Gungima dia gumonega mu lutumbu luenji nu dia gusaga mona yala yago wakhalele nu demo mu dimbo dia Sezarea-Filiphi, Yesu wayile gu dimbo dia Kaphelenauma. Wayile mu gisuegi nu alandudi enji, handaga gatshiginyinego egi athu ‘ajiye ndaga yene.’ (Mako 9:30) Gukalagala ngenyi guamuhanele njila ya gulondega matangi a alandudi enji mukunda nu gufua guenji, nu mukunda nu mudimo mbaakalagala gungima. Waawambelele egi: “Mun’a muthu mbawuhanewa mu mago a athu. Ene mbamushiya. Uvi mu lusugu lua thathu, muene mbawufuzumuga gu gufua.”—Matayo 17:22, 23.

Ndaga yene yakhalelego gima gihe-gihe gudi alandudi enji. Yesu wadiangele guzuelela gufua guenji tangua Phetelo watunyile egi ndaga yene mbayishigo mubua ngenyi. (Matayo 16:21, 22) Luko, apostolo thathu amonele gubalumuga gua Yesu mu lutumbu, avile nji maga a ‘guya’ guenji. (Luka 9:31) Mu tangua diene, alandudi a Yesu avile ‘gikenene giavula diago’ mukunda nu ndaga jiazuelele muene, ngatshima akhalelego mukotelesa muabonga mbimbi ji’enji. (Matayo 17:23) Uvi, akhalele muvua woma ha gumuhula ndaga yene.

Gungima ahetele gu dimbo dia Kaphelenauma, fundo diakhalele Yesu mukalagala midimo yenji muavula. Apostolo avula akhalele nji enya dimbo diene. Tangua ahetele guene, afutshishi a gitadi ayile gudi Phetelo. Yajiya gukhala akhalele mukamba gufunda Yesu egi ganago gufuta gitadi, hene ahudile Phetelo egi: ‘Mulongeshi wenu gashigo mufuta gitadi gia tempelo ba?’—Matayo 17:24.

Phetelo wazuelele egi: “Ayi, udi mufuta”. Tangua Phetelo wavutugile fundo diakhalele alandudi ako, Yesu wakhalele mujiya ndaga ya mubuidile. Hene, hafundo dia gunenga egi Phetelo azuelele ndaga yene, Yesu wahudile egi: ‘Simona, itshi udi mutangiza? Mafumu a ha mavu ana gufutshisa gitadi gudi akuatshi? Gudi an’awo nga gudi ngenji?’ Phetelo wazuelele egi: ‘Gudi ngenji.’ Hene, Yesu wamuwambelele egi: ‘Yadiago, ana ashigo naye gufuta gitadi.’—Matayo 17:25, 26.

Sha Yesu udi Fumu wa ha mavu agasue, muene athu akhalele mukombelela mu tempelo. Hene, Mun’a Nzambi gashigo naye gufuta gitadi gia tempelo. Uvi, Yesu wamuwambelele egi: ‘Tuabuishigo mu gubola, nda gu kianga, umbe ndobo mu kiawu. Uzangule ishui ya thomo, mbawudiangela gukuata gu ndobo. Tangua mbawukangula mu kano diayo, mbawusanga kiamo gia mbongo [gia setatele]. Ugizule waahane nagio mukunda nu gitadi giami nu giaye.’—Matayo 17:27.

Gungima, alandudi akhalele luko fundo dimoshi, ahudile Yesu muhu egi nanyi Mbawukhala muthu wakoma mu Ufumu. Masugu azonda abalega, alandudi awa avile woma ha guhula Yesu muhu watadila gufua guenji, uvi mu tangua edi avuilego woma ha guhula Yesu mukunda nu ndaga jidi naye guabuila mu masugu adi muza. Yesu wajiyile matangi awo. Tangua akhalele muza gungima dia Yesu ha guvutuga gu Kaphelenauma, akhalele amaanyi gale mukunda nu ndaga yene. Hene waahudile egi: ‘Itshi muakhadi mumanela mu njila?’ (Mako 9:33) Alandudi avile musonyi , ahenele tedie, handaga akhalele amanyi gale ha gujiya nanyi udi muthu wakoma mukatshi diawo. Gu gisugishilo, alandudi ahudile Yesu muhu watadila ndaga yakhalele ene mumaanela mu njila. Amuhudile egi: ‘Nanyi wabalega ako gukoma mu Ufumu wa mu dilu?’—Matayo 18:1.

Idi ndaga ya gudihula gula alandudi a Yesu adi naye gumana mukunda nu ndaga yene gungima  dia gubalegesa n’enji ivo hehi nu thathu ha gumona nu gumutegelela. Uvi, tujimbilago egi akhalele athu ashigo atagana. Luko, akudile mu mangumba a athu atshigina lukuma luavula. Luko nji, Phetelo wavile luholo Yesu wamulayile “saphi” jia Ufumu. Yajiya gukhala egi, wadivuile gifua wabalega athu ako? Yajiya gukhala egi, Yakoba nu Yone adivile nji ngenyi handaga amonele luholo Yesu wabalumugile mu lutumbu luenji.

Ikhale ngenyi nga ndo, Yesu wakalegele ndaga ha gulondega matangi awo. Watamegele mona wazonda, wamumagenesele mukatshi diawo, gungima wawambelele egi: ‘Gula mushigo mubalumuga ha gubua gifua ana azonda, mbamunginyigo mu Ufumu wa mu dilu. Muthu wagasue wadibulumuisa gifua mon’owu wazonda, wabalega ako agasue gukoma mu Ufumu wa mu dilu; muthu wagasue udi mutshigina mona mungoshi mu jina diami, wangutshigina ame.’—Matayo 18:3-5.

Luholo luabonga lua gulongesa! Yesu gavidilego alandudi enji khabu, nu guatamega egi enya ngina jia ima nga ndo adi mukamba lukuma. Uvi, wakalegele gifezegeselo gia ana azonda ha guahana longo. Ana azonda anago gudikanduisa nga gukamba lukuma. Hene, Yesu wamonesele alandudi enji egi adi naye gukudisa khadilo diene. Hagusugisa longo diatadila alandudi enji, Yesu wawambelele egi: ‘Muthu udi wabalega guzonda mukatshi dienu, muene udi mubalega gukoma.’—Luka 9:48.