Henyaha Yesu nu alandudi enji adi muya gu khanda ya nordi ya Galile. Tudi mu sungi ya printemps, enji mu mahia, khenyi jidi hehi ha gukatudiwa. Alandudi akhalele muvua nzala, hene ahelele khenyi jia blé jiakhalele jia gukula, enji ajidile. Uvi yakhalele mu Lusugu lua Guhuluguga. Luko, Afalese amonele luholo alandudi akhalele muhela khenyi.

Jiya egi masugu azonda abalega, enya Yuda ako atshiginyile gushiya Yesu gu Yelusalema, amufundile egi washiyile mukhuala wa Lusugu lua Guhuluguga. Uvi mu tangua dinyi, Afalese afundile luko Yesu mukunda nu ndaga ya kalegele alandudi enji. Azuelele egi: ‘Tala! Alandudi aye adi mutshita ndaga tushigo naye gukalagala mu Lusugu lua Guhuluguga.’—Matayo 12:2.

Afalese azuelele egi mu Lusugu lua Guhuluguga, gula muthu wahela khenyi, wajishishita ha mago ha gudia, yakhalele mukotelesa egi udi mumuna nu gusuwa. (Guzoga 34:21) Luholo akhalele mukotelesa muabola mudimo wakhalele naye gukalegewa mu Lusugu lua Guhuluguga, luakhalele mubuisa lusugu luene gifua ginemo. Uvi mu guzuela guabonga, luakhalele lusugu lua gusuanguluga nu lua gudihana gikhesa mu nyuma. Hene, ha gumonesa egi matangi awo akhalele abola, Yesu waahanele ifezegeselo yamonesele egi Yehowa Nzambi ganago gutshigina nga hazonda egi tunemese mukhuala wene ngenyi.

Thomo, Yesu wahanele gifezegeselo gia Davidi nu athu enji. Tangua Davidi nu athu enji avuile nzala, anginyine mu inzo ya ntenta ya Nzambi, adile mapha ahanewe gudi Nzambi. Phamba nganga-nzambi jia khalele naye gudia mapha ene, gula akatudiwa gutuama dia Yehowa enji mapha ako ahagewa. Uvi mu Lusugu luene, Nzambi gahanelego Davidi nu athu enji ndola luholo adile mapha ene.—Levi 24:5-9; 1 Samuele 21:1-6.

 Mu gifezegeselo gia mbadi, Yesu wazuelele egi: ‘Enue khenji muatangele mu mikhuala ya Moise egi nganga-nzambi jia mu tempelo ya Nzambi jiana gushiya mukhuala wa Lusugu lua Guhuluguga uvi ishigo gubola ndo?’ Yesu watshiginyile guzuela egi ikhale mu Lusugu lua Guhuluguga, nganga-nzambi jiakhalele mushiya shitu ha guhana milambu nu gukalagala midimo iko mukatshi dia tempelo. Yesu wazuelele luko egi: ‘Ngudi gumiwambela egi haha gudi nu muthu wabalega tempelo gukoma.’—Matayo 12:5, 6; Lutango 28:9.

Yesu wakalegele mbimbi ya Nzambi ha guzola longo mu ndage eyi: “Nga muakotelesele mbimbi eji egi, ‘Ngatshigina guvuila athu khenda uvi shitu jia milambu ndo,’ nga muafishilego athu ako milonga.” Wasugishile egi: “Handaga Mun’a muthu udi Fumi’a Lusugu lua Guhuluguga.” Yesu wakhalele muzuelela uhinyinyi wenji wa guhuima mu Ufumu wenji wa ivo ginunu gimoshi.—Matayo 12:7, 8; Hoshea 6:6, NW.

Sendese mualeha, athu ana gumona lamba mu uhiga owu wabola wa Satana, wazala pha nu khuta nu ita. Uvi mu Lusugu luakoma lua Guhuluguga, mu uhinyinyi wa Klisto, ndaga jia luholo elu mbajikhadigo luko. Mu tangua diene, mbatukhala diago nu guhuima tudi nago funu.