvi gula wamona egi muthu muene udi diago nu funu ya gujiya ndaga jiavula jiatadila fete yene, wajiya gumukotelesela gishina wanago guyikalagala.  Hakiene, khala tangua diagasue nu gisemo, zuela nu gutema guagasue, nemesa athu. Biblia yazuela egi: ‘Mbimbi jienu jikhale jiatagana nu jisuanguluise adi mujivua masugu agasue. Ngenyi mbamujiya luholo lua guhana mvutu gudi muthu wagasue.’ (Kolosai 4:6) Tangua diko wajiya gukotelesela muthu muene egi wana gusuanguluga gubalegesa tangua nu athu ako nga guahana kado, uvi wana gutuna guyikalagala mu sungi jia fete.

¹⁵ Itshi wajiya gukalagala gila muthu waguhana kado? Biblia yanago gutuwambela ndaga yagasue tudi naye guzuela, uvi yazuela egi tudi naye gukhala nu matangi abonga. (1 Timote 1:18, 19) Tangua diko muthu udi guguhana kado ashigo gujiya egi eye wanago gukalagala fete yene. Muthu muene wajiya guzuela egi, “Ngajiya egi wanago gukalagala fete, uvi ngatshigina guguhana kado eyi.” Gila waguwambela ngenyi, wajiya guzula desizio dia gutshigina kado yene nga ndo. Uvi desizio diagasue wajiya guzula, dizule nu matangi abonga. Tuana tshiginago gukalagala ndaga jiajiya gubolesa ufuta wetu nu Yehowa.

16. Itshi wajiya gukalagala gila enya fami yaye atshigina gukalagala fete jiawo?

¹⁶ Itshi wajiya gukalagala gila enya fami yaye atshigina egi akalagale fete imoshi? Ushigo naye gudinana nawo. Ujimbilago egi, adi nu luendu lua guditombela ndaga ajiya gukalagala. Monegesa gusuanguluga, nemesa desizio diawo luholo wana gutshigina egi anemese badesizio aye. (Tanga Matayo 7:12.) Uvi itshi wajiya gukalagala gila enya fami yaye atshigina egi ukalagale nawo fete yene? Gutuama diaguzula desizio, toga Yehowa agukuatese ha guzula desizio dia bonga. Tangiza muabonga mulonga wene, kamba matangi ako mu mikanda ha mulonga nu ndaga yene. Ujimbilago egi udi naye gutumagela Yehowa tangua diagasue.

17. Itshi wajiya gukalagala ha gukuatesa an’aye ha gula akhadigo nu gikenene tangua didi ako gukalagala fete?

 ¹⁷ Itshi wajiya gukalagala ha gukuatesa an’aye tangua adi gumona athu ako gukalagala fete? Tangua nu tangua wajiya guasuanguluisa mu luholo lumoshi ashigo gutangiza. Wajiya luko guahana kado. Jiya egi gubalegesa tangua nu an’aye nu guamonesela guzumba guaye, gudi nu ndando yavula.

18. Mukunda natshi tudi naye guya mu gudibungisa gua Uklisto?

¹⁸ Ha gusuanguluisa Yehowa, tudi naye gutuna ikombelelo ya mambo nu mishambo nu fete jiana gudivua nu ikombelelo yene. Tudi naye luko gukalegela malongo a gikombelelo gia giamatshidia. Luholo lutshi? Tuajiya guyikalagala hatudi muya tangua diagasue mu gudibungisa gua Uklisto. (Tanga Hebelu 10:24, 25.) Gudibungisa gudi gitshinyi gia ndando gia gikombelelo gia giamatshidia. (Ngimbo 22:22; 122:1) Tangua tuana gudibungisa, tuajiya gudihana gikhesa.—Lomo 1:12.

19. Mukunda natshi guwambela athu ako giamatshidia walongugile mu Biblia gudi nu ndando?

¹⁹ Luholo luko lua gukadigila gikombelelo gia giamatshidia ludi guwambela athu ako ndaga tualongugile jidi mu Biblia. Athu avula ana guvua gikenene mukunda nu ndaga jiabola jidi gukadigiwa ha mavu. Tangua diko umujiya athu ako ana guvua gikenene mukunda nu ndaga jiene. Awambele felela diabonga udi nadio mukunda nu masugu adi muza. Gila udi muya mu gudibungisa gua Uklisto, luko udi muwambela athu ako giamatshidia gidi mu Biblia, mbawumona egi ushiko naye luko guya mu gikombelelo gia mambo nga gukalagala mishambo yagio. Jiya egi mbawusuanguluga enji Yehowa mbawugushimbiga gu ngolo udi gukalagala ha gumukombelela luholo luabonga.—Malaki 3:10.