Tangua diazonda gungima dia gubatijiwa guenji, Yesu wataganele nu mbalagaji mumoshi wakhalele nu felela dia gumubuisa gutuama egi muene asendese mudimo wenji wa gulongesa. Yadiago, Diabulu walolele Yesu mahugo avula. Gungima, Yesu wazuelele mukunda nu Diabulu egi: “Fumu wa ha mavu awa waza. Muene gashigo nu ngolo gudi ame.”—Yone 14:30.

Mupostolo Yone wamonele mu vizio ndaga jidi munengena ‘Delago yakoma, nyoga inyi ikulu yanatamegewa egi Diabulu nga Satana.’ Mbalagaji eyi ya athu mbayikayewa mu dilu, mbayikhala nji ‘nu khabu jiabala handaga idi mujiya gamba kumbi diamusala diazonda.’ (Yatuwuwe 12:9, 12) Aklisto adi nu gishina giabonga gia guzuela egi ene adi mujinga mu sungi ya ‘kumbi diene diazonda’ nu egi gualeha ndo ‘delago, nyoga inyi ikulu,’ mbayimbiwa mu wina udi ushigo nu gisugishilo, mbayikhadigo luko nu ngolo jia guhuiga athu mu sungi ya ivo 1 000 tangua Yesu mbagakhala muhinyina mu Ufumu wa Nzambi.—Yatuwuwe 20:1, 2.

Mu tangua diene, ndaga jitshi mbajikalegewa ha mavu? Akuatshi mbaajinga ha mavu, nu ndaga mbajikhala luholo lutshi? Yesu hakhenji wahanele kueteya gu mihu eyi. Mu gifezegeselo gahanele gia imeme nu khombo, wamonesele ndaga mbajibuila athu atagana anyi adi gifua imeme, ana gutumagela aphangi’a Klisto nu ana guaakalegela ndaga jiabonga. Wamonesele nji haphelo ndaga mbajibuila athu anyi adi gifua khombo, anago gukuatesa aphangi’a Klisto. Yesu wazuelele egi: “Athu awa [khombo] mbafua gufua gua ivo nu ivo, uvi athu abonga [imeme] mbaheta monyo wa ivo nu ivo.”—Matayo 25:46, NW.

Ndaga yene idi gutukuatesa ha gukotelesa mbimbi Yesu wawambelele nzangi yakhalele nenji hehi holu dia mutshi wa lamba. Yesu galayilego  ha guhana muthu muene gishimbigo galayile muene guhana apostolo enji agujinginyina, yakotelesa egi gishimbigo gia guhinyina nenji hamoshi mu Ufumu wa mu dilu. Uvi, Yesu walayile nzangi inyi yabalumuine mutshima egi: “Giamatshidia ngudi guguwambela mangino egi, mbawukhala nu ame mu Phaladiso.” (Luka 23:43) Ngenyi, muthu owu wabalumuine mutshima wahetele felela dia gujinga mu phaladiso: gilanga gimoshi giabonga diago. Mangino, athu adi mumonesa egi adi gifua imeme, anyi “mbaheta monyo wa ivo nu ivo,” mbakhala nji mu Phaladiso.

Idi gudivua diago nu ndaga jiazuelele mupostolo Yone egi mbajikhala ha mavu. Wazuelele egi: ‘Nzambi udi nu fundo dienji dia gukhalela mukatshi dia athu. Muene mbawukhalela mukatshi diawo, ene mbakhala athu enji. Nzambi hakhanji mbokhala n’awo, muene mbawukhala Nzambi wawo. Muene mbawukungula masoji agasue gu meso awo, gufua mbagukhadigo luko. Madilo gashigo mukhala luko nga mitataganyi nga gubala, handaga ndaga jia gudiangela jiahua.’—Yatuwuwe 21:3, 4.

Hagula egi nzangi yene ikhale nu monyo mu phaladiso, mbayitoga egi ifuzumuge. Ishigo phamba muene mbawufuzumuga. Yesu wayimonesele haphelo tangua gazuelele egi: ‘Kumbi didi muza athu agasue agufua adi mu ndumba mbavua dijui dienji, ene mbazuga mu ndumba jiawo. Athu atshitshile ndaga jiabonga mbazuga mukunda nu guheta monyo. Uvi athu atshitshile ndaga jiabola mbazuga mukunda nu gusophesewa.’—Yone 5:28, 29.

Uvi, itshi mbayitshita apostolo agujinginyina nu athu ako anyi mbakhala nu Yesu mu dilu? Biblia idi muzuela egi: ‘Ene mbakhala nganga-nzambi jia Nzambi nu jia Klisto, mbahinyina nenji ivo 1 000.’ (Yatuwuwe 20:6) Athu anyi mbabua mafumu hamoshi nu Klisto akhalele mujinga thomo ha mavu. Akhalele nji mala nu akhetu. Ngenyi, mbakhala mafumu amoshi a khenda, nu mbadihaga ha fundo dia athu anyi mbakhala ha mavu.—Yatuwuwe 5:10.

Yesu mbawukalegela mulambu wenji wa gibawu mukunda nu athu a ha mavu, mbawahuluisa gu gubola guahanele Adama. Muene nu athu anyi mbaahinyina nenji, mbakuatesa athu ha gubua athu atagana. Yadiago, athu mbaheta lujingu luabonga lualondele Nzambi gu gisendeselo mukunda nu ene tangua gawambelele Adama nu Eva ha guvuala ana nu guzalesa mavu. Gufua guabatele gubola guakalegele Adama mbagukhadigo luko nga hazonda!

Ngenyi, Yesu mbawutagenesa ndaga jiagasue jia mutogele Yehowa ha gutshita. Gu gisugishilo gia Uhinyinyi Wenji wa Ivo Ginunu, Yesu mbawuvutula Ufumu nu athu adi atagana gudi Sh’enji. Mukunda nu ndaga eyi yabonga idi mumonesa khadilo dia Yesu dia gudibulumuisa, mupostolo Pholo wasonegele gamba: “Tangua Nzambi mbawuhaga ima yagasue hashi dia Yesu, hangima mona mbawudihaga hashi dia muthu wago wahagele ima yagasue hashi dienji, hagula Nzambi akhale ima yagasue mukunda nu athu agasue.”—1 Kolinto 15:28, NW.

Yadiago, Yesu udi nu ginemo giakoma mu gutagenesewa gua mafelela abonga alayile Nzambi. Luko, tangua mafelela ene mbalandula gutagenesewa mayilago, mbimbi jiazuelele muene egi, “Ame ngudi njila, ngudi giamatshidia, nu ngudi monyo,” mbajitagenesewa diago.—Yone 14:6.