Athu avula ayile gudi Yesu gu Dekapholi, gu esti ya Kianga gia Galile. Ayile ha gumutegelela nu ha gusagewa. Abatele nji itunga yakoma mukunda nu gumba ima ya gudia.

Gungima, Yesu wawambelele alandudi enji egi: ‘Ngudi muvuila athu awa khenda handaga tuabalegesa gale n’awo masugu atatu, ashigo nu ima ya gudia. Gula ngaamuanga mu membo awo nu nzala, adi mulehuga mu njila, handaga ako akatugile gualeha.’ Alandudi ahudile Yesu egi: ‘Gui guajiya guhetewa mapha atagana mu temu mumu ha gudisa athu awa?’—Mako 8:2-4.

Yesu waahudile egi: ‘Mudi nu mapha guvula gutshi?’ Alandudi azuelele egi: “Sambadi, nu jishui jiazonda.” (Matayo 15:34) Gungima, Yesu wawambelele athu ha gukhala hashi. Wazanguile mapha nu jishui, wakalegele gisambu, waahanele gudi alandudi enji hagula akaphele athu. Ndaga ya gushima idi egi, athu agasue adile nu akutshile. Mala akhalele 4 000, nu akhetu nu ana. Uvi tangua anonele itshinyi yabuile, azalesele itunga yakoma sambadi!

Yesu wawambele athu ha guvutuga gumbo diawo, gungima muene nu alandudi enji azawugile mu wato ha guya gu Magadana, gu westi ya Kianga gia Galile. Tangua akhalele guene, Afalese nu Asadoke ayile gudi Yesu mukunda nu gumulola. Amuwambelele ha guadijiga gijiyishilo gidi mumonesa egi ngolo jienji jiakatugile mu dilu.

Yesu wakotelesele matangi awo, waavutudile egi: “Mu kumbi dia ngueze muanazuela egi, ‘Hamene mbagutshia muabonga handaga dilu didi diabenga,’ mu gimenegena muana guzuela egi, ‘Mangino mvula iza munoga handaga dilu didi diabenguluga.’ Enue muana gukotelesa muabonga phala ya dilu, uvi muajiyilego gukotelesa ijiyishilo ya indongo eyi.” (Matayo 16:2, 3, NW) Gungima Yesu wawambelele Afalese ene nu Asadoke egi mbaashigo muheta gijiyishilo giko, phamba gijiyishilo gia Yona.

Yesu nu alandudi enji anginyile mu wato ha guya mu dimbo dia Betesayida gu khanda ya thunda ya kianga. Hakhalele ene muya, alandudi awungulugile egi abembi mapha. Asalele khuta nu dipha dingoshi. Yesu wakhalele mutangiza maga atele nu Afalese nu Asadoke a gu khanda ya Helode. Wawambelele alandudi enji egi: ‘Temienu; tunenu levire ya Afalese nu levire ya Helode.’ Alandudi atangijile gifua Yesu wazuela ndaga ya levire mukunda nu luholo ajimbidile ha guzula mapha. Hakotelesele Yesu matangi awo, waawambelele egi: ‘Itshi mudi gudihudila mihu mukunda nu mapha muabembi?’—Mako 8:15-17.

Luholo tuayimonyi gale, Yesu wadishile athu avula. Ndaga yene yakhalele naye gukuatesa alandudi ha gukotelesa egi Yesu gakhalelego muzuelela mapha. Waawambelele egi: ‘Mushigo muwunguluga luholo ngahanele mapha gudi mala 5 000, muazalesele itunga guvula gutshi  nu itshinyi ya mapha?’ Amuvutudile egi: “Kumi nu iyadi.” Yesu waahudile luko egi: “Tangua ngabatuile mapha sambadi ha guhana mala 4 000, muazalesele itunga guvula gutshi nu itshinyi ya mapha?” Ene azuelele egi: “Sambadi.”—Mako 8:18-20.

Yesu waahudile luko egi: ‘Luholo lutshi mushigo mukotelesa egi ngakhalelego muzuela ndaga ya mapha?’ Wazuelele luko egi: ‘Temienenu levire ya Afalese nu Asadoke.’—Matayo 16:11.

Gungima, alandudi akotelesele. Levire yana gumbiwa mu phupha ha gujimbisa pate ya mapha. Yesu udi mukalegela mbimbi levire ha guzuelela gubola. Wakhalele muwambela alandudi enji ha gutemena “malongo a Afalese nu Asadoke,” handaga akhalele abola.—Matayo 16:12.