Tangua enya Yuda ako afundile Yesu egi ganemeselego mukhuala luholo gasagele yala yonyi mu Lusugu lua Guhuluguga, Yesu waawambelele egi: ‘Tata udi mutshita mudimo uu nu luenyelu, ame nji ngudi mulandula gutshita mudimo. ’—Yone 5:17.

Yadiago, Ndaga ya tshitshile Yesu yakhalelego gushiya gua mukhuala watadila Lusugu lua Guhuluguga. Mudimo wenji wa gulongesa nu gusaga athu wamonesele diago egi wakhalele mulandula khadilo dia Nzambi dia gukalagala ndaga jiawaha. Hene, Yesu walandudile gukalagala ndaga jiawaha masugu agasue. Uvi mvutu gahanele athu ene jiaahanele luko khabu jiakola, hene akambele gushiya Yesu. Mukunda natshi akalegele ngenyi?

Thomo akhalele muzuela egi Yesu washiyile mukhuala wa Lusugu lua Guhuluguga luholo gasagele muthu. Luko, watshitshile diago gubola luholo gakhalele muzuela egi muene udi Mun’a Nzambi. Amonele ndaga yene gifua mashingana tangua Yesu wazuelele egi Nzambi udi shenji. Mu matangi awo, amonele gifua Yesu wakhalele muzuela egi udi gudibuisa luholo lumoshi nu Nzambi. Uvi, Yesu gavilego woma. Waawambelele ndaga jiko jiatadila ufuta wakola gakhalele nawo nu Nzambi. Wazuelele egi: ‘Tata wana guzumba Mona, enji wana gumudijiga yagasue idi muene mutshita.’—Yone 5:20.

Tata udi Muhanyi wa Lujingu; mu masugu abalega, wayimonesele luholo wahanele akombeledi enji ako ngolo jia gufuzumuna athu afile gale. Yesu wazuelele luko egi: ‘Gifua luholo Tata wana gufuzumuna athu agufua nu guaahana monyo, ngenyi Mona nji wana guhana monyo gudi athu agasue atshigina muene.’ (Yone 5:21) Mbimbi eji jidi muhana diago felela mukunda nu masugu adi muza! Mangino nji, Mona udi mufuzumuna athu adi agufua mu nyuma. Hene, Yesu wazuelele egi: ‘Muthu udi muvua mbimbi jiami nu udi musha gutshigina guenji gudi muthu wangutumine, udi nu monyo wa ivo nu ivo. Luko, muene mbagasophesewago, uvi wazoga mu gufua wangina mu monyo.’—Yone 5:24.

Gushigo nga ndaga imoshi idi mumonesa egi mu tangua dinyi Yesu wakhalele wafuzumuna gale athu. Wakhalele muwambela mbalagaji jienji egi gufuzumuga gudi muzuelela muene mbagukalegewa mu masugu adi muza. Wazuelele egi: ‘Kumbi didi muza, athu agasue agufua adi mu ndumba mbavua dizui dienji, ene mbazuga mu ndumba jiawo.’—Yone 5:28, 29.

Ngatshima Yesu wakhalele nu ginemo giakola, wamonesele haphelo egi Nzambi wamubalega gukoma. Wazuelele egi: ‘Ame ngajiyilego gutshita gima mu uhinyinyi wami. . . . Nganago gukamba gukalagala gutshigina guami, uvi ngana gukamba gukalagala gutshigina gua muthu wangutumine.’ (Yone 5:30) Yesu wamonesele haphelo egi wakhalele nu mudimo wa ndando mu ndaga yatadila felela dia Nzambi, enji yakhalele giphungu gienji gia thomo gia gudimonesa ngenyi gudi athu. Uvi mbalagaji jienji jiakhalele mujiya ndaga jiko jiavula. Waawunguluishile egi: ‘Muatumine athu gudi Yone [Mubatiji], enji waalongesele ndaga jiatadila giamatshidia.’—Yone 5:33.

Yajiya gukhala egi mbalagaji jienji jiakhalele mujiya ndaga yene ivo mbadi ya balega. Yone wawambelele mafumu a mangumba a enya Yuda egi gungima dienji, gudi nu muthu mbawuza, wago mbawutamegewa egi ‘Profete’ nu “Klisto.” (Yone 1:20-25) Yesu wawunguluishile mbalagaji jienji lumene lua Yone, yonu wakhalele mu bologo nu akhalele ene muzula nu ndando. Waawambelele egi: ‘Mu tangua diazonda, muakhalele atagana ha gusuanguluga muavula nu muanya wenji.’ (Yone 5:35) Ngenyi, Yesu wakalegele mudimo wakoma wa gulongesa gubalega Yone Mubatiji.

‘Midimo eyi ngudi mukalagala [ikhale gusagewa gua muthu gasagele mu tangua dinyi] idi mumonesa egi Tata wangutumine.’ Yesu wazuelele luko egi: ‘Tata wangutumine, muene hakhenji wazuelele mukunda nu ame.’ (Yone 5:36, 37) Mu tangua dia gubatijiwa gua Yesu, Nzambi wazuelele egi Yesu udi mun’enji.—Matayo 3:17.

Yadiago, mbalagaji jia Yesu jia khalelego nga nu gishina gimoshi gia gumutuna. Mbimbi ya Nzambi yakhalele gudihala ene egi ana gutanga, yakhalele muzuelela Yesu. Yesu wazuelele egi: ‘Nga muatshiginyile Moise, nga muangutshigina nji nu ame, handaga muene wasonegele ndaga jiangutadila ame. Uvi gula muatshiginyilego ndaga jiasonegele muene, luholo lutshi mbamutshigina mbimbi jiami?’—Yone 5:46, 47.