Yesu nu alandudi enji ahetele gu Betesayida. Athu ajile nu gifofo gimoshi gudi Yesu, amutogele ha gugikuata hagula gimone.

Yesu wakuatele gifofo giene gu koko, wazogele nagio hanze ya dimbo. Watshidile mate gu meso a gifofo giene, gungima wagihudile egi: “Udi mumona gima ba?” Gifofo giamuwambelele egi: “Ngudi mumona athu, uvi adi mumuenega gifua mitshi idi muwenda.” (Mako 8:23, 24) Yesu wambile mago enji gu meso a gifofo, gungima giamonele. Yala muene wasendesele gumona muabonga diago, Yesu wamuwambelele ha guya gumbo dienji, wamutunyishile nji ha gungina luko mu dimbo.

Gungima, Yesu nu alandudi enji ayile gu khanda ya nordi, gu dimbo dia Sezarea-Filiphi. Akhalele naye guwenda bakilometre hehi nu 40. Dimbo diene diakhalele holu dia mulundu. Mulundu wene wakhalele hehi nu mulundu waleha wa Helemona udi nu neje jiavula. Ha gukatuga gu kianga ha guheta gu Sezarea, muthu udi naye gukanduga ba metre 350. Yajiya gukhala egi awendele masugu mbadi.

Hakhalele ene mu njila, Yesu wabembele alandudi enji, wayile hakhenji mutshita gisambu. Yesu wakhalele gudisagesa mukunda nu alandudi enji, handaga guasalele phamba mbeji 9 nga 10 hagula ashiyiwe. Athu avula ambembele gumulandula, yajiya gukhala egi ako mukatshi dia athu ene alebele muila nga ndo akhalele nu badute. Yajiya gukhala egi akhalele gudihula gishina Yesu watunyile tangua athu atshiginyile gumubuisa fumu, nga gishina muene gamoneselego haphelo gula wakhalele diago nanyi.

Tangua alandudi ayile ha fundo diakhalele Yesu mukalagala gisambu, waahudile egi: “Athu adi muzuela egi ame Mun’a muthu ngudi nanyi?” Amuwambelele egi: “Ako adi muzuela egi, ‘Yone mubatiji,’ ako egi ‘Eliya,’ ako egi ‘Yelemiya, nga profete muko wa Nzambi.’” Yadiago, athu akhalele mutangiza egi Yesu wakhalele profete mumoshi wa Nzambi wafile, uvi wafuzumuga. Ha gujiya matangi a alandudi enji, Yesu waahudile egi: “Uvi enue mudi muzuela egi ame ngudi nanyi?” Phetelo wazuelele egi: ‘Aye udi Klisto Mun’a Nzambi wa monyo.’—Matayo 16:13-16.

Yesu wazuelele egi Phetelo udi naye gusuanguluga luholo Nzambi wamukuatesele ha gujiya ndaga yene. Wamudijigile egi: “Ngudi guguwambela luko egi: Aye udi Phetelo, holu dia seso eyi mbangutunga hungu diami, mifulo ya Galunga mbayishigo guwubalega jingolo.” Yesu wakhalele guawambela egi muene hakhenji mbawutunga hungu, gila enya hungu diene asala agujinginyina, mbashigo musala mu uhiga wa Galunga. Walayile Phetelo egi: “Mbanguguhua saphi jia Ufumu wa mu dilu.”—Matayo 16:18, 19, NW.

Yesu gahagelego Phetelo ha fundo dia thomo mukatshi dia apostolo, gamubuishilego nji fondasio ya hungu. Yesu muene hakhenji udi Seso, holu dienji, hene hungu mbaditungiwa. (1 Kolinto 3:11; Efeso 2:20) Uvi, muene wakhalele n’aye guhanewa saphi jitatu. Muene wakhalele naye guheta luendu lua gukangula njila gudi athu avula ha gungina mu Ufumu wa mu dilu.

 Mu Pantekote ya givo 33 gia tangua dietu, Phetelo wakalegele saphi ya thomo, ha guwambela enya Yuda nu athu akhalelego enya Yuda abalumuine mitshima yawo ndaga adi naye gukalagala hagula ahuluishiwe. Wakalegele saphi ya ngiadi ha gukangudila enya Samaliya njila ya gungina mu Ufumu wa Nzambi. Gungima, mu givo 36 gia tangua dietu, Phetelo wakalegele saphi ya thatu ha guhana njila ya Ufumu wa Nzambi gudi athu a ifutshi anyi ambiwego gu mukanda, gifua Korneyi, nu athu ako.—Makalegelo 2:37, 38; 8:14-17; 10:44-48.

Apostolo a Yesu avile gikenene tangua Yesu waawambelele egi mbawumonesewa lamba nu mbawushiyiwa mu dimbo dia Yelusalema. Phetelo gajiyilego egi Yesu mbawufuzumuga ha guya mu dilu, hene wasendesele gumubela egi: ‘Fumu, uzuedigo mulonga wa luholo elu; ndaga eyi igubuilago nga hazonda.’ Uvi, Yesu wabalumugile, wamuwambelele egi: ‘Balega gu kunda diami, Satana! Udi gikhakhuishilo handaga matangi aye ashigo a Nzambi, uvi adi matangi a athu.’—Matayo 16:22, 23.

Gungima, Yesu watamegele athu ako nu apostolo enji; waamonesele egi gukhala mulandudi wenji mbagushigo mukhala ndaga yaleba. Wazuelele egi: ‘Gula muthu watshigina gungulandula, aditune hakhenji, azangule mutshi wenji wa lamba, enji alandule gunguhata. Handaga muthu watshigina guhuluisa monyo wenji mbawuwutotesa. Uvi muthu wago watotesa monyo wenji mukunda nu ame nu lukuma luabonga, mbawuwuhuluisa.’—Mako 8:34, 35.

Yadiago, hagula Yesu atshigine muthu gifua mulandudi wenji, muthu muene udi naye gukhala nu gikhesa, enji udi naye gudihana. Yesu wazuelele egi: ‘Muthu wagasue udi munguvuila ame nu mbimbi jiami musonyi mu gindongo egi gia uthambi nu gia milonga yabola, Mun’a Muthu mbawumuvuila nji sonyi tangua mbadiza muene nu anjelo enji mu gutumbuga gua Sh’enji.’ (Mako 8:38) Yadiago, tangua mbadiza Yesu, ‘mbawushimbiga athu ha gutadila midimo ya muthu nu muthu.’—Matayo 16:27.