Phetelo wavuile luholo Yesu wahanele longo diatadila luholo aphangi ajiya gumanesela milonga ene akhawo. Uvi, yajiya gukhala egi Phetelo watshiginyile gujiya diago gula muthu udi naye gutotesela muko mahugo guvula gutshi.

Phetelo wahudile egi: ‘Fumu, ngajiya gutotesela phangi’ami gubola mahugo guvula gutshi gula muene gashigo mubemba gungutshitshila gubola? Uu mahugo sambadi ba?’ Mafumu ako a mangumba akhalele mulongesa egi muthu udi naye gutotesela muthu muko gubola uu mahugo atatu. Hene, yajiya gukhala Phetelo watangijile egi wajiya gumonesa mutshima wabonga gula watotesela phangi gubola “uu nu mahugo sambadi.”—Matayo 18:21.

Uvi, matangi a gutangela athu ako gubola guatutshitshile ashigo gudivua nu ndaga ya longesele Yesu. Hene, wawambelele Phetelo egi: ‘Ngushigo guguwambela egi uu mahugo sambadi, uvi uu mahugo 77.’ (Matayo 18:22) Mu guzuela guko, yakotelesa egi ishigo nu gisugishilo. Phetelo gakhalelego naye gutanga guvula gua mahugo adi naye gutotesela phangi’enji.

Gungima, Yesu wahanele gifezegeselo gudi Phetelo nu athu ako ha guamonesa egi adi naye gutotesela athu ako gubola. Gifezegeselo giene gidi muzuelela muenya mudimo yonu galandudilego khadilo dia khenda dia fumi’enji. Fumu mumoshi watshiginyile egi enya mudimo enji amufute mikudi. Amubatele muenya mudimo mumoshi wakhalele nu mukudi wakoma wa talanta 10 000 [badenari 60 000 000]. Gakhalelego nu luholo lua gufuta mukudi wene. Hene fumu wazuelele egi muenya mudimo muene nu mukaji’enji nu an’enji adi naye gudigiwa hagula mukudi ufutshiwe. Uvi, muenya mudimo wafugamene ha mabongo mu malu a fumi’enji, wamububile egi: ‘Khala nu guhuiminyina gudi ame, mbangugufuta mukudi waye wagasue.’—Matayo 18:26.

Fumi’a muenya mudimo wamuvidile khenda hene wamubembele mukudi wenji wakoma. Hatshitshile fumu ngenyi, muenya mudimo wayile musanga muenya mudimo na muko wakhalele nu mukudi wenji wa badenari 100. Wamukuatele mu shingo, wamukamele ha muminyo, wazuelele egi: ‘Futa mukudi wami wagasue.’ Ngenyi muenya mudimo na muko wafugamene ha  mabongo mu malu enji, wamububile egi: ‘Khala nu guhuiminyina gudi ame, mbangugufuta.’ (Matayo 18:28, 29) Uvi, muenya mudimo yago wakhalele nu mukudi wakoma wa fumu galandudilego khadilo dia gutotesela dia fumi’enji. Wazudile muenya mudimo na muko, yago gakhalelego nu mukudi wakoma, wamumbile mu bologo uu nu tangua mbagafuta mukudi wenji.

Gungima Yesu wazuelele egi, hamonele enya mudimo n’ako ndaga ya shidi yatshitshila futa diawo, ayile muwambela fumi’awo. Fumi’awo wavuile khabu, watamegele muenya mudimo wago gakhalelego nu khenda, wamuwambelele egi: ‘Udi muenya mudimo wabola, ngagutotesele mukudi waye wagasue handaga wangububile. Wakhalelego naye guvuila muenya mudimo na muku’enu khenda gifua mungaguvuidile aye khenda ba?’ Fumu wavuile khabu, wamuhanele gudi abambi a bologo hagula amumbe mu bologo uu nu hafuta muene mukudi wagasue. Yesu wasugishile egi: ‘Tata wami udi mu dilu mbawumitshitshila nji ngenyi khungi yenu yagasue gula mushigo mutoteseela aphangi’enu gujimbila guawo nu mitshima yenu yagasue.’—Matayo 18:32-35.

Longo diabonga mukunda nu esue mu ndaga yatadila gutotesela! Nzambi watutotesele mukudi wakoma wa gubola guetu. Gubola guagasue guajiya gutukalegela phangi’etu, gudi guazonda diago, gushigo gifua gubola guatutotesele Nzambi. Luko, Yehowa ganago gututotesela gubola phamba hugo dimoshi, uvi mahugo avula. Tuajiyilego gutotesela phangi’etu gubola mahugo avula, ngatshima tudi nu gishina gia guvua khabu ba? Luholo Yesu walongesele mu Diskur dienji dia holu dia Mulundu, Nzambi ‘mbawututotesela gubola guetu, gifua luholo tuatotesele athu ako gubola guatutshitshile ene.’—Matayo 6:12.