Gungima dia guwamba Afalese mukunda nu luholo akhalele mukalegela shigu jia mambuta, Yesu nu alandudi enji akatugile. Ayile gu Fenisia gu khanda ya Tile nu Sidona, awendele bakilometre avula gu khanda ya thunda.

Yesu wahetele inzo ya gukhala, uvi gatshiginyilego egi athu ajiye egi udi guene. Uvi, athu amumonele. Mukhetu mumoshi wamumonele. Mukhetu muene wavalewe gu Fenisia, uvi mvuanji jienji jiakhalele enya zuelelo dia Greki. Watogele Yesu egi: ‘Nguvuile khenda Fumu, Mun’a Davidi. Mun’ami wa mukhetu udi wa gukuatewa gudi nyuma yabola.’—Matayo 15:22; Mako 7:26.

Tangua diazonda gungima, alandudi awambelele Yesu egi: ‘Mukaye avutuge, handaga udi gutulandula nu gukaluluga.’ Hagumonesa gishina gatayelego thomo mukhetu muene, Yesu wazuelele egi: “Ame ngatumiwe khuta gudi imeme yagutota ya giphuta gia Isalele.” Uvi mukhetu muene gambelego gusha matululu. Wasuenele gudi Yesu, wabuile gu tuama dienji. Wazuelele egi: ‘Fumu, ngukuatese!’—Matayo 15:23-25.

Yesu wazuelele gifua muakhalele muzuela enya Yuda; yajiya gukhala egi watshitshile ngenyi ha gulola gutshigina gua mukhetu muene, wazuelele egi: ‘Guhana mapha a ana gudi tuana tua jimbua gushigo mulonga wabonga.’ (Matayo 15:26) Hazuelele Yesu egi ‘tuana tua jimbua,’ wamonesele khenda gudi athu akhalelego enya Yuda. Yajiya gukhala egi phala y’enji nu dijui dienji diamonesele diago khenda jiene.

Mukhetu muene gavuilego jikhabu, uvi wavutugidile nji luholo lua guzuela lua enya Yuda. Wazuelele nu gudibulumuisa guagasue egi: ‘Ayi, fumu, uvi tuana tua jimbua tuana gudia isasu yanabua gu mesa a fumi’ajio.’ Yesu wamonele egi mukhetu muene wakhalele nu matangi awaha, wamuwambelele egi: ‘Mukhetu, gutshigina guaye gudi guakoma, ndaga igutshitshiwe gifua mu watshigina.’ (Matayo 15:27, 28) Mona muene wakhalele gualeha, uvi wavile muabonga! Havutugile mukhetu muene gumbo dienji, wasangele mun’enji holu dia gitanda, udi gale muabonga diago—‘nyuma yabola yazogi gale’!—Mako 7:30.

Yesu nu alandudi enji akatugile gu Fenisia, ayile gu khanda ya thunda ya Muta wa Yordani. Yajiya gukhala egi azawugile muta wa Yordani gu mbongo ya Kianga gia Galile, ha guya gu Dekapholi. Gungima, akandugile holu dia mulundu, uvi athu avula ayile guasanga guene. Athu ene abatele ikata, nu athu agubogoga, nu ifofo, nu mbombo gudi Yesu. Ahagele athu ene akhalele nu ukhashi mu malu a Yesu; muene waasagele. Athu adihudile muavula, atumbuishile Nzambi wa Isalele.

Yesu wahagele matangi muavula gudi muthu mumoshi wakhalele wa gufua matshui, muthu muene gakhalelego nji muzuela muabonga. Tangiza gale luholo muthu muene gakhalele gudivua mukatshi dia athu avula. Yajiya gukhala egi Yesu wamonele luholo muthu muene wakhalele muvua woma, hene wamukatudile mukatshi dia athu avula. Hakhalele ene muyadi, Yesu wamuwambelele ndaga gatshiginyile gumutshitshila. Yesu wambile mino yenji mu matshui a muthu muene, wafitshile mate, gungima wakuatele dimi dienji. Yesu watalele gosa, wazuelele egi: “Efata” yakotelesa egi ‘Kanguluga.’ Mu tangua diene, muthu muene wasendesele guvua nu guzuela muabonga. Yesu gatshiginyilego egi ndaga yene ijiyiwe, watshiginyile egi athu amutshigine mu ndaga adi mumona nu guvua ene hakhawo.—Mako 7:32-36.

Ngolo jia Yesu, jia gutshita ndaga eji jia gushimana jiakuatele muavula mitshima ya athu, hene ‘ashimanene mangololo.’ Azuelele egi: “Muene watshita milonga yagasue muabonga. Wavuishisa afua matshui nu guzuelesa afua makano.”—Mako 7:37.