Athu a mu membo a gualeha avile lukuma lua Yesu. Athu avula awendele nenji mu mafundo a gualeha ha gutegelela malongo enji nu gumona ndaga jienji jia gushimana. Uvi, gungima dia masugu azonda, wavutugile gu Kaphelenauma, fundo diakhalele mukalagala muavula mudimo wenji. Lukuma lua guvutuga guenji luawendele mu phushi dimbo diagasue uu nu gu khanda ya Muta wa Galile. Hene, athu avula ayile gu inzo yakhalele mujinga muene. Mukatshi dia athu ene, tuajiya gutanga Afalese nu alongeshi a mikhuala akatugile mu membo agasue a Galile, a Yudea nu gu Yelusalema.

‘Hene athu avula azalele monzo, ngenyi guasalelego fundo nga diazonda uu nu ha mufulo; wasendesele guaalongesa mbimbi ya Nzambi.’ (Mako 2:2) Tangua diataganele hagula ndaga imoshi yakoma ya gushimana ikalegewe. Ndaga yene yajiya gutukuatesa ha gujiya egi Yesu udi nu ngolo jia gukatula ndaga jidi ha gishina gia malamba a athu, nu gusaga muila wa athu gatshigina muene.

Hakhalele Yesu mulongesa mukatshi dia athu monzo, mala nguana ajile nu muenya khonzo mumoshi holu dia gitanda. Akhalele nu funu egi Yesu asage futa diawo. Uvi luholo athu akhalele avula, ene ahetelego luholo lua ‘gubata muthu muene gudi Yesu.’ (Mako 2:4) Tangiza luholo athu ene alebele muila. Anamatele holu dia inzo, amuangele yangi. Gungima, abulumuine gitanda giakhalele nu muenya khonzo uu nu moshi’a inzo.

Yesu wavile jikhabu luholo athu ene akalegele ngenyi ba? Ndo sha! Wayitugile diago muavula mukunda nu gutshigina guawo, hene wawambelele muenya khonzo egi: “Gubola guaye guatotesewa.” (Matayo 9:2) Uvi, Yesu wajiya diago gutotesela athu gubola guawo ba? Alongeshi a mikhuala nu Afalese azuelele mukunda nu ndaga yene egi: ‘Mukunda natshi muthu owu gadi muzuela ngenyi? Muene udi mushingana Nzambi. Muthu mutshi wajiya gutotesela athu gubola? Khuta Nzambi hakhenji!’—Mako 2:7.

Yesu wajiyile matangi awo, hene waadijigile egi: “Mukunda natshi mudi mudihula ngenyi mu mitshima yenu? Itshi idi yaleba, guwambela muenya khonzo egi, ‘Gubola guaye guatotesewa,’ nga gumuwambela egi ‘Zuga uzule gitanda giaye nda’?” (Mako 2:8, 9, NW) Yadiago, mu njila ya mulambu mbawuhana Yesu, wajiya gutotesela athu gubola guawo.

Ngenyi, Yesu wamonesele athu akhalele hene nu anyi akhalele gumutangijila muabola egi, udi nu ngolo jia gutotesela athu gubola ha mavu. Wavutugile gudi muenya khonzo, wamudijigile egi: “Ngudi guguwambela egi, Zuga uzule gitanda giaye, nda gumbo diaye.” Yala muene wazugile giphungu gimoshi, wazanguile gitanda gienji enji wayile ha meso a athu agasue. Athu adihudile diago! Atumbuishile Nzambi, azuelele egi: “Khenji tuamonele gale ndaga ya luholo elu”!—Mako 2:11, 12.

Idi diago funu ha gujiya egi Yesu wafuanesa gubola nu misongo, gutotesela gubola nu gukhala nu muila wabonga. Biblia yana gulongesa egi mvuaji yetu ya thomo, Adama, wakalegele gubola. Hene, mukuta wetu agasue tuana gumona malamba atubatele gubola guene, gifua misongo nu gufua. Uvi mu uhinyinyi wa Ufumu wa Nzambi, Yesu mbawutotesa gubola gua athu agasue ana guzumba Nzambi nu ana gumukadigila. Ngenyi, misongo mbayihua mayilago.—Lomo 5:12, 18, 19.