Hakhalele Apostolo a Yesu mulongesa mbimbi ya Nzambi gu Galile, muthu wamonesele egi Yesu udi “mon’a gimeme wa Nzambi” wambiwe mu bologo. Yone Mubatiji wakhalele wabalegesa gale ivo hehi nu mbadi mu bologo.

Yone wamonesele haphelo egi fumu Helode Antipase watshitshile gubola luholo wadizudile mu ulo nu Helodiade, mukaji’a phangi’enji Filipho. Fumu Helode washiyile ulo nu mukaji’enji wa thomo hagula azule Helodiade. Helode wakhalele muzuela egi wana gunemesa mukhuala wa Moise, uvi mukhuala wene wakhalele mumonesa egi ulo wa luholo luene udi ulo wa uthambi. Hazuelele Yone ndaga yene, fumu Helode wamumbile mu bologo, yajiya gukhala egi Helodiade wamushinjigile ha gukuata Yone.

Helode gakhalelego mujiya ndaga itshi gajiya gukalagala Yone, handaga enya Yuda akhalele mutshigina egi ‘Yone udi profete.’ (Matayo 14:5) Uvi, Helodiade wakhalele wazudi gale desizio. ‘Wakhadile mbalagaji ya Yone,’ gishina giene wakhalele mukamba luholo lua gumushiya. (Mako 6:19) Lusugu lumoshi wahetele okazio ya gumushiya.

Mu givo 32 gia tangua dietu, tangua diazonda gutuama dia gukalagala wano wa Pake, Helode watshitshile fete ya guwunguluga guvualewa guenji. Manene agasue a Helode nu mafumu a masuta enji, nu mafumu ako akoma a mu dimbo dia Galile ajile gu wano wene. Hakhalele ene mutshita fete, atogele Salome, mon’a mukhetu, wavalele Helodiade nu mulumi’enji wa thomo Filipho, ha gukina ulumbu mukunda nu athu atamegewe.

Mon’a mukhetu muene wasuanguluishile Helode muavula, Helode wamuwambelele egi: ‘Ngutoge gima giagasue giwatshigina, ngudi guguhua nagio.’ Helode wadilogele egi: ‘Gima giagasue udi gungutoga ngudi muguhua n’agio uu nu gu gitshinyi gia ufumu wami.’ Gutuama dia guhana mvutu, Salome wazogele, wayile muhula gin’enji egi: ‘Ngumutoga gima gitshi?’—Mako 6:22-24.

Okazio wakhalele mukamba Helodiade wamuenegele! Wawambelele mun’enji muphushi ha gutoga “muto wa Yone Mubatiji.” Salome wavutugile muphushi gudi Helode, wamuwambelele egi: ‘Ngatshigina unguhue, luenyelu, muto wa Yone Mubatiji holu dia longa.’—Mako 6:24, 25.

Mulonga wene wasagesele Helode muavula, uvi luholo athu enji akhadile avui gale ndaga yalogele muene gudi Salome, wavile sonyi ha gubalumuna luko mbimbi jienji, hene wazudile desizio dia gushiya muthu gatshitshilego gubola. Helode watumine suta dienji gu bologo hagula akalagale ndaga yene yabola. Gungima dienji, suta wajile muvutuga nu muto wa Yone Mubatiji ha longa. Wawuhanele gudi Salome, Salome wawubatele gudi gin’enji.

Havuile alandudi a Yone mulonga wene, ajile muzangula kimbi kienji, agifundjile. Gungima ayile muwambela Yesu ndaga yene.

Gungima, tangua Helode wavile egi Yesu udi musaga athu nu guzola nyuma jiabola, ndaga yene yamuhanele woma wavula. Wasendesele gudihula gila Yesu udi diago “Yone wafuzumuga gu gufua.” (Luka 9:7) Helode Antipase watshiginyile gumona Yesu. Gakhalelego gumukamba mukunda nu gutegelela malongo enji, uvi watshiginyile gumumona hagula ajiye gila Yesu wakhalele diago Yone Mubatiji nga ndo.