Gungima dia ulo wa gu Kana, Yesu wayile gu Kaphelenauma. Mariya nu aphangi’a Yesu a mala—Yakoba, Yozefe, Simona nu Yuda—ayile n’enji.

Uvi, mukunda natshi Yesu wayile gu Kaphelenauma? Dimbo edi diakhalele ha fundo diabonga gubalega Nazaleta nu Kana, diakhalele nji diakoma. Luko, athu avula abuile alandudi a Yesu, akhalele mujinga gu Kaphelenauma nga hehi nu dimbo diene. Hene, Yesu waahanele formasio mu dimbo diawo.

Hakhalele Yesu gu Kaphelenauma, wakalegele ndaga jiavula jia gushimana. Hene, athu avula a mu dimbo diene, nu a mu membo a hehi, avuile lukuma lua ndaga jia kalegele Yesu. Uvi Yesu nu alandudi enji, anyi akhalele enya Yuda, akhalele naye guya gu Yelusalema mukunda nu wano wa Pake wa givo 30 gia tangua dietu.

Tangua alandudi enji akhalele mu tempelo gu Yelusalema, amonele ndaga imoshi ya kalegele Yesu yaayitugishile. Ndaga yene yakhalele ya gudisha nu eji amonele thomo.

Mukhuala wa Nzambi wakhalele mutoga enya Isalele ha guhana milambu ya shitu mu tempelo. Luko, athu akhalele mukatuga gualeha, akhalele nu funu ya ima ya gudia mu masugu akhalele ene gu Yelusalema. Hene, Mukhuala wakhalele mutoga athu akhalele mukatuga mu mafundo a gualeha ha gubata makuta a gusumba “ngombe, gimeme, khombo,” nu ima iko akhalele nayo funu. (Mikhuala 14:24-26) Uvi, asumbishi a ima a gu Yelusalema akhalele musumbisa shitu nu tunjila mukatshi dia tempelo. Luko, akhalele muhuiga athu, nu guaadigila ima mu ndando yakola.

Hene, Yesu wavile khabu jiakola, wabunduile mbongo jia asombegeshi, wasendumuine mesa awo, wakayele athu ene mu tempelo. Gungima, Yesu wazuelele egi: “Katudienu ima eyi haha. Mubuishigo nzo ya Tata inzo ya mumbungu!”—Yone 2:16.

Tangua alandudi a Yesu amuenene ndaga eyi, awungulugile profesi imoshi yakhalele muzuelela Mun’a Nzambi egi: “Gikhesa mukunda nu inzo yaye mbagilemuga mu mutshima wami gifua tshuya.” Uvi, enya Yuda amuhudile egi: “Gijiyishilo gitshi wajiya gutudijiga hagula esue tujiye egi udi nu uhinyinyi wa gukalagala ndaga eji?” Yesu waadijigile egi: “Muangenu tempelo eyi, ngenyi mbanguyitunga luko mu masugu thathu.”—Yone 2:17-19; Ngimbo 69:9.

Enya Yuda atangijile gifua Yesu wakhalele muzuelela tempelo ya Yelusalema. Hene, amuhudile egi: ‘Tempelo eyi yatungiwe mu ivo 46, aye mbawuyitunge mu masugu thathu ba?’ (Yone 2:20) Uvi, Yesu wakhalele muzuelela muila wenji gifua tempelo. Ivo thathu gungima, alandudi enji a wungulugile mbimbi eji tangua Yesu wafuzumugile.