Hakatugile Yesu gu Yeliko, wayile gu Betaniya. Wakhalele naye gukanduga gamulundu ga ba kilometre hehi nu 20. Njila yene yakhalele yabola. Dimbo dia Yeliko diakhalele mu baba dia metre hehi nu 250, uvi dimbo dia Betaniya diakhalele ha mulundu wa ba metre hehi nu 610. Lazalo nu aphangi’enji a akhetu mbadi akhalele mujinga mu gadimbo gene ga Betaniya, gakhalele gu Este ya mulundu wa Olive; ha guheta gu Yelusalema muthu wakhalele naye guwenda ba kilometre hehi nu 3.

Enya Yuda avula akhalele ahetshi gale gu Yelusalema mukunda nu wano wa Pake. Adiangele guya ha gula “adiwobole ene hakhawo” gula akuatele muila wa mvumbi nga akalegele ndaga imoshi yaabuishile usala. (Yone 11:55; Lutango 9:6-10) Athu ako adiangelele guheta adibungishile mu tempelo. Akhalele gudihula gula Yesu umuza gu wano wa Pake.—Yone 11:56.

Athu akhalele muzuela ndaga jia gudisha mukunda nu Yesu. Mafumu a mangumba ako akhalele mukamba gumukuata ha gumushiya. Hene, awambelele athu egi gula ajiya fundo didi Yesu, adi naye guawambela ‘ha gula amukuate.’ (Yone 11:57) Masugu abalega, mafumu a mangumba akambele luholo lua gushiya Yesu handaga wafuzumuine Lazalo. (Yone 11:49-53) Gishina giene, athu avula akhalele mutangiza gifua Yesu gajiyilego guza fundo diakhalele athu avula.

Yesu wahetele gu Betaniya mu Lusugu lua Thano, ‘guasalele masugu asamano ha gula wano wa Pake usendese.’ (Yone 12:1) Lusugu luhe-luhe (Lusugu lua Guhuluguga, mu Nisana 8) luakhalele musendesa gungima dia gushiwuga gua tangua. Hene, wasugishile vuayaje yenji gutuama dia Lusugu lua Guhuluguga. Gakhalelego naye gukatuga gu Yeliko mu Lusugu lua Guhuluguga—gungima dia gutota gua tangua mu lusugu lua thano uu nu gungima dia gutota gua tangua gua lusugu lua samano—handaga mukhuala wa enya Yuda wakhalele mutunyisa guwenda njila yaleha. Yajiya gukhala egi Yesu wayile gumbodia Lazalo, gifua muakhalele khadilo dienji.

Simona nji wakhalele mujinga gu dimbo dia Betaniya, watamegele Yesu nu mafuta enji nu Lazalo ha gudia gumbo dienji mu lusugu lua Samano mu ngueze. Simona wakhalele mutamegewa egi “muenya hute,” yajiya gukhala egi wakhalele thomo nu hute, uvi Yesu wamusagele. Luholo Mata wakhalele muenya gikhesa wasendesele guhana Yesu nu alandudi enji ima ya gudia. Uvi, Mariya wakhalele mutegelela Yesu muabonga diago, ndaga yene yazolele matululu.

Mariya wakangudile mulondo wa ‘mananashi alondewe nu nado.’ (Yone 12:3) Mananashi ene akhalele a ndando yavula, akhalele mudigiwa mu ndando ya denye 300, yakhalele mutango wa mbongo jiakhalele mufutshiwa muthu mu givo gingoshi! Mariya wambile Yesu mananashi ene mu muto nu gu malu, gungima wamukukumuine malu nu sanga dienji. Inzo yazalele pha nu vumba diabonga dia mananashi.

Alandudi avile khabu, ahudile egi: “Mukunda n’atshi mananashi awa alaba guzangelewa ngenyi?”  (Mako 14:4) Yudasa wazuelele egi: “Mukunda n’atshi mananashi awa adigiwego mu denye 300 ha gukhaphela jiphutu?” (Yone 12:5) Yudasa gakhalelego diago nu gudisagesa mukunda nu jiphutu. Wakhalele mukuiya makuta akhalele mu caisse handaga muene wakhelele guyibamba.

Yesu wanginyidile Mariya, waahudile egi: ‘Itshi mudi musagesela mukhetu owu? Muene wangutshitshila ndaga yabalega gubonga. Handaga mudi nu jiphutu mu khatshi dienu masugu agasue, uvi mbamushigo mukhala nu ame masugu agasue. Tangua diamba muene mananashi awa mu muila wami, watshita ngenyi ha gungulonda mukunda nu gufundjiwa guami. Ngudi gumiwambela giamatshidia egi bugu diagasue didi mulongesewa lukuma elu luabonga ha mavu agasue, lumene lua ndaga yatshita muene, mbalutewa gifua giwungulugilo gienji.’—Matayo 26:10-13.

Yesu wabalegesele lusugu lua mudidi gu Betaniya, athu avula ajiyile egi udi mu dimbo diene. Enya Yuda avula ayile gumbo dia Simona. Ayilego phamba ha gutala Yesu, uvi ayile nji ha gumona Lazalo yago ‘[Yesu] wafuzumuine gu gufua.’ (Yone 12:9) Mafumu a nganga-nzambi adivile ha gushiya Yesu nu Lazalo. Mafumu ene a mangumba atangijile egi gufuzumuga gua Lazalo guakhalele mutuma athu avula ha gumonesa gutshigina gudi Yesu. Yadiago, mafumu ene akhalele diago nu mitshima yabola!