Yesu wahanele gifezegeselo giamonesele khadilo alandudi enji adi naye gukhala nadio. Adi naye gukhala gifua ana azonda, gudikanduisa ndo, uvi a gudibulumuisa. Alandudi akhalele naye ‘gutshigina ana mu jina dia Yesu, ngenyi yakhalele mumonesa egi adi mutshigina nji Yesu.’—Matayo 18:5.

Luholo apostolo akhalele mumana ha gujiya nanyi udi muthu wakoma mukatshi diawo, yajiya gukhala amonele mbimbi jia Yesu gifua waabalele. Henyaha, mupostolo Yone wejile nu lumene lua ndaga iko yabuile, wawambelele Yesu egi: ‘Fumu, tuamonyi muthu mukatula nyuma jiabola mu jina diaye, tuamukandele handaga muene gakhalelego mutulandula.’—Luka 9:49.

Yone watangijile egi phamba apostolo ahanewe njila ya gusaga nga guzola nyuma jiabola ba? Gula idi ngenyi, luholo lutshi giwa muenya Yuda yonyi wabingile ha guzola nyuma jiabola? Yone wamonele gifua muthu muene gakhalelego naye gukalagala ngenyi handaga gakhalelego muwenda nu Yesu nu apostolo.

Yone wadihudile tangua Yesu gazuelele egi: ‘Mumukandjigo, muthu gajiyilego gutshita ndaga ya gushimana mu jina diami, hangima gaji gangutumbuila ndaga yabola. Handaga muthu wagasue udi gashigo gututuna, udi nu esue. Muthu wagasue wamihua meya agunua ndaga ya mudi aklisto, ngudi mumiwambela egi, giamatshidia muene mbawuheta lufuto luenji.’—Mako 9:39-41.

Mu tangua diene, yakhalelego mutoga egi muthu muene awende nu Yesu ha gukhala gu khanda yenji. Hungu dia Uklisto diakhalele khenji dizoga galego, hene luholo muthu muene gakhalelego muwenda nu Yesu, yakoteleselego egi watunyile Yesu nga wakhalele mukuatesa gikombelelo gia mambo. Idi yadiago egi muthu muene wakhalele nu gutshigina mu jina dia Yesu. Luko, ndaga yazuelele Yesu yamonesele egi muthu muene mbagashigo mutotesa gishimbigo gienji.

Gukhanda iko, yakhalele naye gukhala ndaga yabola gula muthu muene wakalagele gubola mukunda nu mbimbi nu ndaga jia tshitshile apostolo. Yesu wazuelele egi: ‘Muthu wabuishisa mu gubola mona mungoshi wa mukatshi dia ana awa angutshigina, ya balega gubonga akudige muthu muene seso yakoma mu shingo nu ambiwe mu kianga.’ (Mako 9:42) Gungima, Yesu wazuelele egi alandudi enji adi naye gukatula gima giagasue giajiya guatuma ha gutshita gubola ikhale gima giene gidi nu ndando yavula, gifua koko, kulo, nga diso. Idi yabalega gubonga egi tukhadigo getu nu gima giene gia ndando uvi tungine mu Ufumu wa Nzambi, hafundo dia gukhala nu gima giene gungima tuabishidiwa mu Gehena (Bengi dia Hinoma). Yajiya gukhala egi, apostolo akhalele mumona bengi edi diakhalele hehi nu Yelusalema, fundo diakhalele muwetshiewa mvindu. Hene, akotelesele egi bengi diene diakhalele mumonesa gufua gua mayilago.

Yesu waatemesele nji egi: ‘Temienu, musegululago nga muthu mumoshi mukatshi dia athu awa azonda, handaga ngudi gumiwambela egi anjelo awo mu dilu ana gutala tangua diagasue phala ya Tata wami udi mu dilu.’ ‘Athu awa azonda’ adi diago nu ndando itshi gudi sh’enji? Yesu watele lumene lua  muthu mumoshi wakhalele nu imeme 100 uvi watotesele gimeme gimoshi. Muthu muene wabembele imeme 99 ha guya mukamba gimeme gimoshi giatotele. Hagimonele muene, wasuangulugile muavula gubalega imeme iko 99. Yesu wazuelele luko egi: ‘Ngenyi Tata udi mu dilu, gashigo mutshigina egi nga mungoshi mukatshi dia athu awa azonda atote ndo.’—Matayo 18:10, 14.

Yajiya gukhala egi Yesu wawungulugile luholo apostolo enji akhalele mumana ha gujiya gula nanyi udi wakoma gubalega ako. Hene, wawambelele egi: ‘Khalenu nu mungua mu mitshima yenu, khalenu nu guhuima nu athu ako.’ (Mako 9:50) Mungua wana gukalagala egi ima ya gudia ikhale yafula. Mu luholo lua gufuanesa, mungua wana gutshita egi mbimbi jidi muzuela muthu jitshiginyiwe, nu jiajiya gukuatesa ha gubamba guhuima, uvi gumana guana gubata ndo guhuima.—Kolosai 4:6.

Matangua ako, milonga yajiya guzoga, uvi Yesu wamonesele luholo lua guyisugisa. Wazuelele egi: ‘Gula phangi’aye wagutshitshila gubola, nda umuwambele gujimbila guenji enue muyadi’enu. Gula waguvuila, wamubuisa phangi’aye luko.’ Uvi gula gagutegelelego? Yesu wazuelele egi: ‘Nda nu muthu muko mungoshi nga muyadi, ngenyi mbimbi jiagasue jitagenesewe mu makano a matemue muyadi nga mutatu.’ Gula watuna gumivuila, mudi naye guwambela ‘hungu,’ yakotelesa egi, guwambela akulu handaga ene ajiya guzula desizio. Uvi itshi wajiya gukalagala gula mutshitshi’a gubola walandula gutuna guavuiila? ‘Akhale genji gudi aye gifua muphaganu nga gifua mufutshishi wa gitadi,’ athu anyi enya Yuda akhalelego mukuata nawo ufuta.—Matayo 18:15-17.

Akulu a mu hungu adi naye gulandula ndaga jidi mu Mbimbi ya Nzambi. Gula amona egi muthu wakalagala gubola, nu yatoga egi ahanewe ndola, hanyinyi gusophesa guawo mbagukhala ‘guajitshigiwa gale mu dilu’. Uvi gula amona egi muthu muene gatshitshilego gubola, gusophesa guawo mbagukhala ‘guajituluiwa gale mu dilu.’ Malongo awa akuatesele diago Aklisto tangua hungu dia Uklisto diazolewe. Tangua Aklisto adi mutalela ndaga jia luholo elu, Yesu wazuelele egi: “Hadi athu muyadi nga mutatu gudibungisa mu jina diami, ngudi mukatshi diayo.”—Matayo 18:18-20.