Athu avuile malongo a Yesu, amonele nji midimo yenji, ako amutumagele uvi ako ndo. Yamonegele haphelo tangua Yesu gakhalele gu inzo imoshi mu dimbo dia Galile. Mufalese mumoshi jina dienji Simona, watamegele Yesu ha guya mudia gumbo di’enji. Yajiya gukhala egi wamutamegele hagula atale muabonga muthu owu wakhalele mukalagala ndaga jia gushimana. Yesu wamonele ndaga yene gifua okazio wa gulongesa lukuma luabonga gudi athu akhalele hene. Hene, watshiginyile guya gumbo dia Simona, gifua luholo gatshiginyile ha gudia nu afutshishi a gitadi nu enya gubola.

Uvi, ayambelego Yesu muabonga gifua luholo akhalele muyamba ngenji jiagasue. Njila jia gu Palestina jiakhalele nu fuphi yavula. Hene, gula muthu wasudiga sandale, ikanzo yenji yakhalele mubua tshuya-tshuya, nu mvindu. Hene, gula athu ayamba ngenji, akhalele muweva malu awo nu meya a huma. Ngenyi, akhalele mumonesa khadilo dia guyamba ngenji. Uvi, atshisthilego ngenyi gudi Yesu. Luko, amuhanelego bize luholo akhalele mukalagala gudi athu agasue. Akhalele nu khadilo diko dia gumbila ngenji mananashi mu sanga ha gumonesa khadilo dia gisemo nu dia guyamba ngenji. Uvi, gudi Yesu akalegele ndo ngenyi. Luholo lutshi tuajiya giwa guzuela egi amuyambele diago?

Ngenji jiakhalele gu mesa, jia sendesele gudia. Tangua akhalele ene mudia, mukhetu mungoshi wanginyile habio-habio, uvi amutamegelego gumbo dia Simona. Mukhetu muene wakhalele ‘mujiyiwa mu dimbo egi udi muenya gubola.’ (Luka 7:37) Athu agasue ashigo atagana adi enya gubola. Uvi idi mumonega egi mukhetu owu wakhalele nu lujingu luabola, yajiya gukhala wakhalele thambi. Yajiya gukhala luko egi mukhetu muene wavile lukuma lua ndaga jiakhalele mulongesa Yesu, gifua luholo gatamegele ‘athu agasue adi aguhuila gu inemo ha guya gudi muene hagula a ahane gikhesa.’ (Matayo 11:28, 29) Luko, yajiya gukhala egi ndaga jiazuelele Yesu nu midimo yenji, jiene jiamutumine ha guza mukamba Yesu.

Wayile gungima dia Yesu, wafugamele ha mabongo. Wakhalele mudila, masoji enji akhalele mubua holu dia ikanzo ya Yesu, waakukumuile nu sanga dienji. Wahanele ikanzo ya Yesu bize nu gisemo giagasue, wayikungile mananashi a vumba diabonga gajile nawo. Simona gasuangulugilego, wadizuelele hakhenji egi: ‘Nga muthu yowu udi diago profete, nga wakhala naye gujiya gula mukhetu yowu udi gumukuata udi nanyi, handaga mukhetu muene udi muenya gubola.’—Luka 7:39.

Tangua Yesu wakotelesele matangi a Simona, wazuelele egi: “Simona, ngudi nu ndaga ya guguwambela.” Muene wazuelele egi: ‘Mulongeshi, zuela!’ Yesu wazuelele egi: ‘Athu muyadi akhalele nu mikudi ya musombeshi wa mbongo. Mungoshi wakhalele nu mukudi wa yamo ya denye 500, uvi muko wakhalele nu mukudi wa yamo ya denye 50. Luholo akhalelego nu mbongo jia gumushimbiga, waatotesele ene muyadi tshima mikudi yawo nu khenda jiagasue. Nanyi mukatshi dia enya mikudi awa mbadi mbawuzumba muavula muthu yowu waasombele mbongo?’ Simona wazuelele egi: ‘Ngudi mutangiza diago egi, idi muthu wakhalele nu mukudi wabalega gukoma.’—Luka 7:40-43.

Yesu watshiginyile mvutu yenji. Hangima wabalumugile gudi mukhetu, wawambelele Simona gamba: ‘Udi mumona mukhetu owu? Ngaji monzo yaye; uvi wanguhuilego meya mukunda nu guweva ikanzo yami. Uvi mukhetu owu watebesa ikhanzo yami nu masoji enji, waakukumuna nu sanga dienji. Aye wanguhuilego bize, uvi sendese tangua nganginyi uu nu luenyelu, mukhetu owu khenji gabembago guhana ikanzo yami bize. Aye wangumbilego maji ha muto wami, uvi mukhetu owu wangumba mananashi mu ikanzo yami.’ Yesu wamonele diago egi mukhetu owu wabalumuine mutshima mukunda nu lujingu luenji lua uthambi. Hene wazuelele egi: ‘Ngudi guguwambela egi gubola guenji ngatshima gudi guakoma luholo lutshi, guatotesewa, handaga muene wamonesa guzumba guakoma. Uvi muthu yowu ana gutotesela hazonda, wana guzumba hazonda.’—Luka 7:44-47.

Yesu gazuelelego egi gukalagala uthambi gudi ndaga yabonga. Wakhalele muvua khenda mukunda nu athu akalegele gubola guavula, uvi abalumuine mitshima yawo enji ayile gudi Klisto hagula a akuatese. Yadiago, mukhetu owu wahetele gikhesa tangua Yesu wamudijigile egi: “Gubola guaye guatotesewa. . . . Gutshigina guaye guaguhuluisa nda gaye nu guhuima n’ago.”—Luka 7:48, 50.