Gungima dia gubatijiwa gua Yesu gudi Yone, nyuma ya Nzambi yamutuamezele mu mavu a luselenga a Yudea. Yesu wakhalele nu ndaga jiavula jia gutangiza. Hakhalele Yesu mubatijiwa, ‘dilu diakangugile.’ (Matayo 3:16) Ngenyi, watangijile ndaga jia longugile nu jiakalegele muene gosa mu dilu. Yadiago, Yesu wakhalele nu ndaga jiavula jia gutangigiza!

Yesu wabalegesele masugu 40 nu phipha 40 mu mavu a luselenga. Mu masugu anyi agasue, gadilego nga gima gimoshi ndo. Hene, tangua Yesu wakhalele nu nzala yakola, Satana wajile gumulola, wamuwambelele egi: “Gula aye udi mun’a Nzambi, wambela seso eji jibue mahindo a mapha.” (Matayo 4:3) Yesu wajiyile egi gukalagala ndaga jia gushimana mukunda nu gutagenesa nzala jienji guakhalele ndaga yabola diago. Hene, watunyine gulolewa gua Satana.

Diabulu gabembelego ndo. Wamulolele luko. Wawambelele Yesu ha gukatuga gosa holu dia tempelo ha gubua hashi. Uvi, Yesu watunyine gukalagala ndaga eyi ya gushimana. Yesu wamuwambelele ndaga jia sonegele ngambi jia Nzambi, ha gumonesa egi guphaga Nzambi mu luholo lunu gudi ndaga yabola diago.

Mu gulolewa gua thathu, Diabulu wamudijigile “ma ufumu agasue a ha mavu nu gutumbuga guawo,” enji wamuwambelele egi: “Ima eyi yagasue mbanguguhua nayo gula wangufugamena ha mabongo ha gungukombelela.” Luko, Yesu watunyine nu mutshima umoshi, wazuelele egi: ‘Katuga, Satana!’ (Matayo 4:8-10) Gabembelego egi gulolewa gumutume ha gukalagala ndaga yabola handaga wakhalele mujiya egi Yehowa phamba tudi naye gutshitshila mudimo wa gijila. Yadiago, Yesu watombele gusala wagujinginyina gudi Nzambi.

Tuajiya guzula malongo mu ndaga jiatagenele najio Yesu, nu mvutu gahanele Satana. Gulolewa gunu guakhalele gua giamatshidia diago, guamonesele egi Diabulu gashigo matangi abola ana gukhala mu mitshima ya athu gifua luholo athu ako ana gutangiza. Udi muthu wa diago, yonu ganago gumonega. Lumene elu ludi mumonesa luko egi ma ufumu a ha mavu awa adi ha mago a Diabulu. Muene wana guatuameza. Luholo lutshi nji ndaga Satana wahanele Yesu jiakhalele gulolewa gua giamatshidia?

Luko, Diabulu wazuelele egi gula Yesu wa mukombelela, mbawumushimbiga diago, mbawumuhana ma ufumu agasue a ha mavu. Diabulu wajiya nji gutulola mu luholo elu. Wajiya gutumonesa ndaga jiajiya gutuphaga ha guheta lutumbu, ginemua, nga umonyi wa ha mavu awa. Tuana gumonesa gutema tangua tuana gulandula gifezegeselo gia Yesu ha gusala agujinginyina gudi Nzambi ngatshima tualolewa luholo lutshi. Uvi wunguluga egi Diabulu wabembele Yesu “uu nu mu tangua diko.” (Luka 4:13) Yajiya gukhala luholo lumoshi nu esue, hene tudi naye gukhala tuatema tangua diagasue.