Hakatugile Yesu, Phetelo, Yakoba, nu Yone gu mulundu ha gubulumuga, ataganele nu athu avula. Ndaga imoshi yakhalelego muyila muabonga. Alongeshi a mikhuala ajietele alandudi a Yesu ha guamanesa. Athu adihudile diago tangua amonele Yesu, ayile phushi ha gumumenega. Wahudile alandudi enji egi: ‘Itshi mudi mumanela n’awo?’—Mako 9:16.

Yala mumoshi wakhalele mukatshi dia athu avula wafugamele gutuama dia Yesu, wamulezele egi: ‘Mulongeshi, ngaji nu mun’ami wa yala gudi aye handaga muene udi nu nyuma yabola, gashigo muzuela. Fundo diagasue idi gumukuata, idi gumubuisa hashi, mona wanazola mafulofulo gu kano, wana gudisuma mazo, wanabua tshididii. Ngabubila alandudi aye ha guyikatula uvi giakuma.’—Mako 9:17, 18.

Idi mumonega egi, alongeshi a mikhuala akhalele mumanesa alandudi handaga abingilego gusaga mon’a yala muene, yajiya gukhala akhalele guasegulula. Hafundo dia guhana mvutu gudi sha mona, Yesu wawambelele athu akhalele hene egi: ‘Oo enue athu a gindongo egi giabola gidi gishigo nu gutshigina, mbangukhala nenu hugo guleha gutshi? Ngudi naye ya gukhala nenu nu guhuiminyina hugo guleha gutshi?’ Mbimbi eji jiakola jiazuelele Yesu jiakhalele mutadila diago alongeshi a mikhuala handaga tangua muene gakhalelego hene, ene amanesele alandudi enji. Yesu wabalumugile gudi sha mona muene, wamuwambelele egi: “Jienu n’enji gudi ame.”—Matayo 17:17.

Hasuenele mona muene gudi Yesu, demo dia mubuishile hashi nu ngolo, dia munyigishile. Mona muene wasendesele gudibidinga mu mavu nu guzola mafulofulo gu kano. Yesu wahudile sh’enji egi: ‘Udi gale ngenyi masugu guvula gitshi?’ Wahanele mvutu egi: “Sendese ulenge wenji, mahugo avula diana gumumba gale mu tshiuya nu mu meya ha gumushiyisa.” Wabubile Yesu egi: “Gula wajiya gutshita  ndaga, utuvile khenda, utukuatese.”—Mako 9:21, 22.

Sha mona wakhalele mutangiza egi mona gashigo mukola, handaga alandudi a Yesu abingilego ha gumukuatesa. Uvi Yesu wamuwambelele egi: “Mukunda natshi udi muzuela egi ‘gula wajiya’? Gima giagasue gidi gialeba gudi muthu udi nu gutshigina.” Mu tangua diene, sha mona wazuelele mu dizui diakola egi: “Ngudi nu gutshigina nago. Ngukuatese ha fundo edi ngudi nu funu ya gutshigina!”—Mako 9:23, 24, NW.

Yesu wakhalele mutala athu avula akhalele muza gudi muene. Yesu wabalediele demo ha meso a athu avula egi: ‘Aye nyuma yana gubuisa muthu wafua kano nu matshui, ngudi guguwambela egi zoga gudi muene, unginyigo luko gudi muene!’ Hazogele nyuma yene, yakolologele mangololo, yakonyesele mona muabola. Gungima, mona muene wabuile hashi, gifua wafui. Hamonele athu ndaga yene, azuelele egi: “Muene wafua!” (Mako 9:25, 26) Uvi Yesu wamukuatele gu koko ha gumuzugisa, “mona yala wasagewe mu kumbi dinyi diago.” (Matayo 17:18) Yadiago, athu ayitugile gu ndaga Yesu wakalegele.

Gutuama egi Yesu atume alandudi enji ha guya mulongesa, waahanele ngolo jia guzola nyuma jiabola. Hene, tangua akhalele n’enji monzo ene hakhawo, amuhudile egi: ‘Mukunda natshi esue tuabingilego guzola nyuma inyi?’ Yesu wakotelesele egi handaga akhalele nu gutshigina guazonda, wawambelele egi: “Nyuma ya luholo elu yajiya guzolewa phamba mu gukombelela.” (Mako 9:28, 29, NW) Ha guzola demo diene diakola, akhalele nu funu ya gutshigina guakola nu gukombelela Nzambi a ahane ngolo jia gudizola.

Yesu wasugishile egi: “Giamatshidia ngudi gumiwambela egi gula mudi nu gutshigina gifua lumbale lua mutada, mbamuwambela mulundu owu egi, ‘Katuga guogu nda gunu,’ wene mbawukatuga, gushigo nu ndaga mbayimikolela ha gutshita.” (Matayo 17:20) Gutshigina guajiya diago gukhala nu ngolo jiavula!

Malamba anyi ana gukanga muthu njila ha gukula mu mudimo wa Yehowa, ajiya gumonega gifua mulundu waleha. Uvi gula tuakudisa gutshigina guetu, tuajiya gubinga malamba ene.