Apostolo 12 ayile mulongesa mu membo a gu Galile. Gungima, awambelele Yesu ‘ndaga jiagasue jiatshitshile ene nu jialongesele ene.’ Idi yadiago egi akhalele a guhuila. Uvi, akhalelego nu tangua dia gudia handaga athu avula akhalele muhilagana gudi Yesu. Yesu waawambelele egi: ‘Izenu, tuyenu fundo diko, tuhuluguge hazonda.’—Mako 6:30, 31.

Yajiya gukhala egi akhalele hehi nu Kaphelenauma, anginyile mu wato, ayile ha sambua diakhalelego nu matululu gu khanda ya esti ya Muta wa Yordani hehi nu dimbo dia Betesayida. Uvi athu avula a amonele tangua akhalele mukatuga, ako nji avile ndaga yene. Mukut’awo agasue ayile mu phushi mu khulo ya muta munengena guza gua wato. Tangua Yesu nu alandudi enji ahetele ha sambua dia muta, asangele athu ene ahetshi gale.

Hazogele Yesu mu wato, wamonele athu avula, waavidile jikhenda, handaga akhalele gifua imeme yakhalelego nu mubambi. Wasendesele “gualongesa ndaga jiavula” jiatadila Ufumu. (Mako 6:34) Luko, ‘wasagele athu akhalele nu funu ya gusagewa.’ (Luka 9:11) Gungima, alandudi amuwambelele egi: ‘Fundo edi didi mu temu, kumbi nji diayi gale. Muanga athu awa mu membo hagula adisumbile ima ya gudia.’—Matayo 14:15.

Yesu waavutudile egi: ‘Ashigo naye guya ngenyi, enue hakhenu ahanenu ima ya gudia.’ (Matayo 14:16) Yesu wakhalele mujiya ndaga ya gukalagala, uvi wahudile Filipho mihu ha gumulola. Wamuhudile egi: ‘Gui tusumba mapha hagula athu awa adie?’ Yesu wahudile Filipho handaka muene wakhalele muenya gu Betesayida. Uvi gusumba mapha guakhalele ndo diago solisio, handaga mala akhalele 5 000. Gula tuabungisa nji akhetu nu ana, yajiya gukhala egi athu akhalele avula gubalega 10 000! Filipho wazuelele egi: ‘Makuta a denye [denye imoshi yakhalele lufuto ya mudimo wa lusugu lumoshi] khama jiyadi ajiyilego gusumbiwa mapha atagana hagula muthu wagasue ahete gitshinyi gia dipha.’—Yone 6:5-7.

Andre wazuelele egi: ‘Mona yala owu udi nu mapha atano alondewe nu phupha ya orje nu jishui jiyadi. Uvi ima eyi idi diago yatagana mukunda nu athu awa avula ngenyi ba?’ Yajiya gukhala egi wazuelele ngenyi ha gumonesa egi guakhalelego nu luhulo lua gudisa athu ene agasue—Yone 6:9.

Yakhalele mu givo 32 gia tangua dietu, hehi nu wano wa Pake. Mu sungi yene, mayiji ana gusaphutshila mu milundu. Yesu wawambelele alandudi enji ha guleza athu adikaphe mu tumahunji tua athu 50 nga 100. Wazudile mapha ene atano nu jishui mbadi, wahanele Nzambi mersi. Gungima wabatuile mapha nu jishui jiene itshinyi-itshinyi. Yesu wahanele mapha ene gudi alandudi ha guakaphela athu. Ndaga ya gushimana idi egi athu agasue adile nu akutshile!

Gungima, Yesu wawambelele alandudi enji egi: ‘Nonyenu itshinyi, hagula nga gima gimoshi gitotshigo.’ (Yone 6:12) Azalesele itunga 12 nu itshinyi yene ya mapha!