Gungima dia gukalagala wano wa Pake mu sungi ya printemps, mu givo 30 gia tangua dietu, Yesu nu alandudi enji akatugile gu Yelusalema. Uvi, avutugilego giphungu gimoshi gumbo diawo gu Galile. Ayile gu gifutshi gia Yudea, enji abatijile athu avula guene. Yone Mubatiji wakhalele nji mukalagala mudimo wa luholo elu givo gimoshi giabalega gale. Luko, yajiya gukhala egi alandudi enji ako akhalele n’enji gu Muta wa Yordani.

Yesu hakhenji gabatijilego nga muthu mumoshi. Watumine alandudi enji ha gubatiza athu. Mu tangua dinyi dia mudimo wa Yesu, muene nu Yone akhalele mulongesa enya Yuda anyi abalumuine mitshima mu gubola guawo mukunda nu gikotelo gia Mukhuala wa Nzambi.—Makalegelo 19:4.

Uvi alandudi a Yone avile giphi; hene ayile mufunda Yesu gudi Yone egi: ‘Muthu munu [Yesu] wakhalele n’enji . . . udi mubatiza athu, enji athu agasue adi muya gudi muene.’ (Yone 3:26) Uvi Yone gavilego giphi. Wasuangulugile mukunda nu mudimo wabonga wakhalele mutshita Yesu. Watshiginyine egi alandudi enji asuanguluge nji. Yone waawambelele egi: “Enue hakhenu mudi mathemua a mbimbi ngazuelele egi, ‘Ngushigo Klisto, uvi ngatumiwe gutuama dienji.’” Waahanele gifezegeselo giakuatesele ha gukotelesa ndaga yene muabonga. Wazuelele egi: “Muthu udi muzula mukhetu mu ulo, muene mulumi’a mukhetu muene. Uvi gula futa dia muthu udi muzula mukhetu mu ulo wavua dijui dia futa dienji, wana gusuanguluga muavula diago ha guvua dijui dia muthu udi muzula mukhetu mu ulo. Hene gusuanguluga ngudi nago gudi guatagana diago.”—Yone 3:28, 29, NW.

Yone wakhalele gifua futa dia muthu wazudile mukhetu mu ulo. Mbeji jiazonda jiabalega, wasuangulugile tangua galezele alandudi enji gudi Yesu. Alandudi enji ako ahatele Yesu, gungima ambiwe maji mu nyuma ya Nzambi. Ngenyi, Yone watshiginyile egi alandudi enji gakhalele nawo, ahate Yesu. Yadiago, mudimo wa Yone wakhalele wa gulondega njila mukunda nu mudimo wa Klisto. Hene, Yone wazuelele egi: ‘Muene udi naye gukanduga, uvi ame ngudi naye gubulumuga.’—Yone 3:30.

Yone muko, yonyi wakhalele mukatshi dia alandudi a thomo a Yesu, wasonegele mukunda nu fundo dia katugile Yesu, nu ginemo giakoma adi nagio mu guhuluga gua athu. Wazuelele egi: ‘Muthu yonu wakatugile gosa wabalega athu agasue. . . . Tata wana guzumba Mona, enji wahanele ima yagasue ha mago enji. Muthu wana gusha gutshigina guenji gudi Mona udi nu monyo wa ivo nu ivo; uvi muthu gashigo mutumagela Mona mbagamonyigo monyo, uvi khabu jia Nzambi jidi n’enji.’ (Yone 3:31, 35, 36) Gigi giamatshidia gia funu athu adi naye gujiya!

Yone Mubatiji wazuelele egi ginemo nu mudimo wenji udi naye gubulumuga. Masugu azonda gungima, Fumu Helode wamukuatele. Helode wazanguile Helodiade, mukaji’a phangi’enji Filipho, enji wadizudile nenji mu ulo. Tangua Yone wazuelele ha meso a athu egi Helode wakalegele ndaga yabola, Helode wamumbile mu bologo. Havile Yesu egi Yone wambiwe mu bologo, muene nu alandudi enji akatugile mu Yudea, ‘ayile gu Galile.’—Matayo 4:12; Mako 1:14.