Yesu wabalegesele ivo mbadi mu mudimo wa gulongesa mbimbi ya Nzambi. Gungima dienji, wazudile desizio dia guhuluguga ba? Ndo, wadilondele ha gulongesa luko muavula, ‘wayile mu membo agasue akoma nu azonda [a gifutshi gia Galile], mulongesa mu ikombelelo yawo nu mukotelesa Lukuma Luabonga lua Ufumu. Muene wakhalele musaga misongo nu ukhashi wa maluholo agasue.’ (Matayo 9:35) Ndaga jiamonele muene, jiamutshiginyishile egi lukuma luabonga ludi naye gulongesewa mu mafundo avula. Uvi, luholo lutshi gajiyile guyikalagala?

Hakhelele Yesu muwenda, wamonele athu akhalele nu nzala ya ukuateshi udi mu mbimbi ya Nzambi. Akhalele gifua imeme ishigo nu mubambi, gifua idi mumonesewa lamba nu ya bishidiwa. Wavidile athu ene khenda, wawambelele alandudi enji egi: ‘Ima ya gumuna idi yavula uvi amunyi adi azonda. Ngenyi mutoge fumi’a mudimo wa gumna atume enya mudimo ha gumuna.’—Matayo 9:37, 38.

Yesu wajiyile ndaga ya gutshita. Watamegele apostolo enji 12, waatumine muyadi-muyadi. Gungima waawambelele haphelo egi: “Muyigo gu khanda ya athu a ifutshi iko, munginyigo nga mu dimbo dingoshi dia enya Samaliya. Uvi ndienu gudi imeme ya gutota ya enya Isalele. Muye nu gulongesa egi: ‘Ufumu wa mu dilu udi gale hehi.’”—Matayo 10:5-7.

Ufumu wakhalele ene mulongesa udi Ufumu wazuelele Yesu mu gisambu gia gifezegeselo. ‘Ufumu wa mu dilu wakhalele hehi’ handaga, Yesu, fumu Nzambi watombele ha gutuameza Ufumu wene, wakhalele hene. Uvi, itshi yakhalele naye gumonesa  egi alandudi akhalele diago muzuelela Ufumu wene? Yesu waahanele ngolo jia gusaga enya misongo nu gufuzumuna athu. Akhalelego mutoga makuta ha gukuatesa athu. Luholo lutshi apostolo akhalele naye guheta ima ya gudia nga ima iko akhalele nayo funu?

Tangua ayile mulongesa mu membo ene, Yesu wawambelele alandudi enji egi ashigo naye gubata ima ya gudia nga ima iko. Akhalelego naye gubata wolo nga utadi wa siliva nga mbongo mu makuba awo. Akhalelego naye gubata nga ima ya gudia mu njila, nga ikuto iyadi, nga saphata. Mukunda natshi? Yesu waawambelele egi: ‘Muenya mudimo udi naye guhuiwa idi nayo muene funu.’ (Matayo 10:10) Athu anyi mbaatshigina lukuma luabonga, mbaahana alandudi tuma tuazonda mbaakhala nato funu. Yesu wazuelele egi: ‘Inzo yagasue mbamungina, khalenu muene uu nu tangua mbamuzuga ha guya khanda iko.’—Mako 6:10.

Yesu waawambelele luholo lua guwambela afumi’a inzo ndaga yatadila Ufumu wa Nzambi, wazuelele egi: ‘Gila muangina monzo, menegenu fumi’a inzo. Gila enya inzo adi atagana, guhuima guenu gukhale muene. Uvi gula adi monzo ashigo atagana, guhuima guenu guvutuge gudi enue. Gula gu inzo ya muthu nga mu dimbo dingoshi amitshiginyilego nga amitegelelego, tangua mudi mukatuga ha fundo diene, lugumunenu fuphi ya gu ikanzo yenu.’—Matayo 10:12-14.

Matangua ako, athu agasue a dimbo dimoshi, akhalele mutuna lukuma luabonga. Ndaga itshi yakhalele naye gubua mukunda nu dimbo diene? Yesu wamonesele egi malamba akola mbaabuila dimbo diene. Wazuelele egi: ‘Ngudi gumiwambela giamatshidia egi mu Lusugu lua Gusophesa, lamba dia dimbo dinyi mbadibalega lamba dia Sodoma nu Gomola gukola.’—Matayo 10:15.