Yayilo wamonele luholo Yesu wasagele mukhetu wakhalele mukata misongo ya lusanza lua mahatshi. Yadiago, watangijile egi Yesu wajiya nji gukuatesa mun’enji, ngatshima, muene wakhalele mutangiza egi ‘mona muene wakhalele wafi gale.’ (Matayo 9:18) Mona mukhetu muene wajiyile diago gukuatesewa ba?

Hakhalele Yesu muzuela nu mukhetu gasagele muene, mala akatugile gumbo dia Yayilo a muwambelele egi: ‘Mun’aye wa mukhetu wafi gale!’ Azuelele luko egi: “Mukunda natshi udi mulaba gusagesa luko mulongeshi?”—Mako 5:35.

Lumene luene lua musagesele diago! Yayilo wakhalele munemesewa muavula mu dimbo dienji, uvi mu tangua diene, guakhalelego nu muthu wa gumukuatesa. Mun’enji phamba mumoshi wa mukhetu wafile. Yesu wavile lumene luene, watalele Yayilo, wamuwambelele nu gikhesa giagasue egi: ‘Ukhadigo nu woma, monesa phamba gutshigina.’—Mako 5:36.

Gungima Yesu wavutugile hangoshi nu Yayilo gumbo dienji. Tangua ahetele, asangele athu avula gumbo dia Yayilo. Athu ene ahagele masaga, akhalele mudila nu gikenene giavula. Yesu wanginyine monzo, gungima wazuelele ndaga ya itugishile athu egi: “Mona gashigo wagufua, udi mubanda tulo.” (Mako 5:39) Tangua athu avile ndaga eyi asendesele gulela Yesu. Akhalele mujiya egi mona mukhetu wafile genji diago. Uvi, Yesu wakalegele ngolo jia muhanele Sh’enji ha gumonesa egi athu agufua mbaafuzumuga, luholo lumoshi nu athu ana guzuga gu tulo tuakola.

Yesu wazolele athu agasue hanze, wasalele phamba nu Phetelo, Yakoba, Yone nu mvuanji jia mona wafile. Yesu wayile nu athu ene mutano fundo diakhalele mona muene. Wamukuatele gu koko, wazuelele egi: “‘Talita kumi,’ idi mukotelesa egi: ‘Mona mukhetu, ngudi guguwambela egi “zuga!”’” (Mako 5:41, NW) Mu tangua diene, mona mukhetu muene wazugile, wasendele guwenda. Tangiza luholo Yayilo nu mukaji’enji asuangulugile luholo amonele mun’awo muwenda! Ndaga iko ya monesele egi mona mukhetu muene wajingile luko yakhalele luholo Yesu wawambelele athu ha gumuhana ima ya gudia.

Hakhalele Yesu musaga athu, wakhalele guatunyisa ha guwambela athu ako ndaga yene; watunyishile nji mvuaji jia mona mukhetu ha guwambela athu. Uvi luholo mvuaji jiene nu athu ako akhalele nu gusuanguluga, amuangele lukuma lua ndaga yene “mu khanda inyi yagasue.” (Matayo 9:26) Gila wamona gufuzumuga gua muthu mumoshi wana guzumba, wajiyilego guyiwambela athu ako nu gusuanguluga guagasue ba? Lulu lumene lua ngiadi lua sonegewe, ludi mumonesa egi Yesu wafuzumuine muthu.