Yesu udi gumbo dia Mufalese Simona, wazuelela khadilo dia gutotesela gubola. Matangua azonda gungima, wawendele luko Galile gagasue ha gulongesa lukuma luabonga. Yakhalele givo gienji gia mbadi gia mudimo wa gulongesa. Wakhalele nu apostolo enji 12, nu akhetu ako ‘akatudiwe nyuma jiabola nu asagewe gu misongo yawo.’ (Luka 8:2) Mukatshi diawo, tuajiya gutanga Mariya Magadala, Suzana, nu Yoana. Mulumi’a Yoana wakhalele fumu wa masuta a Fumu Helode Antipase.

Athu avuile lukuma lua ndaga jiakhalele mukalagala Yesu, hene asendesele gusha giphapha mukunda nu mudimo wenji. Ndaga yene yamonegele haphelo tangua abatele yala mumoshi wakhalele nu bademo, wakhalele gifofo nu gakhalelego muzuela. Amubatele gudi Yesu hagula amusage. Gungima, yala muene wasagewe, gakhalelego luko nu bademo, wasendesele gumona nu guzuela. Athu akhalele hene adihudile, azuelele egi: ‘Muthu owu gajiyilego gukhala Mun’a Davidi ba?’—Matayo 12:23.

Athu avula azalele gu inzo yakhalele mujinga Yesu. Akhalele avula gubalega, hene Yesu nu alandudi enji ahetelego tangua dia gudia. Uvi athu agasue akhalelego mutangiza egi Yesu udi “Mun’a Davidi” watendelewe. Alongeshi a mikhuala nu Afalese akatugile gu khanda jiagasue jia dimbo dia Yelusalema. Uvi ajilego mukunda nu gutegelela Yesu nga mukunda nu gumukuatesa. Akhalele muwambela athu egi: “Muene udi nu Belezebula.” Udi mukalegela nji ngolo jia ‘fumu wa ba demo.’ (Mako 3:22) Tangua aphangi’a Yesu avuile ndaga athu akhalele muzuela mukunda nu Yesu, ajile ha gumukuata. Mukunda natshi?

Mu tangua diene, aphangi’a Yesu nji akhalelego mutshigina egi Yesu udi Mun’a Nzambi. (Yone 7:5) Yesu wago wakhalele ha gishina gia matululu gashigo yonyi ajiyile tangua akhalele mukula nenji gu Nazaleta. Hene azuelele egi: “Muene wasaluga.”—Mako 3:21.

 Uvi ndaga jidi mukalagala muene jidi mumonesa itshi? Yesu wakatuga gusaga muthu mumoshi wakhalele nu bademo, luko muthu muene wasendesa luko gumona nu guzuela. Gushigo nga muthu mumoshi wajiya gutuna ndaga eyi. Uvi alongeshi a mikhuala nu Afalese azuelele ndaga jia mambo mukunda nu gubolesa lukuma lua Yesu. Azuelele egi: ‘Muthu yowu udi mukatula bademo khuta mu jina dia fumi’awo Belezebula.’—Matayo 12:24.

Yesu wakhalele mujiya ndaga Alongeshi a mikhuala nu Afalese akhalele mutangiza, hene wawambelele egi: ‘Ufumu wagasue udi gudikhaphumuna hakhawo, mbawuzangelewa, luko dimbo diagasue didi gudikhaphumuna hakhadio mbadimaganago. Luholo lumoshi nji, gula Satana udi mukaya Satana, hanyinyi udi wa gukhaphumuga hakhenji; luholo lutshi giwa ufumu wenji mbawumagana?’—Matayo 12:25, 26.

Idi diago ngenyi! Afalese akhalele mujiya egi enya Yuda ako akhalele mukalagala mudimo wa guzola athu bademo. (Makalegelo 19:13) Hene Yesu wazuelele egi: ‘Gula ame ngudi mukatula bademo mu jina dia Belezebula, an’ennu giwa ana gukatula bademo mu jina dia nanyi?’ Ngenyi, ndaga jiabola akhalele muzuela mukunda nu Yesu jidi mutadila nji an’awo. Yesu wazuelele luko egi: ‘Uvi gula ngudi mukatula bademo mu jina dia Nyuma ya Nzambi, na Ufumu wa Nzambi waza gale gudi enue.’—Matayo 12:27, 28.

Gula Yesu wakhalele mukatula bademo, yamonesele diago egi udi nu ngolo gubalega Satana. Hene, wazuelele egi: ‘Luholo lutshi muthu wajiya gungina monzo ya muthu mumoshi udi nu ngolo jiavula, gazudi ima ya muthu muene gula thomo gakuatelego muthu muene ha gumukanga ngonji? Udi naye gukanga thomo muenya ngolo mu ngonji, gungima gazangula giwa ima yenji ya monzo. Muthu wagasue udi gashigo nu ame, udi mbalagaji wami, nu muthu wagasue gashigo mubungisa hamoshi nu ame, udi mumuanga.’ (Matayo 12:29, 30) Alongeshi a mikhuala nu Afalese akhalelego mutshigina Yesu, ngenyi amonesele diago egi akhalele akombeledi a Satana. Akhalele mumuanga athu hagula asuenyigo hehi nu Mun’a Nzambi, wago wakhalele mukalagala ndaga jia gushimana nu ngolo jia Yehowa.

Yesu wawambelele akombeledi anyi a satana egi: ‘Nzambi mbawutotesela gubola guagasue gua athu, ikhale akalegele gubola gua luholo lutshi nga azuelele ndaga jia gusegulula jia luholo lutshi. Uvi muthu washingana nyuma ya Nzambi, mbaamutoteselago mayilago handaga wakalagala gubola gua ivo nu ivo.’ (Mako 3:28, 29) Tangiza milonga adi gudikambela luholo adi muzuela egi ndaga jia kalegele Yesu mu ngolo jia Nzambi wajitaganesele nu ngolo jia Satana!