Mu ngueze ya gisugishilo Yesu gabalegesele nu apostolo enji, wawambelele gamba: ‘Tangua mbangufuzumuga, mbangudiangela gutuama dienu gu Galile.’ (Matayo 26:32; 28:7, 10) Henyaha, alandudi avula akhalele muya gu Gulile. Uvi itshi mbaakalagala guene?

Lusugu lumoshi, Phetelo wawambelele alandudi ako samano egi: ‘Ngaya mulowa jishui.’ Mukuta wawo agasue musamano amuwambelele egi: “Nu esue nji, tudi muya nu aye.” (Yone 21:3) Uvi, phipha ya mudidi akuatelego nga ishui imoshi. Hakhalele mutsha gosa, Yesu wamuenegene gudi ene gu khulo ya kianga, uvi ene akhelelego mujiya egi yakhalele Yesu. Waahudile gamba: “Ana, mudi nu gima gia gudia ba?” Ene abalumuine egi: “Ndo!” Yesu wawambelele gamba: “Mbienu wanda gu khanda ya koko gua madia ya wato, mudi muheta jishui.” (Yone 21:5, 6, NW) Ambile wanda, nu akuatele jishui jiavula diago, akhalelego nu luholo lua gunana wanda wene handaga wakhalele wa guzala pha nu jishui.

Yone wawambelele Phetelo egi, “You udi Fumu!” (Yone 21:7) Giphungu gimoshi, Phetelo wasudigile mulele wenji wa gu thulo, handaga gakhalelego guwusudiga gula udi mulowa. Wadisononue mu kianga, wazuile ba metre 90 uu nu gu khulo ya kianga. Alandudi ako anyi akhalele mu wato alanduile mage-mage, akhalele munana wato wakhalele waguzala nu jishui.

Hahetele ene gonze, amuenene ‘makala a tshuya mulemuga nu jishui jia guhagewa holu diawo, nu mapha.’ Yesu wawambelele gamba: “Ijienu nu jishui jiko muakuata luenyelu.” Phetelo wananele wanda wakhalele nu jishui jiakoma 153! Yesu wawambelele egi: “Ijienu mudie.” Guakhalelego nga mumoshi mukatshi diawo nu gikhesa gia gumuhula egi, “Aye nanyi?” handaga ajiyile egi muthu muene udi Yesu. (Yone 21:10-12) Edi hugo dia thathu Yesu wamuenegene gudi alandudi enji avula.

Yesu wahanele mulandudi wagasue dipha nu ishui ha gudia. Gungima, yajiya gukhala egi watadile jishui jiakuatele alandudi, wahudile gamba: “Simona mun’a Yone, wana gunguzumba gubalega ima eyi ba?” Phetelo wakhalele muzumba muavula mudimo wenji wa gulowa jishui gubalega mudimo udi mutshigina Yesu egi akalagale ba? Phetelo wabalumuine gamba: “Ayi, Fumu, aye wajiya egi ngaguzumba.” Hene, Yesu wamuwambelele egi: ‘Bamba imeme yami.’—Yone 21:15.

Yesu wamuhudile luko gamba: “Simona mun’a Yone, aye wanguzumba ba?” Yajiya gukhala egi yasagesele Phetelo, hene wawambelele Yesu nu giamatshidia giagasue egi: “Ayi, Fumu, aye wajiya egi ngaguzumba.” Yesu wamuwambelele luko gamba: ‘Bamba imeme yami.’—Yone 21:16.

Yesu wamuhudile hugo dia thathu egi: “Simona mun’a Yone, aye wanguzumba ba?” Henyaha yajiya gukhala egi Phetelo wasendesele gudihula gula Yesu wakhalele diago gutshigina egi muene udi wa gujinginyina gudi Nzambi. Phetelo wazuelele nu gikhesa giagasue egi: “Fumu, aye wajiya ndaga jiagasue, wajiya egi ngaguzumba.” Luko, Yesu wawambelele Phetelo ndaga adi naye gukalagala. Wamuwambelele egi: ‘Bamba imeme yami.’ (Yone 21:17) Yadiago, aphangi adi mutuameza hungu adi naye gubamba muabonga athu anyi adi mubua imeme ya Nzambi.

Akuatele Yesu nu amushiyile handaga wakalegele mudimo wamutumine Nzambi ha gukalagala. Henyaha, wawambelele Phetelo egi ndaga ya luholo elu mbayimubuila nji. Yesu wazuelele egi: ‘Tangua wakhalele muvuala, wakhalele mudisudigisa muya, wakhalele muya guagasue guwakhalele mutshigina guya. Uvi tangua mbawubua muthu wa gukola, aye mbawusununa mago aye, muthu muko mbawugusudigisa muya nu mbawugutuala gu fundo diwudi ushigo mutshigina guya.’ Ikhale ngenyi, Yesu wamuhanele longo egi: “Hata gungulandula.”—Yone 21:18, 19, NW.

Phetelo watalele mupostolo Yone, wahudile gamba: ‘Fumu, uvi muthu owu giwa, ndaga yenji idi gutshi?’ Yadiago, itshi mbayibuila mupostolo wago Yesu wakhalele muzumba muavula? Yesu wabalumuine gamba: ‘Gula ngatshigina egi asale nu monyo uu nu tangua mbanguza, idi ndaga yaye ba?’ (Yone 21:21-23) Phetelo wakhalele naye gulandula Yesu, gakhalelego naye gudisagesa mukunda nu ndaga alandudi ako adi naye gukalagala. Ikhale ngenyi, Yesu wamonesele egi Yone mbawujinga muavula gubalega apostolo ako, nu mbawuheta vizio idi muzuelela guza gua Yesu mu Ufumu wenji.