Yesu walongesele muavula nu watshitshile ndaga jiakoma jia gushimana gu Galile. Uvi wazuelele egi: ‘Ngudi naye nji gulongesa lukuma luabonga lua Ufumu wa Nzambi mu membo ako.’ Ngenyi, wamonesele egi gakhalelego naye gulongesa phamba gu Galile. Hene, wayile ‘mulongesa mu sinagoga jia mu Yudea.’ (Luka 4:43, 44) Yakhalele diago tangua diabonga handaga yakhalele sungi ya printemps, luko wano wa gu Yelusalema wakhalele hehi.

Gula tuafanesa ndaga jidi muzuela ba Evanjile mukunda nu mudimo wa Yesu gu Galile, tuajiya gumona egi ba Evanjile ene anago guzuelela diago muavula mudimo wakalegele muene gu Yudea. Ngatshima athu avula a gu Yudea akhalelego mutshigina malongo enji, Yesu gabembelego gulongesa nu gikhesa nu gukalagala ndaga jiawaha gu Yudea.

Gungima, Yesu wayile gu Yelusalema, dimbo dimoshi diakoma mu Yudea, mukunda nu wano wa Pake wa givo 31 gia tangua dietu. guakhalele gijiba gimoshi giakoma giakhalele hehi nu Mufulo wa Imeme, giakhalele mutamegewa egi gijiba gia Beteseda. Enya misongo avula, nu ifofo, nu ikata akhalele muza gu gijiba giene. Mukunda natshi akhalele muza? Akhalele muza handaga athu avula akhalele mutangiza egi gula muenya misongo wangina mu gijiba giene tangua meya adi mudinyigisa tshipha-tshipha, wajiya gusagewa.

Henyaha, tudi mu lusugu lua guhuluguga. Yesu wasanga yala mumoshi hehi nu gijiba giene. Yala muene wakhalele nu misongo ivo 38 yabalega gale. Yesu wa muhudile egi: “Watshigina gusagewa ba?” Yala muene wazuelele egi: ‘Fumu, ngushigo nu muthu wa gungunginyisa mu gijiba tangua meya adi mudinyigisa. Uvi hangudi mukamba gungina mu gijiba, athu ako adi gungubalega.’—Yone 5:6, 7.

Yesu wazuelele ndaga imoshi ya yitugishile yala muene nu muthu wagasue mbawuyivua. Wazuelele egi: “Zuga! Zangula gitanda giaye, nda gaye.” (Yone 5:8) Yala muene wakalegele diago ngenyi. Wasagewe giphungu gimoshi, wazudile gitanda gienji, wasendesele guwenda!

Hafundo dia gusuanguluga mukunda nu ndaga yawaha ya gushimana eyi ya kalegewe, enya Yuda amonele yala muene, enji amubalele egi: “Mangino ludi lusugu lua guhuluguga, ushigo naye gubata gitanda.” Yala muene waadijigile egi: “Muthu wangusagi, muene wanguwambela egi, ‘Zangula gitanda giaye enji nda gaye.’” (Yone 5:10, 11, NW) Enya Yuda ene akhalele muzuela ndaga jiabola mukunda nu muthu wakhalele musaga athu mu Lusugu lua Guhuluguga.

Akhalele mutshigina gujiya, ahudile yala muene egi: “Nanyi waguwambela egi ‘Zangula gitanda giaye, enji nda gaye’?” Mukunda natshi ahudile yala muene ngenyi? Handaga Yesu ‘wanginyine mukatshi dia athu avula akhalele hanyi,’ luko yala wasagewe gakhalelego mujiya jina dia Yesu. (Yone 5:12, 13) Uvi gungima, yala muene wataganele luko nu Yesu, enji wajiyile egi muene wamusagele hehi nu gijiba gia meya.

Lusugu lumoshi, yala muene watagenele nu enya Yuda anyi amuhudile mukunda nu gusagewa guenji. Waawambelele egi muthu wamusagele udi Yesu. Tangua enya Yuda avile ngenyi, ayile gudi Yesu. Ayile hagula ajiye gui Yesu wakhalele muzangula ngolo jia gukalagala ndaga jia gushima jia luholo elu ba? Ndo. Ayile ha gumubalela handaga muene wakhalele mukalagala ndaga jiawaha mu Lusugu lua Guhuluguga. Asendesele luko gumumonesa lamba!