Enya Yuda akhalele gu nordi ya khulo ya Kianga gia Galile avuile egi Yesu wakatugile gu dimbo dia Dekapholi. Yajiya gukhala egi athu avula avile egi Yesu wahenesele funji nu matshiphatshipha akola mu meya; yajiya gukhala egi ako mukatshi diawo akhalele mujiya egi wasagele yala mumoshi wakhalele nu bademo. Hene, ‘athu avula’ ajile gu kianga ha guyamba Yesu, yajiya gukhala egi akhalele gu khanda ya Kaphelenauma. (Mako 5:21) Hazogele Yesu mu wato, khungi’awo agasue akhalele nu gusuanguluga nu nzala ya gumumona.

Mukatshi dia athu ene akhalele nu nzala ya gumona Yesu, tuajiya gutanga Yayilo fumu wa sinagoga ya gu Kaphelenauma. Wafugamene gu malu a Yesu, wamutogele muavula egi: ‘Mun’ami wa mukhetu udi nu ukhashi wakola. Ngabuba, iza umukuate mago hagula akole, akhale nu monyo.’ (Mako 5:23) Itshi Yesu gakitshile tangua Yayilo wamutogele ha gukuatesa mun’enji khuta mungoshi wa mukhetu, wa ivo 12, gakhalele muene muzumba muavula?—Luka 8:42.

Hakhalele Yesu muya gumbo dia Yayilo, watagenele nu ndaga iko ya gikenene. Athu avula akhalele muya nu Yesu akhalele gudihula, gula amuya mumona luko ndaga iko ya gushimana. Uvi, mukatshi dia athu muakhalele nu mukhetu mumoshi wakhalele gudisagesa muavula mukunda nu misongo yenji.

Sendese tangua mukhetu muene wa mu Yuda wakhalele mukata misongo ya lusanza lua mahatshi, ivo 12 ya balega gale. Wakambele ukuateshi gudi minganga yavula, wamanele makuta enji agasue ha gusagewa. Uvi gahetelego ukuateshi. Hene “misongo yenji yayile nu gudivudisa.”—Mako 5:26.

Gifua luholo mudi mujiya, misongo yenji yakhalele diago gumulebesa muila nu gumuhana musonyi. Muguzuela guabonga, misongo ya luholo elu ana guyizuelela ndo ha meso a athu avula. Luko, mu mukhuala wa Moise, mukhetu wagasue wakhalele muzoga mahatshi wakhalele mutalewa gifua muenya usala. Muthu wagasue wakhalele gumukuata, nga gukuata milele yenji ya mahatshi, wakhalele naye guzua meya, uvi nu muene nji wakhalele mutalewa gifua muenya usala uu nu mu ngueze.—Levi 15:25-27.

Mukhetu muene ‘wavile lukuma lua Yesu’ hene gayile nu gumukamba. Luholo misongo yene yakhalele gumubuisa gifua muenya usala, wayile nu gudiwemba mukhatshi dia athu. Wakhalele mudizuelela egi: “Gula ngakuata gami nga mulele wenji wa holu, ngudi musagewa.” Hakuatele muene mulele wa Yesu wa holu, wavile egi misongo yenji ya lusanza lua mahatshi yahuile mu tangua diene! Mukhetu muene “wasagewe gu misongo yenji yakola.”—Mako 5:27-29, NW.

Yesu wahudile egi: ‘Nanyi wangukuata?’ Mudi mutangiza egi mukhetu muene wadivile luholo lutshi tangua Yesu wahudile ngenyi? Ndaga yene yayitugishile Phetelo, wawambelele Yesu egi: ‘Athu avula adi gugujieta nu gugukuata khanda nu khanda.’ Mukunda natshi Yesu wahudile egi ‘Nanyi wangukuata?’ Yesu wazuelele egi: ‘Muthu mungoshi wangukuata, handaga ngudi gudivua egi ngolo jia nguzoga.’ (Luka 8:45, 46) Gusagewa guene guakatugile mu ngolo jia Yesu.

Hakotelesele muene egi ndaga yenji yajiyiwa, wafugamele gutuama dia Yesu, wakhalele mudigita nu woma wagasue. Watele lumene lua misongo yenji gutuama dia athu agasue nu luholo misongo yene yahuile. Yesu wa muwambelele nu guzumba guagasue egi: ‘Mun’ami wa mukhetu, gutshigina guaye guaguhuluisa. Nda mu guhuima ukhale waguweluga gu misongo yaye yakola.’—Mako 5:34.

Yadiago, muthu wago Nzambi watombele ha gukhala fumu wa ha mavu udi muenya gisemo nu khenda, luko ganago guvila phamba athu jikhenda uvi wana gukalegela ngolo jienji ha guakuatesa!