Gungima dia gubalegesa masugu mbadi gu Samaliya, Yesu wayile mu dimbo diawo. Walongesele muavula mu Yudea, uvi gavutugilego gu Galile ha guhuluguga. Wasendesele mudimo wakola wa gulongesa mu dimbo diakudile muene. Wajiyile egi athu mbaashigo gumuyamba muabonga handaga muene hakhenji wazuelele egi: ‘Profete gana khalago nu gutumbuga gumbo diawo.’ (Yone 4:44) Hagula egi alandudi enji asale nenji, amubembele, enji avutugile gu jinzo jiawo nu gu midimo yawo akhalele mukalagala thomo.

Ndaga itshi Yesu wasendesele gulongesa? Wakhalele mulongesa egi: “Ufumu wa Nzambi udi hehi. Balumunienu mitshima, tshiginyenu lukuma luabonga.” (Mako 1:15) Luholo lutshi enya gu Galile atadile ndaga yene? Athu avula a gu Galile ayambele Yesu muabonga, enji amuhanele ginemua. Uvi a mutshiginyilego handaga wawambelele egi Ufumu wa Nzambi udi hehi; avula mukatshi diawo, akhalele gu Pake gu Yelusalema mu mbeji jiabalega, enji amuenene ndaga jia gushimana jiakalegele Yesu.—Yone 2:23.

Mu dimbo ditshi dia distrike ya Galile Yesu wasendesele mudimo wenji wakoma wa gulongesa? Idi mumonega egi wasendesele mu dimbo dia Kana, fundo dia balumuine muene meya matombe gu wano wa ulo. Hakhalele muene gu Kana giphungu egi gia mbadi, Yesu wavuile egi mona yala mumoshi udi mukata mangololo, udi hehi nu gufua. Mona muene wakhalele mun’a gaphungu ga guvernere Helode Antipase, fumu wago mbawushiya Yone Mubatiji. Gaphungu gavuile egi Yesu wakatuga gu Yudea, udi mu dimbo dia Kana. Hene, gakatugile gumbo dienji gu Kaphelenauma, gayile gu Kana ha gudimona nu Yesu. Gaphungu gene gakhalele nu gikenene giavula, gabubile Yesu egi: ‘Fumu, iza hagidi mun’ami khenji gafua gale.’—Yone 4:49.

Yesu wamuhanele mvutu, luko mvutu yene yayitugishile gaphungu. Yesu wazuelele egi: ‘Nda gaye; mun’aye udi nu monyo.’ (Yone 4:50) Gaphungu ga Helode gatshiginyile ndaga ya muwambelele Yesu, gavutugile gumbo dienji. Hakhalele muene muya, watagenele nu enya midimo enji anyi akhalele muza muphushi ha gumuwambele ndaga yabonga egi mun’enji wakolele, enji udi nu sante yabonga! Muene waahudile egi: ‘Tangua ditshi diasendesele muene guvua muabonga?’

Ene amuvutudile egi: ‘Fievre ya muhui hamene mu tangua dia sambadi.’—Yone 4:52.

Gaphungu gatangijile enji gamonele egi, yakhalele diago mu tangua diazuelele Yesu egi, ‘Mun’aye udi nu monyo.’ Yala owu wakhalele muenya umonyi handaga wakhalele nu enya midimo gumbo dienji. Gungima dia ndaga eyi, muene nu enya gu inzo yenji abuile alandudi a Klisto.

Yesu wakalegele ndaga mbadi jia gushimana mu dimbo dia Kana. Thomo, wabalumuine meya matombe, gungima wasagele mona yala mumoshi gualeha gu bakilometre 26. Yadiago, Yesu gakalegelego phamba ndaga eji mbadi jia gushimana. Uvi, gusaga gua mona yala owu guakhalele nu funu diago handaga guamonesele guvutuga guenji gu Galile gifua profete wa Nzambi. Uvi, profete owu ‘wahanewe diago lutumbu mu dimbo diawo ba’?

Mbatuyijiya muabonga handaga Yesu wavutugile gu Nazaleta, mu dimbo diakudile muene. Ndaga itshi yakhalele gumunengena guene?