Lusugu lumoshi Yesu wahuidile muavula. Mu tangua dia ngueze wawambelele alandudi enji egi: ‘Tuyenu ha sambua dia kianga,’ gu dimbo dia Kaphelenauma.—Mako 4:35.

Ha sambua dia kianga gia Galile, guakhalele nu gifutshi giakhalele mutamegewa egi Gelase. Gifutshi giene giakhalele nji mutamegewa egi Dekapholi. Enya Gifutshi giene akhalele mulandula khadilo dia athu a zuelelo dia Greki, uvi enya Isalele avula akhalele nji mujinga mu membo a Dekapholi.

Hakatugile Yesu gu Kaphelenauma, athu amumonele. Guakhalele nu mawato ako asendesele guya nawo mu kianga hamoshi. (Mako 4:36) Uvi, guakhalelego gualeha nu ha sambua. Kianga gia Galile gidi nu ba kilometre 21 mu guleha, mu guhihia bakilometre 12. Uvi kianga giene giakhalele nu jinga dialeha.

Ngatshima Yesu wakhalele muthu watagana, wahuidile handaga watshitshile mudimo wavula wa gulongesa. Hene, tangua asendesele guzawuga, muene wayile gu mbunda ya wato, wahagele muto holu dia mulele wa gubuila muto, gungima wayile gutulo.

Apostolo akhalele mujiya diago guluga jikhayi, uvi yakhalelego ndaga yaleba lusugu luene. Kianga giene giakhalele gia gujieta nu milundu, meya enji akhalele a tshuya-tshuya. Matangua ako, muhehe wa huma wakhalele mukatuga gu milundu muza mu kianga, wakhalele mutagana nu muhehe wa tshuya-tshuya wa mu kianga. Ngungima, wakhalele muzola funji yakola mu kianga. Ndaga yene yabuile nji lusugu luakhalele Yesu mu wato. Matshipha-tshipha abundjile wato. ‘Meya asendesele guzala mu wato, athu akhalele mu gingonza.’ (Luka 8:23) Uvi, Yesu wakhalele gutulo!

Apostolo akhalele mujiya muabonga guluga wato, atshitshile yagasue ha gumagenesa wato mukatshi dia funji. Uvi yakhalelego ndaga yaleba. Avuile woma wa gufua, azugishile Yesu gutulo, azuelele egi: ‘Fumu, tuhuluise, tudi mutshigina gufua!’ (Matayo 8:25) Alandudi avuile woma egi ajiya gufua mu kianga!

Hazugile Yesu gutulo, wawambelele apostolo egi: ‘Enue enya gutshigina guazonda, mukunda natshi mudi nu woma?’ (Matayo 8:26) Gungima Yesu wawambelele funji nu kianga egi: ‘Huena! Khala tedie!’ (Mako 4:39) Funji yene yakola yahuile, kianga giahuenele tedie. (Mako nu Luka ana guzuelela thomo luholo Yesu wahuenesele funji mu luholo lua gushimana, gungima ana gumonesa luholo alandudi akhalele nu gutshigina guazonda.)

Tangiza luholo alandudi adivile! Amonele luholo funji yahuile, hene kianga gia huenele tedie. Avuile woma. Azuelele mukatshi diawo egi: ‘Yowu muthu wa luholo lutshi? Hagula funji nu meya a kianga imuvuile.’ Azawugile ha sambua dia kianga mu guhuima guagasue. (Mako 4:41–5:1) Yajiya gukhala egi mawato ako avutugile gu sambua dia westi ya kianga.

Luholo tudi mujiya egi Mun’a Nzambi udi nu ufumu holu dia ima yafugiwe ludi gutuhana gikhesa! Tangua mbagahinyina mavu, athu agasue mbaajinga mu guhuima handaga mbawukatula ima yana guhana woma nu lamba!