Gungima dia gufuzumuga guenji, Yesu wawambelele apostolo enji 11 ha gudimona nenji ha mulundu wa Galile. Alandudi enji ako akhalele nji hene, akhalele guvula hehi nu 500. Ako mukatshi diawo, akhalele thomo musha giphapha. (Matayo 28:17; 1 Kolinto 15:6) Uvi, ndaga jiazuelele Yesu mu tangua dinyi jiakuatesele agasue ha gutshigina egi muene udi diago nu monyo.

Yesu wazuelele egi Nzambi wamuhanele ngolo jiagasue mu dilu nu ha mavu. Hene, wawambelele alandudi enji egi: ‘Ndjienu, mubuise athu a mu ifutshi yagasue alandudi ami. Muabatize mu jina dia Tata nu dia mona nu dia nyuma yabonga. Mualongese ha gutumaga milonga yagasue ingamiwambelele.’ (Matayo 28:18-20) Yadiago, Yesu gakhalelego nu monyo, uvi wakhalele mutshigina egi alandudi enji alongese lukuma luabonga.

Yesu wahanele alandudi enji agasue—mala, nu akhetu, nu ana—mudimo wa gubuisa athu alandudi enji. Mbalagaji jiajiya gukamba guakanga njila ya gumuanga nu gulongesa lukuma luabonga. Uvi Yesu walayile gamba: ‘Nzambi wanguhuile ngolo jiagasue mu dilu nu ha mavu.’ Yakhalele mukotelesa itshi mukunda nu alandudi enji? Wawambelele egi: ‘Tadienu, ngudi nenu masugu agasue uu nu gu gisugishilo gia ndaga jia ha mavu awa.’ Yesu gakhalelego muzuela egi, athu agasue anyi mbaalongesa lukuma luabonga mbaakalagala ndaga jia gushimana. Uvi, nyuma yabonga mbayakuatesa mukuta wawo agasue.

Gungima dia gufuzumuga guenji, Yesu wamuenegene gudi alandudi enji “hakatshi dia masugu makumi awana (40).” Wakhalele musudiga muila wa muthu, wa luholo nu luholo “ha guaadijiga egi wakhalele nu monyo,” nu ha gualongesa ‘ndaga jiatadila Ufumu wa Nzambi.’—Makalegelo 1:3; 1 Kolinto 15:7.

Idi mumonega egi tangua apostolo akhalele gu Galile, Yesu wawambelele ha guvutuga gu Yelusalema. Tangua gataganele nawo gu Yelusalema, wawambelele egi: “Mukatugago mu Yelusalema, uvi khalenu munengena gutendelela gua Tata gungamiwambelele; handaga yadiago, Yone wabatijile athu mu meya, uvi enue mbamubatijiwa mu nyuma yabonga masugu azonga gungima.”—Makalegelo 1:4, 5, NW.

Gungima, Yesu wataganele luko nu apostolo enji. Wazogele nawo, “wayile nawo uu nu gu Betaniya,” yakhalele gu khanda ya esti ya Mulundu wa Olive. (Luka 24:50) Ngatshima Yesu wawambelele ndaga jiavula jiatadila guya guenji mu dilu, ene akhalele mutangiza gawo egi ufumu wenji mbawukhala ha mavu haha.—Luka 22:16, 18, 30; Yone 14:2, 3.

Apostolo ahudile Yesu gamba: “Fumu, aye mbawutuluisa ufumu wa Isalele luenyelu ba?” Muene wabalumuine egi: “Ishigo ndaga yenu ha gujiya indongo nu sungi jiahagewe gudi Tata mu uhinyinyi wenji.” Hangima, wawambelele luko mudimo adi naye gutshita. Wazuelele gamba: ‘Enue mbamuheta ngolo mbahamibulumugila nyuma yabonga ya Nzambi. Mbamukhala mathemua ami mu Yelusalema, nu mu Yudea yagasue, nu mu Samaliya uu nu gu gisugishilo gia mavu agasue.’—Makalegelo 1:6-8.

Apostolo akhalele nu Yesu ha Mulundu wa Olive tangua diasendesele muene gukanduga gosa. Tangua diazonda gungima, tuta dia mutshuigile, watotele. Tangua Yesu wafuzumugile, wamuenegene mu luholo lua gudisha, nu muila wa athu. Uvi henyaha, wabembelele muila wa athu, wasudigile muila wa mu nyuma hakhalele muene mukanduga mu dilu. (1 Kolinto 15:44, 50; 1 Phetelo 3:18) Hakhalele apostolo enji agujinginyina mutala gosa mu dilu, “mala muyadi agusudiga milele ilaphe” amaganene hehi n’awo. Mala ene akhalele anjelo asudigile muila wa athu. Ahudile apostolo gamba: “Enue enya Galile, itshi mudi mumagenena mutala gosa nonono? Yesu owu wazanguiwa mukatshi dienu ha guya mu dilu, mbawuvutuga luholo lumoshi, gifua luholo muamumonyi muya mu dilu.”—Makalegelo 1:10, 11, NW.

Athu ambilego milolo tangua Yesu akhalele muya mu dilu, phamba alandudi enji agujinginyina amonele.  Mbawuza nji “luholo lumoshi”—athu mbaambigo milolo, phamba alandudi enji agujinginyina mbaakotelesa gukhala guenji mu Ufumu.

Apostolo avutugile gu Yelusalema. Mu masugu anyi alanduile, adibungishile nu alandudi ako, ‘Mariya gin’a Yesu . . . nu aphangi’a Yesu a mala’ akhalele nji hene. (Makalegelo 1:14) Mukut’awo agasue akhalele mulandula gukombelela. Ndaga imoshi mukatshi dia ndaga akhalele mukalegela gisambu idi, gutomba mulandudi mumoshi mbawuhinganesa Yudasa Isakaliote, ha gutagenesa nomba ya apostolo 12. (Matayo 19:28) Akhalele nu funu ya mulandudi wamonele ndaga jiakalegele Yesu nu gufuzumuga guenji. Atele mubela ha gujiya gutshigina gua Nzambi. Egi giphungu gia gisugishilo Biblia idi muzuelela guta mubela. (Ngimbo 109:8; Ishima 16:33) Atombele Matiasi. Yajiya gukhala egi Matiasi wakhalele mukatshi dia alandudi 70 anyi Yesu watumine ha gulongesa lukuma luabonga, enji ‘amutangele mukatshi dia apostolo 11.’—Makalegelo 1:26.

Masugu kumi gungima dia guya gua Yesu mu dilu, Wano wa enya Yuda wa Pantekote ya givo 33 gia tangua dietu wasendesele. Alandudi hehi nu 120 adibungishile mu sugu imoshi ya gosa gu Yelusalema. Sagumugu, matululu gifua a funji yakola azalele monzo. Luko, dimi gifua dia tshuya diamuenegene ha muto wa muthu wagasue wakhalele hene. Alandudi agasue akhalele hene asendesele guzuela mu mazuelelo a gudisha. Nyuma ya Nzambi ya muangegene ha mito yawo gifua mualayile Yesu!—Yone 14:26.