Ngungima dia guhana apostolo enji malongo abonga atadila luholo lua gulongesa mbimbi ya Nzambi, Yesu waatumine muyadi-muyadi ha guya mulongesa. Uvi gasugishilego mbimbi jienji. Waawambelele nu gisemo giagasue ha gutema mukunda nu mbalagaji egi: ‘Tadienu! Ngudi gumituma gifua imeme mukatshi dia mbulu . . . Mutemene athu handaga ene mbaamifunda gu tribinale jiawo jiazonda, mbaamibeta mu sinagoga jiawo. Mbamunanewa gu phala ya maguvernere nu mafumu mukunda nu ndaga yami.’—Matayo 10:16-18.

Yadiago, alandudi a Yesu ajiya gumonesewa lamba diavula, uvi Yesu waahanele laji egi: ‘Tangua mbaamihana gudi mafumu, mudisagesago egi tuzuela luholo lutshi, nga tuzuela itshi, handaga imbamuzuela mbayimihuiwa mu kumbi dinyi ndaga ya ishigo enue mbamuzuela uvi nyuma ya Sh’enu mbayizuela mu makano enu.’ Yesu wazuelele luko egi: ‘Muthu mbawuhaga phangi’enji gu gufua, sha mona mbawuhaga mun’enji gu gufua, ana mbaabalumugina mvuaji jiawo ha gujishiyisa. Athu agasue mbaakhala n’enu umbalagaji mukunda nu jina diami, uvi muthu yago wakolesela uu nu gu gisugishilo mbawuhuluishiwa.’—Matayo 10:19-22.

Yesu wawambelele alandudi enji ha gutema ha gula ahete luholo lua gulongesa mbimbi ya Nzambi, handaga mudimo wa ngulongesa udi nu ndando yavula gubalega. Wazuelele egi: ‘Gila amisagesa mu dimbo dingoshi, lengenu gu dimbo diko. Ngudi gumiwambela giamatshidia egi, tangua mbadiza mun’a muthu, enue mbamukhala khenji muwenda gale ndo mu membo agasue a Isalele.’—Matayo 10:23.

Yesu wahanele Apostolo enji 12 malongo abonga, waatemesele, waahanele nji gikhesa giavula! Yesu wafile gungima wafuzumugile, uvi mbimbi jiazuelele muene gudi Apostolo, wajizuelele nji mukunda nu athu adi mulongesa lukuma luabonga mangino. Idi ngenyi handaga, hazuelele Yesu gudi Apostolo egi ‘athu agasue mbaakhala’ n’awo umbalagaji, gakhalelego muzuelela phamba athu Apostolo ene ayile mulongesa, uvi wazuelele athu a mu mavu agasue. Mu tangua diazonda diayile Apostolo mulongesa gu Galile, gushigo nu muthu waananele gu phala ya maguvernere nga mafumu, luko guakhalelego nga Mupostolo mumoshi wahagewe gu gufua gudi enya fami y’enji.

Idi mumonega haphelo egi, Yesu wawambelele Apostolo ndaga jiakhalele naye gubua mu masugu a gungima. Yesu wazuelele egi: ‘Tangua Mbadiza mun’a muthu,’ alandudi enji mbakhala khenji amanesela gale ndo guwenda mu membo agasue a Isalele. Yesu wamonesele egi alandudi enji mbaashigo mumanesa mudimo wa gulongesa Ufumu wa Nzambi gutuama egi Fumu Yesu Klisto aze gifua Nzuji wakatuga gudi Nzambi.

 Tangua Apostolo ataganele nu malamba mu mudimo wa gulongesa mbimbi ya Nzambi, akhalelego naye guyituga handaga Yesu wazuelele egi: ‘Mulandudi gashigo ya gubalega fumu wenji.’ Yesu wamonesele ndaga yene haphelo. Muene wamonele lamba mukunda nu gulongesa lukuma lua Ufumu wa Nzambi, Apostolo nji mbaamona lamba. Uvi, Yesu waawambelele egi: ‘Muvuigo woma wa muthu wajiya gushiya phamba muila uvi gajiyilego gushiya monyo. Uvi vuenu woma wa Nzambi wajiya gushiya monyo hangoshi nu muila mu Gehena.’—Matayo 10:24, 28.

Yesu wahanele gifezegeselo gu ndaga yene. Wakolesele nu gikhesa giagasue uu nu gu gufua, uvi gaboleselego gujinginyina guenji gudi Yehowa, Nzambi wa ngolo jiagasue. Phamba Nzambi wa ngolo jiagasue wajiya gushiya “monyo” wa muthu (felela dienji dia masugu adi muza), phamba muene udi nu ngolo jia gufuzumuna muthu hagula ahete lujingu lua ivo nu ivo. Gujiya ndaga yene yahanele diago apostolo gikhesa!

Hagumonesa egi Nzambi ganago gutujimbila, Yesu wahanele gifezegeselo egi: ‘Mbodio jiyadi jishigo mudigiwa mu kuta dimoshi ba? Uvi mbodio nga imoshi yajiyilego gubua hashi gula Sh’enu gajiyilego. . . . Ngenyi mukhadigo nu woma, ndando yenu yabalega ya mbodio jiavula.’—Matayo 10:29, 31.

Mbimbi alandudi a Yesu alongesele yakhalele naye gubata ukhaphumunyi mukatshi dia enya fami imoshi, handaga athu ako a mu fami akhalele guyitshigina uvi ako ndo. Yesu wazuelele egi: ‘Mumbigo matangi egi ame ngajile ha gubata guhuima ha mavu.’ Yadiago, hagula muthu mumoshi mu fami atshigine giamatshidia, yana gutoga egi akhale nu gikhesa. ‘Muthu udi muzumba sh’enji nga ginenji gubalega ame, gashigo watagana ha gukhala mulandudi wami, muthu udi muzumba mun’enji wa yala nga wa mukhetu gubalega ame, gashigo watagana ha gukhala mulandudi wami.’—Matayo 10:34, 37.

Athu ako akhalele naye guyamba alandudi muabonga. Yesu wazuelele egi: ‘Muthu wagasue udi muhua mumoshi wa mukhatshi dia ana awa a alenge kopho dia meya alatulu handaga udi mulandudi wami, ngudi mumiwambela giamatshidia egi, mbagadifudigo gishimbigo gienji.’—Matayo 10:42.

Ngungima dia gutegelela malongo ene nu gikhesa gia ahanele Yesu, apostolo ayile ‘mu membo agasue a terituare yene ha gulongesa lukuma luabonga nu ha gusaga enya misongo mu khanda jiagasue.’—Luka 9:6.