Yesu walongesele mu sinagoga ya gu Kaphelenauma egi muene udi dipha dia giamatshidia diakatugile mu dilu. Wawambelele luko mbimbi eji gudi athu akatugile gu khanda ya esti ha sambua dia Kianga gia Galile, anyi adile mapha nu jishui mu luholo lua gushimana.

Yesu walandudile guzuela egi: ‘Akhakha enu adile mana mu temu, uvi afuile.’ Uvi waawambelele luko egi: ‘Ame ngudi dipha dia monyo diakatugile mu dilu. Gula muthu wadia dipha edi, mbawukhala nu monyo wa ivo nu ivo. Dipha mbanguhana didi muila wami, mbangudihana hagula athu a ha mavu ahete monyo.’—Yone 6:48-51.

Mu printemps ya givo 30 gia tangua dietu, Yesu wawambelele Nikodemo egi Nzambi wazumbile mavu muavula, hene wahanele Mun’enji mumoshi ha mumoshi gifua Muhuluishi. Mu tangua diene, Yesu wamonesele funu ya gudia muila wenji, yakotelesa egi gusha gutshigina mu gibawu mbagahana. Luene luholo athu ajiya guheta monyo wa ivo nu ivo.

Uvi, athu avuile khabu mukunda nu mbimbi jiazuelele Yesu. Azuelele egi: ‘Luholo lutshi yala you wajiya gutuhua muila wenji hagula esue tuwudie?’ (Yone 6:52) Yesu watshiginyile egi athu ene akotelese egi muene wakhalele dipha mu luholo lua gufezegesa. Gakhalele ndo dipha dia diago. Ndaga jiazuelele luko muene gungima jidi guyimonesa.

‘Gula mushigo mudia muila wa Mun’a muthu, nu mushigo munua mahatshi enji, mushigo nu monyo mukatshi dienu. Muthu udi mudia muila wami nu udi munua mahatshi ami udi nu monyo wa ivo nu ivo, . . . handaga muila wami udi ima ya gudia ya diago, mahatshi ami adi ima ya gunua ya diago. Muthu udi mudia muila wami nu udi munua mahatshi ami, udi mubamba gudivua guenji nu ame.’—Yone 6:53-56.

Tangiza luholo mbimbi jiene jiahuile enya Yuda khabu! Yajiya gukhala atangijile egi Yesu wakhalele mutuma athu ha gudia muila wa muthu nga gushiya mukhuala wa Nzambi wakhalele mutunyisa gunua mahatshi. (Gisendeselo 9:4; Levi 17:10, 11) Uvi Yesu gakhalelego muzuelela gudia muila wenji nga gunua mahatshi enji mu gimona gia meso. Wakhalele mumonesa egi muthu wagasue watshigina guheta monyo wa ivo nu ivo, udi naye gumonesa gutshigina mu gibawu mbagihana muene, tangua mbagahana muila wenji watagana nu mbagahana mahatshi enji. Uvi, alandudi enji ako akoteleselego malongo ene. Ako mukatshi diawo azuelele egi: ‘Mbimbi eji jidi jiakola sha, nanyi wajiya gujitshigina?’—Yone 6:60.

Yesu wajiyile egi alandudi enji ako asuangulugilego nu ndaga yene, hene waahudile egi: ‘Mbimbi jinyi jidi gumisagesa mu mitshima yenu ba? Gula muamona Mun’a muthu udi mukanduga fundo gakhalele muene thomo, na itshi mbamukalagala? . . . Ndaga ngamiwambela jidi jia mu nyuma, jiana guhana monyo. Uvi ako mukatshi dienu ashigo mutshigina.’ Havile ene mbimbi eji, alandudi avula ayile gawo, abembele gumulandula.—Yone 6:61-64.

Gungima dienji, Yesu wahudile alandudi enji 12 muhu egi: “Nu enue nji muatshigina guya genu ba?” Phetelo wavutudile egi: “Fumu, tuya gudi nanyi? Aye udi nu mbimbi jia monyo wa ivo nu ivo. Esue tuatshiginyine gale, tuajiya egi aye udi Wagijila wa Nzambi.” (Yone 6:67-69) Ngatshima mu tangua diene Phetelo nu apostolo ako akoteleselego muabonga ndaga yalongesele Yesu, mbimbi jia Phetelo jia monesele diago egi akhalele a gujinginyina gudi Nzambi!

Ngatshima mvutu yahanele Phetelo ya musuanguluishile, Yesu wazuelele egi: ‘Ame ngamitombelego enue kumi nu muyadi ba? Uvi mumoshi mukatshi dienu udi munyamigishi.’ (Yone 6:70) Yesu wakhalele muzuelela Yudasa Isakaliota. Yajiya gukhala egi mu tangua diene, Yesu wamonele egi Yudasa wasendele gutshita ndaga nu matangi abola.

Uvi, Yesu wasuangulugile tangua diajiyile muene egi Phetelo nu apostolo ako abembelego gumulandula, nu gutshita n’enji mudimo udi mukuatesa athu ako ha guheta monyo.