Hakhalele Yesu mulongesa athu mu dimbo dia Sezarea-Filiphi, didi mu bakilometre 25 nu mulundu wa Helemona, wawambelele apostolo egi: ‘Ngudi gumiwambela giamatshia egi, athu ako adi haha mbaashigo mufua gila khenji amona gale go Mun’a muthu muza mu Ufumu wenji.’—Matayo 16:28.

Alandudi akoteleselego ndaga yakhalele muzuela Yesu. Gungima dia masugu azonda, Yesu wazudile apostolo mutatu—Phetelo, Yakoba, nu Yone—wakandugile n’awo holu dia mulundu. Yajiya gukhala egi yakhalele mu phipha diago handaga alandudi ene mutatu akhalele muwunduga. Hakhalele Yesu musamba, wabalumugile mu tangua diene. Apostolo amonele egi phala yenji ya sendesele guhenya gifua tangua, nu milele yenji yakhalele muhenya gifua muanya.

Gungima, athu muyadi azogele “Moise nu Eliya”. Asendesele guzuela nu Yesu ndaga yatadila ‘guya guenji, gudi naye gukalegewa gu Yelusalema.’ (Luka 9:30, 31) Guya guene guakotelesele gufua nu gufuzumuga gua Yesu, luholo muene hakhenji wadiangele guyizuelela. (Matayo 16:21) Maga Yesu gatele nu athu ene mbadi amonesele egi Phetelo wadihuigile handaga, gufua gua Yesu guakhalelego ndaga ya gulenga.

Apostolo ene mutatu akotelesele diago, akhalele mutala nu gutegelela, ashimanele diago. Yakhalele vizio, uvi yakhalele mumonega diago gifua ndaga ya giamatshidia, hene Phetelo wakambele gudinginyisa mu maga awo, wazuelele egi: ‘Mulongeshi, idi ndaga yabonga luholo tudi haha. Tujige jinzo jitatu jia matenta, iko yaye, iko ya Moise, iko ya Eliya.’ (Mako 9:5) Phetelo watshiginyile gujiga jinzo jia tenta hagula vizio yene ilehe luko?

Hakhalele Phetelo muzuela, tuta dila kedi-kedi diaatshuigile. Dijui dimoshi diazogele mu tuta diene, diazuelele egi: ‘Yowu udi mun’ami, ngana guzumba muavula, ngamutshigina. Mutegelelenu.’ Tangua apostolo avile dijui dia Nzambi, avile woma, gungima afulumigile phala jiawo hashi, uvi Yesu waawambelele egi: ‘Zugienu. Muvigo woma.’ (Matayo 17:5-7) Tangua apostolo azumbudile mito, amonelego muthu muko, phamba Yesu. Vizio yakhalele yahui gale. Mu gimenegena, tangua akhalele mubulumuga mu mulundu, Yesu waawambelele egi: ‘Mutelago muthu ndaga ya vizio eyi uu tangua mbadifuzumuga Mun’a muthu gu gufua.’—Matayo 17:9.

Gumonega gua Eliya mu vizio yene, guatumine apostolo ha guhula Yesu egi: “Mukunda natshi alongeshi a mikhuala ana guzuela gamba Eliya udi naye ya gudianga guza?” Yesu waabalumuine egi: ‘Eliya wajile gale, uvi athu amujiyilego.’ (Matayo 17:10-12) Yesu wakhalele muzuelela Yone Mubatiji, handaga watshitshile mudimo luholo lumoshi nu Eliya. Eliya walondele njila mukunda nu Elisha, luholo lumoshi nji Yone Mubatiji walondele njila mukunda nu Klisto.

Vizio yene yahanele Yesu nu apostolo gikhesa! Yadiangele guamonesa lutumbu lua Ufumu wa Klisto. Alandudi amonele gutagana gua laji diahanele Yesu egi mbaamona “Mun’a muthu muza mu Ufumu wenji.” (Matayo 16:28) Holu dia mulundu, ‘amonele gutumbuga gua Yesu nu meso awo.’ Ngatshima Afalese atogele Yesu gijiyishilo giakhalele mumonesa egi muene udi Fumu yago Nzambi watombele, Yesu gaahanelego nagio. Uvi Yesu wahanele alandudi enji njila ya gumona gutumbuga guenji. Ndaga yene yataganesele profesi jiatadila Ufumu. Gungima, Phetelo wasonegele egi: ‘Tudi nu mbimbi jiazuelewe ngambi jidi diago jia giamatshidia.’—2 Phetelo 1:16-19.