Mu givo 32 gia tangua dietu, tangua diazonda gutuama dia wano wa Pake, Yesu walongesele muavula gu Galile. Gungima, wayile gu Yelusalema. Yajiya gukhala wayile mukunda nu wano wa Pake gifua luholo Mukhuala wa Nzambi wakhalele muzuela. Uvi, Yesu wayile mu gisuegi handaga enya Yuda akhalele mukamba ha gumushiya. (Yone 7:1) Gungima, wavutugile gu Galile.

Yajiya gukhala egi tangua Afalese nu alongeshi a mikhuala a gu Yelusalema ayile mutala Yesu, amusangele gu Kaphelenauma. Mukunda natshi ayile gumutala? Akhalele mukamba luholo lua gumonesa egi Yesu udi muthu wabola. Amuhudile egi: ‘Mukunda natshi alandudi aye adi mushiya shigu jia mambuta? Tala, ashigo muwevua mago awo gutuama dia gudia.’ (Matayo 15:2) Nzambi gahanelego nga hazonda athu enji mukhuala ha ‘guwevua mago uu nu gu khokhona.’ (Mako 7:3) Uvi gudi Afalese, gila muthu gawevelego mago uu nu gu khokhona, muthu muene washiya diago mukhuala.

Hafundo dia guahana gueteya gu ndaga jiawo jia mambo, Yesu wamonesele haphelo luholo ene akhalele mushiya Mukhuala wa Nzambi. Waahudile egi: “Gishina gitshi mudi mushiyila Mukhuala wa Nzambi mukunda nu shigu jia mambuta? Nzambi wambile Mukhuala egi, ‘Unemese sh’aye nu gin’aye, luko muthu udi musegulula sh’enji nu gin’enji udi naye ya gushiyiwa.’ Uvi enue muana gulongesa egi, ‘Gila muthu wawambela sh’enji nga gin’enji egi shinda dia ima yami dingatshigina gumihua ha gumikuatesa, diahanewa gale gudi Nzambi, muthu muene gashigo naye luko gunemesa sh’enji nga hazonda.’”—Matayo 15:3-6; Guzoga 20:12; 21:17, NW.

Afalese akhalele muzuela egi gila muthu udi nu matangi a guhana makuta, nga umonyi, nga ima iko gudi Nzambi, ima yene idi ya tempelo, hakiene, yajiyilego gukalegewa mukunda nu ndaga iko. Uvi, mu guzuela gua giamatshidia, uu nu mu tangua diene ima yene yakhalele khuta ya fumi’a nayo. Tufezegese: Mona mumoshi wajiya guzuela egi mbongo jiami, nga umonyi wami udi “korban,” yakotelesa egi, mbongo jiene nga umonyi wene udi kado gatangiza muene ha guhana gudi Nzambi nga ha guhana gu tempelo. Zuelelo diene didi mumonesa gifua kado gene gadi gale ga tempelo, uvi uu nu mu tangua diene, gadi gudi mona muene. Luko, mona muene wajiya guyikalegela yagasue yatshigina muene, ngatshima mu kano udi muzuela egi gajiyilego guyikuatesela mvuaji jienji eji jiakula nu jidi nayo funu. Didi Khadilo dia gulenga gukuatesa mvuaji jienji.—Mako 7:11.

Yesu wavile gikenene luholo athu akhalele mubolesa mbimbi ya Nzambi, wazuelele egi: “Mudi muzangela mbimbi ya Nzambi mukunda nu shigu jienu jia mambuta. Enue enya mambo, Yeshaya wabingile genji hazuelele muene ha ndaga yenu egi, ‘Athu awa adi gungunemesa nu ivungu yawo, uvi mitshima yawo idi gualeha nu ame. Ene adi mulaba gungukombelela, adi mulongesa phamba mikhuala ya athu.’” Afalese akhalelego nga nu mbimbi ya guvutula gu ndaga yazuelele Yesu. Gungima, Yesu watamegele athu ha gusuena hehi nu muene. Wazuelele egi: “Vuenu, nu kotelesenu ndag’eyi, gima gidi mungina mu kano gianago gubolesa muthu, uvi gidi muzoga mu kano dia muthu giene giana gumubolesa.”—Matayo 15:6-11; Yeshaya 29:13, NW.

Gungima, hakhalele Yesu monzo nu alandudi enji, amuhudile egi: ‘Aye mujiya egi Afalese amonyi gubola tangua avui ndaga wakhadi muzuela?’ Yesu waawambelele egi: ‘Mutshi wagasue wakunyiwego gudi Tata wami udi mu dilu, mbawuvujiwa. Abembienu, adi atuameji adi nu meso a gufua. Gula gifofo gidi mutuameza gifofo na muko, iyadi tshima mbayibua mu wina.’—Matayo 15:12-14.

Phetelo wahudile mu jina dia alundudi agasue egi Yesu a akotelesele gima giana gubolesa muthu. Muhu wene wayitugishile Yesu, waavutudile egi: ‘Nu enue nji khenji mukotelesago egi gima giagasue gidi mungina mu kano, giana guya mu vumo, gu ngima giana guzolewa mu khumba? Uvi, ima yana guzoga mu kano, yana gukatuga mu mutshima; nu yene yana gubolesa muthu. Ha gufezegesa, mu mutshima  muene muana guzoga matangi abola: matangi abola, gushiya athu, uthambi, unzangi, uthemua wa mambo nu mashingo. Ima eyi, yene yana gubolesa muthu, uvi gudia nu mago adi ashigo aguweva, guanago gubolesa muthu.’—Matayo 15:17-20.

Yesu gatunyishilego athu ha gukhala nu khadilo diabonga, gakhalelego mumonesa egi muthu gashigo naye ya guwova mago gutuama dia gulondega ima ya gudia nga gutuama dia gudia. Uvi, wakhalele mutuna khadilo dia mulebo dia mafumu a mangumba handaga akhalele muhinganesa shigu jia mambuta ha fundo dia Mikhuala yabonga ya Nzambi. Ndaga ya giamatshidia idi egi: makalegelo abola adi mu mutshima ene ana gubolesa muthu.