Gungima dia gukombelela phipha yagasue, nu gutomba alandudi 12 ha gubua apostolo, Yesu wahuidile diago. Henyaha tudi mu gimenegena, uvi muene yowu genji nu ngolo nu nzala ya gukuatesa athu. Waakuatesele holu dia mulundu wa gu Galile, yajiya gukhala hehi nu Kaphelenauma, dimbo diakhalele mutshita mudimo wenji muavula.

Athu avula akatugile mu membo a gualeha, ayile gudi muene. Ako akatugile gu khanda ya sudi, ako gu Yelusalema nu mu membo a Yudea. Ako akatugile mu membo a gu Tile nu Sidona gu khanda ya thunda, akhalele hehi nu kianga. Mukunda natshi athu ene ajile mukamba Yesu? Ajile ‘ha gumutegelela nu ha gusagewa gu misongo yawo.’ Yakalegewe diago ngenyi, Yesu ‘waasagele mukut’awo agasue.’ Tangiza gale ndaga eyi! Athu agasue akhalele mukata asagewa. Yesu wasagele nji ‘athu akhalele musagesewa gudi bademo.’—Luka 6:17-19.

Gungima, Yesu wakhalele ha fundo dimoshi holu dia mulundu, luko thundu y’athu yakhalele n’enji hehi. Apostolo enji 12 akhalele hehi n’enji. Mukut’awo agasue akhalele diago nu nzala ya gutegelela mulongeshi owu wakhalele mukalagala ndaga jia gushimana. Yesu wakalegele diskur diakuatesele diago athu akhalele gumutegelela. Sendese tangua dinyi, diskur diene diana gukuatesa nji athu ako avula. Diajiya nji gutukuatesa nu esue handaga diskur diene dishigo diakola, Yesu walongesele malongo akola mu luholo lualeba. Yesu wahanele ifezegeselo ya ndaga athu akhalele mujiya muabonga. Ngenyi, athu agasue akhalele mutshigina gutumagela mikhuala ya Nzambi ha gukhala nu lujingu luabonga, akotelesele muabonga malongo ene. Ndaga jitshi jia ndando jiazuelele Yesu mu diskur dienji jiana gudibuisa diago dia ndando?

Athu agasue ana gutshigina gukhala nu gusuanguluga. Yesu wajiyile nji ndaga yene, hene wasendesele guzuelela athu adi diago nu gusuanguluga. Tangiza luholo lumene luene lua suanguluishile athu akhalele gumutegelela. Uvi ndaga jiko jiakhalele naye guayitugisa.

Wazuelele egi: ‘Gusuanguluga gudi nu athu adi mujiya egi adi nu nzala ya ndaga jia mu nyuma, handaga Ufumu wa mu dilu udi wawo. Gusuanguluga gudi nu athu adi mudila handaga Nzambi mbawawalagana. . . . Gusuanguluga gudi nu athu adi nu nzala nu luhungu lua ndaga jiabonga, handaga Nzambi mbawutagenesa nzala jiawo. . . . Gusuanguluga gudi nu athu adi mumonesewa lamba mukunda nu ndaga jiabonga, handaga Ufumu wa mu dilu udi wawo. Suangulugenu tangua athu adi gumishingana nu gumimonesa lamba . . . mukunda nu ame. Suangulugenu, luko khalenu nu gusuanguluga guavula.’—Matayo 5:3-12.

“Gusuanguluga” gudi muzuelela Yesu gudi mukotelesa itshi? Gushigo gusuanguluga guana guvua muthu gula wabalegesa tangua diawaha. Gusuanguluga gua giamatshidia guana gutoga ndaga jiavula. Gudi mukotelesa nji gusuanguluga nu ima tudi nayo, nu gusuanguluga nu lujingu.

Yesu wazuelele egi athu adi nu nzala jia ndaga jia mu nyuma, nu adi gudisagesa mukunda nu gubola guawo, nu ana gukamba gujiya Nzambi nu gumukombelela, ene adi diago nu gusuanguluga. Ikhale athu ako anago guaatshigina nu ana guaamonesa lamba handaga adi mukalagala gutshigina gua Nzambi, ene adi nu gusuanguluga handaga adi mujiya egi, adi musuanguluisa Nzambi; luko muene mbawahana monyo wa mayilago.

Athu avula ana gutangiza egi hagula muthu akhale nu gusuanguluga, udi naye gukhala nu umonyi  wavula nga gulandula gusuanguluga gua ha mavu awa. Uvi Yesu gazuelelego ngenyi. Wazuelele ndaga jiatumine athu akhalele gumutegelele ha gutangiza. Wazuelele egi: ‘Lamba dienu enue enya umonyi handaga mudi muheta gusuanguluga guenu guagasue. Lamba dienu enue athu adi agukuta luenyelu handaga nzala mbayimikuata. Lamba dienu enue mudi mulela luenyelu handaga mbamukhala nu gikenene nu mbamudila. Lamba diavula tangua athu agasue adi gumizuelela ndaga jiabonga handaga akhakh’awo azuelele nji ndaga jia ngenyi gudi ba profete a mambo.’—Luka 6:24-26.

Mukunda natshi idi lamba gudi athu adi nu umonyi wavula, adi mulela nu gusuanguluga guagasue, nu gudi athu adi mutshigina egi athu a atumbuise? Handaga gula muthu udi nu ima yavula, enji udi guyizumba muavula, yajiya gumutuma ha gulebesa guzumba guenji gua gukombelela Nzambi; ngenyi gajiyilego gukhala nu gusuanguluga gua giamatshidia. Yesu gazuelelego egi gukhala phutu nga gukhala nu nzala guene guana guhana muthu gusuanguluga. Uvi iphungu yavula, phutu jiakhalele musuanguluga muavula nu malongo a Yesu, luko jiene jiakhalele nu gusuanguluga gua giamatshidia.

Yesu wawambelele alandudi enji egi: ‘Enue mudi mungua wa ha mavu.’ (Matayo 5:13) Yadiago, ashigo gifua mungua tuana gumba mu ima ya gudia. Uvi mungua wana gubamba ima hagula ifukhigo. Akhalele mubamba mungua wavula hehi nu giwotshielo mu tempelo ya Nzambi, akhalele nji guwumba mu milambu akhalele muhana. Mungua wana gumonesa nji gima gianago gufukha nga gubola. (Levi 2:13; Ezekiele 43:23, 24) Alandudi a Yesu adi “mungua wa ha mavu” handaga makalegelo awo ana gukuatesa athu ako ha gubamba ufuta wawo nu Nzambi nu ha gukhala nu makalegelo abonga. Yadiago, ndaga ana gulongesa jiajiya gubamba lujingu lua athu ana guaategelela.

Luko, Yesu wawambelele alandudi enji egi: ‘Enue mudi gifua muenda ha mavu.’ Muenda wanago guhagewa moshi’a kinda, uvi wana guhagewa ha gihagelo gia muenda hagula wajiya gutshiesa. Hene, Yesu wawambelele alandudi enji egi: ‘Muanya wenu uleme gu meso a athu, hagula ene ateme gumona midimo yenu yabonga, nu atumbuise shenu udi mu dilu.’—Matayo 5:14-16.

Mafumu a mangumba a enya Yuda akhalele mumona Yesu gifua muthu wana gushiya Mukhuala wa Nzambi; masugu abalega, ayile giphungi ha gumushiya.  Hene Yesu waawambelele haphelo egi: ‘Mutangizago egi ngajile ha gushiya Mukhuala nga ba Profete. Ngajilego ha guwushiya, uvi ngajile ha guwutagenesa.’—Matayo 5:17.

Yesu wanemesele Mukhuala wa Nzambi mu luholo lua tagana, wawambelele nji athu ako ha guwunemesa. Hene wazuelele egi: ‘Muthu wagasue washiya mukhuala wazonda wa mikhuala eyi nu walongesa nji athu ha gutshita ngenyi, mbawutamegewa egi muthu wabalega guzonda mu Ufumu wa mu dilu.’ Ngenyi wamonesele egi muthu wa luholo elu mbaganginyigo mu Ufumu wa mu dilu. Wazuelele luko egi ‘Uvi, muthu wagasue wayitumagela nu wayilongesa, mbawutamegewa egi muthu wakoma mu Ufumu wa mu dilu.’—Matayo 5:19.

Yesu watunyishile makalegelo ajiya gutuma muthu ha gushiya Mukhuala wa Nzambi. Gungima dia guzuelela mukhuala udi muzuela egi “Ushiyigo muthu,” Yesu wazuelele luko egi: ‘Muthu wagasue udi mulandula gubambela phangi’enji khabu mu mutshima, mbawusophesewa gudi nzuji.’ (Matayo 5:21, 22) Gulandula gubambela muthu khabu mu mutshima gudi ndaga yabola, handaga guajiya gugutuma ha gushiya muthu. Ngenyi, Yesu wamonesele ndaga jiko tudi naye gukalagala ha gujinga mu guhuima nu athu ako. Wazuelele egi: ‘Gula watshigina guya muhana mulambu waye gu giwotshielo, enji wawunguluga egi phangi’aye udi nu aye ndaga, bemba mulambu waye gutuama dia giwotshielo. Nda udiange gukamba guhuima nu phangi’aye, gungima uze giwa uhane mulambu waye.’—Matayo 5:23, 24.

Ndaga iko yakhalele muzuelela Mukhuala idi gutuna gukalagala uthambi. Yesu wazuelele egi: “Enue muavile mbimbi yazuelewe gamba: ‘Ushigo naye gukalagala uthambi.’ Uvi Ame ngudi gumiwambela egi muthu wagasue udi mulandula gutala mukhetu nu matangi a gubungisa n’enji muila, wakalagala gale n’enji uthambi mu mutshima wenji.” (Matayo 5:27, 28, NW) Yesu gashigo muzuelela matangi abola ajiya gujila muthu, gungima abalega. Uvi, udi muzuelela ndaga yabola yajiya gubuila muthu gula udi “mulandula gutala.” Gulandula gutala guana gukudisa nzala jiabola jia gukalagala uthambi. Gungima, gula muthu muene waheta okazio, wajiya gukalagala uthambi. Luholo lutshi muthu wajiya gudilonda hagula ndaga eyi imubuilago? Gudilondega muabonga gudi nu ndando yavula. Yesu wazuelele egi: ‘Gula diso diaye dia madia diagubuisa mu gubola, dikatule udibishile. . . . Gula koko diaye dia madia diagubuisa mu gubola, dibatule udibishile.’—Matayo 5:29, 30.

Ha gubamba lujingu luawo, athu avula ana gutshigina egi a abatule gitshinyi gia muila gidi nu misongo yakola. Luholo lumoshi nji Yesu wazuelele egi ha gutuna gukhala nu matangi abola nu ndaga matangi ene ajiya gutuma muthu ha gukalagala, idi nu funu egi ‘tubishile’ gima giagasue giajiya gututuma ha gukalagala gubola, ikhale gima giene gidi mumonega gifua gidi nu ndando yavula, gifua diso nga koko. Yesu wazuelele luko egi ‘Gutotesa gitshinyi gimoshi gia muila waye gudi ndaga yabonga gubalega gumbiwa gua muila waye wagasue mu Gehena’ (shita dimoshi diakhalele mukondewa mvindu hanze ya ibayi ya Yelusalema). Gehena yakhalele mumonesa gushiyiwa gua mayilago.

 Yesu wahanele luko malongo atadila ndaga tuajiya gutshita gula athu ako atukalegela gubola nga atuhana khabu. Wazuelele egi: ‘Mudinyongigo nu muthu wabola, uvi gula muthu wa guwasa mbanda gu butu dia madia, mubalumuine nji butu dia mahidi.’ (Matayo 5:39) Ishigo mukotelesa egi muthu gajiyilego gukalagala nga ndaga imoshi ha gudibamba nga gubamba enya fami yenji gula muthu weza guaaluisa. Yesu gakhalelego muzuelela mbanda eyi yajiya gunamenesa muthu nga gumushiya. Wakhalele muzuelela mashingana. Wazuelele egi gula muthu mumoshi udi mukamba guguluisa nga gugumanesa, waguwasa mbanda nga wagushingana, umuvutudilago ndo.

Longo edi didi gudivua nu Mukhuala wa Nzambi watadila guzumba athu ako. Yesu wawambelele athu akhalele gumutegelela egi: ‘Landulenu guzumba mbalagaji jienu, landulenu gukombelela mukunda nu athu adi gumimonesa lamba.’ Wamonesele mukunda natshi tudi naye gutshita ngenyi. Wazuelele egi: ‘Hagula mudimonese egi mudi ana a sh’enu udi mu dilu. Ndaga ya muene wana guzolesa tangua mukunda nu athu abonga nu abola.’—Matayo 5:44, 45.

Ha gusugisa gitshinyi egi gia diskur dienji, Yesu wazuelele egi: ‘Mudi naye gukhala athu atagana, gifua mudi shenu wa mu dilu.’ (Matayo 5:48) Yadiago, ishigo mukotelesa egi muthu udi naye gukhala diago watagana gifua Nzambi. Uvi, gula tualandula khadilo dia Nzambi, tuajiya gukudisa guzumba, ikhale gudi mbalagaji jietu. Wazuelele luko egi: ‘Landulenu guvuila athu khenda gifua mudi shenu muvuila athu khenda.’—Luka 6:36.

Yesu walandudile gukalagala diskur dienji, wawambelele athu akhalele gumutegelela egi: ‘Mukalagalago ndaga jiabonga gumeso a athu hagula amimone.’ Yesu watunyine khadilo diabola dia athu ana gumonesa gifua adi a gujinginyina gudi Nzambi. Wazuelele egi: ‘Tangua udi muhana ima ya khenda, ushigigo phungi, gifua muana tshita enya mambo.’ (Matayo 6:1, 2) Idi ndaga yabonga ha guhana athu ima ya khenda mu gisuegi.

Gungima Yesu wazuelele egi: ‘Tangua mudi mukombelela Nzambi, mutshitshigo gifua enya mambo, ndaga ya ene ana guzumba gumagana molu ha gukombelela Nzambi mu ikombelelo nu mu phambu jia njila jiakoma hagula athu a amone.’ Hene, wazuelele luko egi: ‘Tangua udi mukombelela, ngina gu sugu yaye, gungima dia gujidiga gijidigo giaye, kombelela Sh’aye udi mu gisuegi.’ (Matayo 6:5, 6) Yesu gazuelelego egi gukombelela ha meso athu gudi ndaga yabola, handaga muene hakhenji wakhalele mukombelela ha meso a athu. Uvi watunyishile isambu yana gukalegewa mukunda nu guyitugisa athu nga hagula athu atutumbuise.

Wawambelele athu egi: ‘Tangua mudi mukombelela Nzambi, mukhadigo muvutugila ima imoshi iphungu yavula gifua muana tshita aphagano.’ (Matayo 6:7) Yesu gazuelelego egi gukombelela iphungu yavula mukunda nu ndaga imoshi ngenyi gudi ndaga yabola. Watunyishile gukalegela mbimbi jinyi tuakuatele gale mu muto ha ‘gujivutugila tangua diagasue’ ha tudi mukombelela. Hene, wahanele gisambu gia gifezegeselo gidi nu ndaga sambadi tudi naye gutoga. Ndaga thathu  jia thomo jidi mumonesa Ufumu udi nawo Yehowa wa guhinyina nu mafelela enji: gunemesewa gua jina dienji, guza gua Ufumu wenji, gukalegewa gua gutshigina guenji. Phamba gungima dia gukombelela mukunda nu ndaga eji thathu, tuajiya giwa gutoga ima tudi nayo funu, gifua ima ya gudia, gutotesewa gua gubola. Tuajiya gumutoga nji atukuatese hagula tubuigo mu gubola, nu atuhuluise gudi muthu wabola.

Ima tudi nayo idi naye guzula fundo ditshi mu lujingu luetu? Yesu wazuelele egi: ‘Mubambelago umonyi wenu ha mavu, fundo didi sualala nu ukelengenye muyidia, nu fundo didi jinzangi mubula ha guyikuya.’ Malongo abonga diago! Umonyi wa ha mavu wajiya gubola, luko ushigo wene wana gukalagala egi Nzambi atutshigine. Hene Yesu wazuelele egi: ‘Bambelenu umonyi wenu mu dilu.’ Tuajiya gubamba umonyi wetu mu dilu gula tudi musha mudimo wa Nzambi ha fundo dia thomo mu lujingu luetu. Gushigo nga muthu mumoshi wajiya gutunyisa Nzambi ha gututshigina nga gutuhana gishimbigo gia lujingu lua ivo nu ivo. Hene, mbimbi eji jiazuelele Yesu jidi jia giamatshidia: ‘Fundo didi umonyi waye, diene didi mutshima waye.’—Matayo 6:19-21.

Ha gumonesa diago egi ndaga eyi idi nu ndando, Yesu wahanele gifezegeselo egi: ‘Meso adi gifua muenda wa muila. Ngenyi gula diso diaye didi mumona muabonga, muila waye wagasue mbawuzala nu muanya. Uvi gula diso diaye didi diabola, muila waye wagasue mbawuzala nu phipha.’ (Matayo 6:22, 23) Gula diso dietu dia gufuezegesa didi mumona muabonga, mbadikhala gifua muenda udi muhana muanya mu muila wetu. Uvi hagula ikhale ngenyi, meso etu adi naye gutala phamba gima gimoshi. Gula ndo, tuajiya gusendesa gutadila lujingu luetu mu luholo luabola. Gula tudi musha meso etu mu umonyi nga mu ima tudi nayo, hafundo dia gukalegela Nzambi, mbayimonesa egi ‘muila wetu wagasue udi mu phipha,’ tangua diko tuajiya gusendesa gukalagala ndaga jidi gututuma ha gukalagala ndaga jiabola nga jia phipha.

Gungima Yesu wahanele gifezegeselo giko giabonga. Wazuelele egi: ‘Muthu gajiyilego gukhala muhiga wa mafumu mbadi, handaga mbawutuna mumoshi ha guzumba muko. Mbawujinginyina gudi muko, uvi muko ndo. Wajiyilego gukhala muhiga wa Nzambi nu wa umonyi.’—Matayo 6:24.

 Yajiya gukhala egi athu ako akhalele mutegelela Yesu adihudile luholo adi naye gutadila ima ya gujingila adi nayo funu. Hene, Yesu wawambelele egi gula ahaga mudimo wa Nzambi ha fundo dia thomo, ashigo naye gudisagesa ndo. Wazuelele egi: ‘Tadienu muabonga njila jia gosa; jiana gukuna ndo mbuto, jiana gumuna ndo, luko jiana gubungisa ndo ima mu mukala, uvi sh’enu wa mu dilu wana gujidisa.’—Matayo 6:26.

Itshi tuajiya guzuela mukunda nu yaji yana guzoga holu dia mulundu? Yesu wazuelele egi: “Nga muene fumu Solomo diago mu gutumbuga guenji guagasue, gakhalelego nu milele gifua kiaji gimoshi gia mukatshi dia yaji eyi.” Mbimbi eji jidi mukotelesa itshi? ‘Gula Nzambi udi musudigisa muangu wa mu temu ngenyi, wago udi guene mangino hamene udi mumbiwa tshuya, mbagamisudigisago muavula enue enya gutshigina guazonda ba?’ (Matayo 6:29, 30) Yesu wazuelele luko egi: ‘Mubalegesago gudisagesa egi ‘Mbatudia itshi?’ nga, ‘Mbatunua itshi?’ nga, ‘Mbatusudiga itshi?’ . . . Sh’enu wa mu dilu udi mujiya egi mudi nu funu ya ima eyi yagasue. Hene, landulenu gukamba thomo Ufumu wa Nzambi nu gubonga guenji, muene mbawumihua ima iko yagasue.’—Matayo 6:31-33.

Apostolo nu athu ako a mitshima ya tagana akhalele mutshigina gujinga mu luholo luana gusuanguluisa Nzambi, uvi matangua ako yakhalelego ndaga yaleba. Afalese avula akhalele muzuela ndaga jiabola mukunda nu athu ako, akhalele nji guaasophesa mu luholo luabola. Hene, Yesu wawambelele athu akhalele gumutegelela egi: “Musophesago athu ako hagula enue musophesawago gudi Nzambi; Nzambi mbawumisophesa luholo mudi musophesa akuenu.”—Matayo 7:1, 2.

Gulandula utuameji wa Afalese guakhalele gingonza diago. Yesu wahanele gifezegeselo egi: ‘Gifofo giajiyilego gutuameza gifofo n’amuko, ishigo ngenyi? Gula ndo muyadi awo mbaabua mu wina, ishigo ngenyi?’ Hene, luholo lutshi athu akhalele mutegelela Yesu akhalele naye gutadila athu ako? Akhalelego naye gutala phamba gubola gua athu ako, handaga gukalagala ngenyi gudi ndaga yabola diago. Yesu wahudile egi: “Luholo lutshi wajiya guwambela phangi’aye egi, ‘Iza ngugukatule gamulenge mu diso diaye’, uvi aye ushigo mumona mutshi wakoma udi mu diso diaye? Muenya mambo! Katula gale mutshi wakoma udi mu diso diaye, gungima mbawumona muabonga luholo lua gukatula gamulenge gadi mu diso dia phangi’aye.”—Luka 6:39-42, NW.

Yakoteleselego egi alandudi ashigo naye gusophesa nga ndaga imoshi ndo. Yesu wawambelele egi: ‘Muhanyigo jimbua ima ya gijila ndo, mumbigo musanga wenu hashi gutuama dia ngulu.’ (Matayo 7:6) Giamatshidia gidi mu Biblia giakhala nu ndando gifua musanga. Gula athu ako adi mukalagala ndaga gifua shitu, ashigo munemesa diago giamatshidia egi gia ndando, alandudi adi naye guabemba hagula akambe athu ajiya guaategelela.

Tangua Yesu gazuelele luko ndaga yatadila gisambu, wamonesele funu ya gulandula gukalagala gisambu tangua diagasue. Wazuelele egi: ‘Landulenu gutoga, enji mbaamihana.’ Nzambi udi hehi ha guhana mvutu gu isambu yetu, gifua luholo Yesu wayimonesele. Wahudile egi: ‘Muthu mutshi mukatshi dienu gula mun’enji wamutoga mapha muene gamuhanyi seso? . . . Hene, gula enue athu abola muana guhana an’enu ima yabonga ya khenda, mudi naye gujiya egi Sh’enu udi mu dilu mbawuhana ima yabonga gudi athu ana gumutoga!’—Matayo 7:7-11.

Gungima, Yesu wahanele longo diana gujiyiwa muavula, nu diana gututuameza. Wazuelele egi: ‘Mutshitshile  athu ako yagasue mudi mutshigina egi amitshitshile.’ Mukut’etu agasue tudi naye guhaga ngolo ha gukalegela nu mutshima umoshi longo edi mu luholo luetu lua gujinga nu athu ako. Uvi gukalagala ngenyi guajiya gukhala lamba. Hene, Yesu wazuelele egi: ‘Nginenu gu mufulo wazonda, ndaga ya njila idi nu mufulo wakoma idi mubata gu gufua, nu athu adi mungina muene adi avula. Uvi njila idi muya gu monyo idi yazonda, mufulo wayo udi wakama, nu athu adi mungina muene adi azonda diago.’—Matayo 7:12-14.

Yesu wajiyile egi athu ako mbaakamba gudimba alandudi hagula akatuge mu njila yana gubata gu monyo. Hene, wazuelele egi: ‘Mutemene ngambi jia mambo, jidi muza gudi enue mumonega gifua imeme, uvi mu mitshima yawo jidi diago mbulu jidi nu nzala yakola.’ (Matayo 7:15) Yesu wazuelele egi mitshi yabonga nu mitshi yabola yana gujiyiwa gu mabundu ayo. Idi luholo lumoshi nu athu. Hene, tuajiya gujiya ngambi jia mambo mu ndaga jiana gulongesa nu mu makalegelo awo. Yadiago, Yesu wazuelele egi ishigo phamba ndaga jidi muzuela muthu jiajiya gumubuisa mulandudi wenji, uvi nu ndaga gadi muene mukalagala. Athu ako ana guzuela egi Yesu udi Fumu wawo, uvi itshi tuajiya guzuela gula athu ene ashigo mukalagala gutshigina gua Nzambi? Yesu wazuelele egi: “Mbanguawambela egi: ‘Ngushigo gumijiya nga hazonda! Katugienu gudi ame, enue ashiyi a mikhuala!’”—Matayo 7:23, NW.

Ha gumanesela diskur dienji holu dia mulundu, Yesu wazuelele egi: ‘Muthu wagasue udi muvua mbimbi jiami eji nu udi mujitumagela, mbawukhala gifua muthu watema watungile inzo yenji holu dia seso. Mvula yanogele, mita yazalele, ikudi yakola yajile nu yabundjile gu inzo, uvi inzo yene yabuilego, handaga yakhalele yagutungiwa holu dia seso.’ (Matayo 7:24, 25) Mukunda natshi inzo eyi yabuilego? Handaga muthu muene ‘wahagele mizula yaleha, watungile fondasio holu dia seso.’ (Luka 6:48) Hene, tushigo naye guvua phamba mbimbi jia Yesu, tudi naye guhaga ngolo ha ‘gujikalegela.’

Itshi yajiya gubuila muthu ‘wavua mbimbi eji’ uvi ‘gajitumagelego’? Udi ‘gifua muthu waheya watungile inzo yenji holu dia gishegele.’ (Matayo 7:26) Mvula, guzala gua mita nu gikudi giajiya gubuisa inzo eyi.

Athu ayitugile muavula mu luholo lua gulongesa lua Yesu. Wakhalele mulongesa gifua muthu udi nu ufumu, uvi ndo gifua mafumu a mangumba. Yajiya gukhala egi athu avula mukatshi di’athu akhalele gumutegelela, abuile alandudi enji.