Givo gimoshi nu ndambo giabalega gale sendese Yone Mubatiji wawambelele athu egi Yesu udi Mun’a Gimeme gia Nzambi. Tangua Yesu wasendesele mudimo wenji wa gulongesa, athu a mitshima yabonga abuile alandudi enji. Mukatshi dia mala ene, tuajiya gutanga Andre, Simona Phetelo, Yone, yajiya gukhala nji nu Yakoba (phangi’a Yone), Filipho, nu Bartelemi (wana gutamegewa luko egi Natanaele). Gungima, athu ako avula abuile alandudi a Yesu.—Yone 1:45-47.

Henyaha Yesu udi mutshigina gutomba apostolo enji. Apostolo ene mbakhala mafuta enji akola, luko mbaheta formasio yabonga diago. Uvi gutuama dia guaatomba, Yesu wayile holu dia mulundu, yajiya gukhala mulundu udi hehi nu Kianga gia Galile, hehi nu Kaphelenauma. Yesu wakombelele phipha yagasue; yajiya gukhala egi wakhalele mutoga Nzambi egi amuhane ndunge nu ukuateshi. Mu lusugu lua landudile, Yesu watamegele alandudi enji, watombele apostolo 12 mukatshi diawo.

Yesu watombele alandudi enji samano tuatangi mu paragrafe ya thomo. Watombele nji Matayo, yonyi wakhalele mu biro dia afutshishi a gitadi. Alandudi ako mutano atombele Yesu adi: Yudasa (wana gutamegewa luko egi Tade “mun’a Yakoba”), Simona wa gu dimbo dia Kanana, Toma, Yakoba mun’a Alfe, nu Yudasa Isakaliote.—Matayo 10:2-4; Luka 6:16.

Yesu wawendele nu apostolo enji 12, enji waajiyile muabonga. Avula mukhatshi diawo akhalele aphangi’enji. Yajiya gukhala egi Yakoba nu phangi’enji Yone akhalele isonyi ya Yesu. Gifua luholo athu ana gutangiza, Alfe wakhalele phangi’a Yosefe, tata wa gusasa wa Yesu. Ngenyi, mun’a Alfe, mupostolo Yakoba, wakhalele gisonyi gia Yesu.

Yadiago, Yesu gakhalelego nu lamba ha gujiya majina a apostolo. Aye giwa, wana gujiya majina awo ba? Gima giajiya gugukuatesa ha gujiya majina awo gidi egi, apostolo mbadi majina awo akhalele Simona, ako mbadi majina awo Yakoba, ako mbadi luko majina awo Yudasa. Simona (Phetelo) wakhalele phangi’a Andre, luko Yakoba (mun’a Zebede) wakhalele phangi’a Yone. Lulu luholo luabonga lua guwunguluga majina nage a apostolo. Ako nguana majina awo adi Matayo (yonyi wakhalele mufutshishi wa gitadi), Toma (yonu washile giphapha), Natanaele (yonu wakhalele goshi’a mutshi ha mutamegele Yesu), nu Filipho (futa dia Natanaele).

Apostolo 11 akatugile gu Galile, gu dimbo dia Yesu. Natanaele wakatugile gu Kana. Filipho, Phetelo nu Andre akhalele enya gu Betesayida. Gungima, Phetelo nu Andre ayile mujinga gu Kaphelenauma; yajiya gukhala egi Matayo nji wakhalele mujinga guene. Yakoba nu Yone akhalele mujinga gu Kaphelenauma nga ndo hehi nu dimbo diene; luko akhalele mukalagala mudimo wa gulowa jishui hehi nu Kaphelenauma. Yudasa Isakaliote, yonu wadigile Yesu, yajiya gukhala muene phamba mupostolo wakatugile gu Yudea.