Masugu kumi gungima gua gukanduga gua Yesu gosa mu dilu, nyuma yabonga ya Nzambi yabulumugile gudi alandudi mu lusugu lua Pantekote. Ngenyi, yamonesele egi Yesu wavutugile diago gosa mu dilu. Gungima, ndaga iko yamonesele egi Yesu wayile gosa mu dilu. Matangua azonda gutuama egi mbalagaji jisonone mulandudi Etiene maseso handaga wakhalele mulongesa nu gujinginyina guagasue, muene wazuelele egi: “Tadienu, ngudi mumona dilu dia gutuwuga nu Mun’a muthu mumagana molu gu koko gua madia gua Nzambi.”—Makalegelo 7:56.

Hakhalele Yesu nu Sh’enji mu dilu, wanengenene egi amuwambele ndaga imoshi mbimbi ya Nzambi ya diangele guzuelela. Nyuma ya Nzambi yakuatesele Davidi ha gusonega egi: “Yehowa wawambelele Fumi’ami [Yesu] egi: ‘Khala haha gu koko guami gua madia uu nu nu tangua mbanguhaga mbalagaji jiaye goshi’a ikanzo yaye gifua gambata.’” Gula sungi ya gunengenena yahua, muene ‘mbawuya muhinyina mukatshi dia mbalagaji jienji.’ (Ngimbo 110:1, 2, NW) Uvi itshi Yesu wakhalele mukalagala mu dilu, hakhalele muene munengena egi tangua ditagane hagula aluise mbalagaji jienji?

Hungu dia Uklisto diasendesele mu givo 33 gia tangua dietu. Yesu udi gosa mu dilu, uvi wasendesele guhinyina nu gutuameza alandudi enji ambiwe maji mu nyuma. (Kolosai 1:13) Waatuamezele mu mudimo wa gulongesa, nu waalondegele mukunda nu ginemo mbaazangula mu masugu adi muza. Ginemo gitshi? Alandudi anyi mbaasala a gujinginyina uu nu gufua, mbaafuzumuga nu mbaakhala mafumu hamoshi nu Yesu mu Ufumu wa mu dilu.

Mumoshi mukatshi dia athu anyi mbaahinyina nu Yesu mu dilu udi Saula, wago wana gujiyiwa muavula mu jina dia enya Roma egi Pholo. Muene wakhalele muenya Yuda mumoshi wakhalele nu gikhesa giavula mukunda nu mikhuala ya Nzambi. Uvi wakhalele mulandula utuameji wabola wa mafumu a mangumba a enya Yuda. Hene, watshiginyile egi enya Yuda ashiye Etiene nu maseso. Gungima, luholo Saula “gabembelego gukanena alandudi a Fumu,” wayile gu Damase. Nganga-nzambi wakoma Kaife wamutumine ha gukuata alandudi a Yesu ha guavutula gu Yelusalema. (Makalegelo 7:58; 9:1) Uvi, hakhalele muene muya mu njila, muanya wakola wajile mu dilu, wamujietele, muene wabuile hashi.

 Dijui dimoshi diakatugile gosa, diazuelele egi: ‘Saula, Saula, mukunda natshi udi gungusagesa?’ Muene wahudile gamba: “Fumu, aye nanyi?” Dijui diene diabalumuine egi: “Ame Yesu udi musagesa.”—Makalegelo 9:4, 5.

Yesu wawambelele Saula ha gungina mu dimbo dia Damase ha gunengenena malongo ako, uvi yakhalele mutoga egi muthu muko aye nenji mu dimbo diene handaga muanya wakola wa mushiyile meso. Mu vizio iko, Yesu wamuenegene gudi mulandudi wenji mumoshi wakhalele mujinga mu dimbo dia Damase, jina dienji Anania. Yesu wawambelele Anania ha guya ha fundo dimoshi ngenyi ha gutagana nu Saula. Anania wavuile woma wa guya mutagana nenji, uvi Yesu wamuwambelele egi: “Ngatombi yala owu ha gungutshitshila mudimo mukunda nu gujiyisa jina diami gudi ifutshi iko, nu gudi mafumu ayo, nu gudi enya Isalele.” Meso a Saula akangugile, mu dimbo dia Damase, muene “wasendesele diago gulongesa mu ikombelelo yawo, muzuela egi Yesu udi Mun’a Nzambi.”—Makalegelo 9:15, 20

Yesu wakuatesele Pholo nu alongeshi ako ha gulandula gukalagala mudimo wasendesele muene. Nzambi washimbigile diago mudimo wene. Ivo hehi nu 25 gungima sendese tangua Yesu wamuenegene gudi Pholo mu njila ya Damase, Pholo wasonegele egi lukuma luabonga lua “longesewe gudi athu a ifutshi yagasue adi hashi dia dilu.”—Kolosai 1:23, NW.

Ivo yavula gungima, Yesu wamonesele mulandudi Yone vizio jiavula, jidi mu mukanda wa Yatuwuwe. Tuajiya guzuela egi mu njila ya vizio jiene, Yone wakhalele nu monyo, nu wamonele Yesu wavutuga mu ngolo jia Ufumu wenji. (Yone 21:22) ‘Mu njila ya nyuma yabonga, [Yone] wahetele mu lusugu lua Fumu.’ (Yatuwuwe 1:10) Tangua ditshi lusugu luene luasendesele?

Gulonguga gua profesi jia Biblia guamonesa egi “lusugu lua Fumu” luasendesele mu masugu etu. Mu givo 1914, Ita Yathomo ya Mavu Agasue (Première Guerre mondiale) yasendesele. Luko, sendese mu tangua dinyi, tudi mumona ita yavula, misongo yavula, nzala yakola, nu gudigita gua mavu. Ndaga eji nu ndaga jiko jiavula jidi mutagenesa diago “gijiyishilo” Yesu gahanele apostolo enji mu ndaga yatadila ‘gukhala guenji mu Ufumu’ nu ‘gisugishilo’ gia ndaga jia ha mavu awa. (Matayo 24:3, 7, 8, 14) Mangino, mudimo wa gulongesa lukuma luabonga lua Ufumu udi mukalegewa ha mavu agasue, ushigo mukalegewa phamba mu membo a uhinyinyi wa enya Roma.

Nyuma ya Nzambi yakuatesele Yone ha gumonesa ukoteleshi wa ndaga yene. Wazuelele egi: “Luenyelu, hugo dia guhuluga diaheta! Luenyelu Nzambi wadijiga ngolo jienji jia ufumu! Luenyelu Klisto wenji wadijiga uhinyinyi wenji.” (Yatuwuwe 12:10) Yadiago, Ufumu wa Nzambi mu dilu, walongesele Yesu ha mavu, udi ndaga ya giamatshidia!

Idi lukuma luabonga diago gudi alandudi agasue a Yesu a gujinginyina. Ajiya diago gutshigina nu mutshima umoshi mbimbi eji jia Yone: ‘Ngenyi suangulugenu, aye dilu nu enue muanakhalela guene. Uvi lamba dienu gudi aye mavu nu gudi aye kianga, ndaga ya Diabulu wabulumuga gale gudi enue nu khabu jiabala handaga muene wajiya gamba kumbi dienji diasala diazonda.’—Yatuwuwe 12:12.

Hakiene, Yesu gashigo luko wagukhala gu koko dia madia dia sh’enji ha gunengena. Henyaha, muene udi Fumu, udi muhinyina. Gualeha ndo, mbawushiya mbalagaji jienji jiagasue. (Hebelu 10:12, 13) Gubonga gutshi mbatuheta?