Yesu wamanesele gulongesa apostolo nguana holu dia Mulundu wa Olive, waahanele mvutu gu muhu wawo watadila gukhala guenji mu Ufumu nu gisugishilo gia ulondegi wa ndaga jia ha mavu awa.

Yesu watshitshile ndaga jiavula diago mu lusugu lua 11 Nizani! Yajiya gukhala egi tangua Yesu nu alandudi enji akhalele muya gu Betaniya ha gubanda, wawambelele apostolo enji egi: ‘Mudi mujiya egi guasala masugu ayadi hagula wano wa Pake wukalegewe, luko Mun’a muthu mbawuhanewa ha gushiyiwa ha mutshi wa lamba.’—Matayo 26:2.

Mu lusugu lua landuile, lusugu lua thathu, yajiya gukhala egi Yesu wabalegesele tangua hamoshi nu apostolo enji. Mu lusugu lua mbadi, wabalediele mafumu a mangumba, wamonesele nji mambo awo haphelo. Ene akambele gumushiya. Hene, mu lusugu lua 12 Nizani gadimoneselego ha meso a athu. Ngenyi, gabembelego egi nga gima gimoshi gimukange njila ya gukalagala wano wa Pake nu apostolo enji, gungima dia gushiuga gua tangua gua lusugu lualanduile, yakotelesa egi gu gisendeselo gia lusugu lua 14 Nizani.

Uvi mafumu a nganga-nzambi nu mambuta a athu ahenele ndo tedie gutuama egi wano wa Pake wukalagewe. Adibungishile mu luphango lua ngana-nzambi wakoma Kayafa. Mukunda natshi? Akhalele nu khabu handaga Yesu wamonesele haphelo egi ene adi enya mambo. Mu tangua diene, adibungishile, ayile giphungi ha “gukuata Yesu mu mafumbe ha gumushiya.” Luholo lutshi ajiya guyitshita, nu tangua ditshi ajiya guyikalagala? Azuelele egi: “Tushigo naye ya gumukuata mu masugu a wano, gula ndo yandazugisa matululu mukatshi dia athu.” (Matayo 26:4, 5) Avuile woma handaga athu avula akhalele musuanguluga nu Yesu.

Mu tangua diene, muthu mumoshi wayile mutala mafumu a mangumba. Adihudile ha gumona egi muthu muene udi mupostolo mumoshi wa Yesu, jina  dienji Yudasa Isakaliote. Satana wakhalele wanginyisa gale matangi mu mutshima wa Yudasa ha gudiga Fumi’enji! Yudasa waahudile gamba: “Mbamunguhua itshi gula ngahana Yesu mu mago enu?” (Matayo 26:15) Ene asuangulugile diago, hene adivuishile ha ‘gumuhua makuta.’ (Luka 22:5) Guvula gutshi? Adivuile ha gumuhana utadi 30 wa siliva. Utadi 30 wa siliva wakhalele ndando akhalele musumba muhiga. (Guzoga 21:32) Ngenyi, mafumu a mangumba aseguluile diago Yesu; amonesele nji egi Yesu gakhalelego diago nu ndando yavula. [1] Yudasa wasendesele “gukamba hugo diatagana ha guhana Yesu hagula thundu ya athu ijiyigo.”—Luka 22:6.

Lusugu lua 13 Nizani luasendesele mu lusugu lua thathu, gungima dia gushiguga gua tangua. Yakhalele nji phipha ya samano nu ya gisugishilo Yesu gabalegesele mu dimbo dia Bataniya. Mu lusugu lua landuile, akhalele naye gulonda ndaga jia gisugishilo mukunda nu wano wa Pake. Akhalele naye gukamba mon’a gimeme, yonu mbaashiya nu mbaawotshia wamudidi tangua lusugu lua 14 Nizani mbalusendesa. Gui Yesu nu apostolo enji mbaakalegela wano wa Pake? Nanyi mbawulondega ima yene? Yesu wakhalele khenji gazuelela gale ndaga eji. Hene, Yudasa gakhalelego nu luholo lua guwambela mafumu a nganga-nzambi ndaga eji.

Yajiya gukhala egi mu lusugu lua nguana gungima dia midi, Yesu watumine Phetelo nu Yone, wawambelele egi: “Ndjienu mutulondele wano wa Pake ha esue tudie.” Ene amubalumuine egi: ‘Watshigina esue tulonde wano wene gui?’ Yesu wawambelele gamba: “Tadienu, ha muangina mu dimbo, mbamutagana nu yala udi mubata bungu dia meya, mumulandule monzo yangina muene. Muwambele fumi’a inzo egi, ‘Mulongeshi udi guguhula egi: “Inzo ya ngenji inyi ngajiya gudia wano wa Pake nu alandudi ami idi gui?”’ Muene mbawumidijiga sugu yakoma, yagosa idi nu ima yagasue. Londegenu wano gu sugu yene.”—Luka 22:8-12, NW.

Idi naye gukhala egi muenya inzo inyi wakhalele nji mulandudi wa Yesu. Yajiya gukhale egi muene wadiangele gujiya egi Yesu mbawutoga egi wano wa Pake ukalegewe mu inzo yenji. Tangua apostolo anyi mbadi ahetele gu Yelusalema, asangele ndaga jiagasue gifua luholo Yesu gaawambelele. Amonele mon’a gimeme wa gulondega gale, nu fundo dia gulonda gale hagula Yesu nu apostolo enji 12 akalagale wano wa Pake.