Yadiago, athu a mu dimbo dia Nazaleta adi nu gusuanguluga guavula. Givo gimoshi nu ndambo gutuama egi Yone amubatize, Yesu wakhalele mukalagala mudimo wa mabaya gu Nazaleta. Uvi henyaha, athu adi gumujiya gifua muthu wana gukalagala ndaga jiakoma jia gushimana. Enya gu Nazaleta adi nu nzala egi Yesu a akadigile ndaga jia gushimana mu dimbo diawo.

Nzala yawo yakolele luko tangua Yesu wayile mu sinagoga yawo gifua muakhadile khadilo dienji. Mu sinagoga, akhalele mukalagala gisambu, mutanga mikanda ya Moise, gifua luholo yakhalele mukalegewa “masugu agasue a guhuluguga.” (Makalegelo 15:21) Akhalele nji mutanga itshinyi ya mikanda ya sonegele ba profete. Tangua Yesu gazugile mu molu ha gutanga, yajiya gukhala egi wajiyile athu avula wakhalele muza nawo mu sinagoga eyi ivo yavula ya balega gale. Amuhanele rulo ya profete Yeshaya. Wamonele fundo diana guzuelela muthu wambiwe maji mu nyuma ya Yehowa. Mangino, ndaga yene idi mu mukanda wa Yeshaya 61:1, 2.

Yesu watangele luholo muthu owu wadiangele guzuelewa mbawulongesa guhuluga gua athu adi mu bologo, gukanguga gua meso a ifofo nu guza gua givo gia tshiginyile Yehowa. Yesu wavutudile rulo gudi muenya mudimo, gungima wakhalele hashi. Athu agasue akhalele gumutala. Yajiya gukhala egi gungima dia tangua dia zonda wazuelele ndaga eji jia funu: ‘Mangino, mbimbi ya Nzambi eyi muadivuila nu matshui enu, yatagana.’—Luka 4:21.

Athu ayitugile ha guvua ‘mbimbi jiabonga jiazogele mu kano guenji,’ adihudile egi: ‘Yowu gashigo muna Yozefe ba?’ Uvi, Yesu wakotelesele egi enya Nazaleta akhalele mutshigina egi muene a akadigile ndaga jiakoma jia gushimana gifua luholo avuile lukuma lua ndaga gakalegele. Hene waawambelele egi: “Yadiago, mbamungutela gishima egi ‘Munganga, disage aye hakhaye. Kalagala nji mu dimbo diaye, ndaga tuavuile jia kalegewe gu Kaphelenauma.’” (Luka 4:22, 23, NW) Athu awa akhalele mujinga dimbo dimoshi nu Yesu akhalele nu funu egi Yesu asendese thomo gusaga enya mu dimbo dienji handaga adi aphangi’enji. Hene, amonele diago egi Yesu waaseguluile.

Yesu wajiyile matangi awo, hene waadijigile ndaga jia buidile enya Isalele akulu. Mu tangua dia profete Eliya, akhetu a gafunda akhalele avula mu Isalele; uvi Eliya gatumiwego nga gudi mungoshi mukatshi diawo. Watumiwe khuta gudi mukhetu wa gafunda gakhalelego muenya Isalele, gu dimbo dia Salefata diakhalele hehi nu Sidona. Guene Eliya gakalegele ndaga ya gushimana tangua gafuzumuine muthu. (1 Mafumu 17:8-16) Luko, mu tangua dia profete Elisha, enya misongo ya hute akhalele avula mu Isalele, uvi profete wasagele phamba Namana muenya Siliya.—2 Mafumu 5:1, 8-14.

Ndaga jitshi athu a mu dimbo dia Yesu akalegele tangua akotelesele egi gifezegelo gia Yesu giakhalele mumonesa khadilo diawo dia giphi nu dia gutuna gukhala nu gutshigina? Athu akhalele mu sinagoga avile khabu jiavula, azugidile Yesu, enji akambele gumubishila hanze ya dimbo. Amukuatele holu dia mulundu watungiwe dimbo dia Nazaleta, enji akambele gumubishila mu baba. Uvi Yesu walengele ha mago awo, amukuatelego. Gungima, Yesu wabulumugine gu Kaphelenauma, gu khanda ya nordi-weste ya khulo ya Kianga gia Galile.