Yesu wakhalele munemesa Yone mubatiji, uvi luholo lutshi athu avula akhalele mutalela Yone? Yesu wazuelele egi: “Gindongo egi gidi gifua ana azonda adi ha zando adi muzuela nu mafut’awo mu dizui diakola egi: ‘Tuamishigila jimbinga, uvi enue muakinyinego; tuamiyimbila ngimbo jia gikenene, uvi enue muadidilego.’”—Matayo 11:16, 17, NW.

Yesu watshiginyile guzuela itshi? Wazolele matangi enji haphelo egi: “Yone wajile, gakhalelego mudia nga gunua matombe, uvi athu azuelele gamba ‘muene udi nu demo.’ Muna muthu wajile, udi mudia nu gunua, uvi athu akhalele muzuela egi, ‘Tadienu! Muene udi muenya lushigo lua gudia, udi munui wa matombe avula, futa dia afutshishi a gitadi nu enya gubola.’” (Matayo 11:18, 19, NW) Yone wakhalele Nazileya, wakhalele nu lujingu lua leba. Gakhalelego munua matombe, uvi gindongo egi giakhalele muzuela egi udi nu demo. (Lutango 6:2, 3; Luka 1:15) Uvi, Yesu wajingile gifua athu agasue. Wakhalele mudia nu gunua gubalegesa ndo, uvi amufundjile egi wakhalele muenya lushigo lua gudia. Idi mumonesa egi yakhala diago lamba ha gusuanguluisa athu.

Yesu wafuanesele gindongo giene nu ana azonda adi ha zando adi mutuna gukina tangua ana ako adi mushiga jimbinga, nu ashigo mudila tangua ako adi muyimba ngimbo jia gikenene. Hene, wazuelele egi: ‘Uvi ndunge jiana gumonega jia nduedi mu midimo yajio.’ (Matayo 11:16, 19) Yone nu Yesu amonesele mu “midimo” yawo egi ndaga athu akhalele muzuela mukunda nu ene jiakhalele jia mambo.

Gungima dia gufuanesa gindongo giene nu athu anago guvua, Yesu watele mukumbu mukunda nu dimbo dia Kolazina, Betesayida, nu Kaphelenauma, mafundo gakalegele ndaga jiakoma jia gushimana. Yesu wazuelele egi nga wakalegele ndaga eji gu membo a Fenisia, Tile nu Sidona nga enya ifutshi yene abalumuine mitshima. Watangele nji Kaphelenauma, fundo diakhalele muene mujinga sendese mualeha. Ikhale gu Kaphelenauma nji, athu avula atshiginyinego ndaga jia longesele Yesu. Yesu wazuelele mukunda nu dimbo diene egi: ‘Mu lusugu lua gusophesewa, lamba diaye mbadikhala diakoma gubalega lamba dia dimbo dia Sodoma.’—Matayo 11:24.

Gungima Yesu watumbuishile Shenji, yonu wasuegele giamatshidia egi gia ndando “gudi enya ndunge nu enya gutema” uvi wagisoluele gudi athu a gudibulumuisa, adi gifua ana azonda. (Matayo 11:25) Watamegele athu a luholo elu egi: ‘Jienu khungi yenu agasue gudi ame, enue mudi mumona malamba nu mudi mubata inemo yavula, ngenyi mbangumihua gikhesa. Zangudienu muhitu wami ha shingo jienu, longugenu gudi ame handaga ngudi nu mutshima wa guhuiminyina nu wa gudibulumuisa, ngenyi mbamuheta gikhesa. Handaga muhitu wami udi waleluga ha gubata, enji ginemo giami gishigo gianema ndo.’—Matayo 11:28-30.

Luholo lutshi Yesu wahanele athu gikhesa? Mafumu a mangumba akhalele muhana athu inemo luholo akhalele mukolesa ndaga jiawo jia kutime nu mikhuala yatadila Lusugu lua Guhuluguga. Uvi Yesu waahanele gikhesa luholo gakhalele guaalongesa giamatshidia giatadila Nzambi, ngenyi giaakatudile mu uhiga wa ndaga jiawo jia kutime. Luko, Yesu wahanele gikhesa gudi athu akhalele musagesewa gudi mafumu a politiki nu awa akhalele mudivua gifua adi nu ginemo gia masumu. Yadiago, Yesu waamonesele luholo gubola guawo guajiya gutotesewa nu luholo ajiya gukhala mu guhuima nu Nzambi.

Muhitu wa Yesu ushigo wanema, athu agasue adi mutshigina guwubata, ajiya gudihana gudi Nzambi wetu wa khenda, nu gumukalegela mudimo. Gukalagala ngenyi gushigo lamba ndo, handaga mikhuala ya Nzambi ishigo yanema nga hazonda.—1 Yone 5:3.