Luholo Yesu nu alandudi enji nguana ayile mulongesa mu ‘sinagoga jia gu Galile,’ lukuma lua ndaga jia gushimana jiakhalele mukalagala Yesu lua muangenene muavula. (Mako 1:39) Lukuma lua ndaga jienji jia gushimana luahetele uu nu mu dimbo diakhalele muenya hute. Munganga Luka udi muzuela egi muthu muene wakhalele ‘waguzala pha nu dihute.’ (Luka 5:12) Gula misongo eyi ya lamba ya divudisa, yana gukoka itshinyi iko ya muila habio-habio.

Hene, misongo ya hute ya muthu owu yakhalele diago yavula, enji yakhalelego mutoga egi akhale fundo dimoshi nu athu ako. Luko, gula wasuena hehi nu fundo didi athu, wakhalele naye guzuela mu dizui diakola egi: “Ngudi wabola, ngudi wabola!” Ngenyi, wakhalele mubamba athu ako hagula asuenyigo hehi nu muene, enji azudigo misongo eyi yabola. (Levi 13:45, 46) Uvi muenya misongo eyi ya hute wakadigile itshi? Wasuenele gudi Yesu, wabuile ha mabongo guphala yenji, nu wamububile egi: ‘Fumu, gula watshigina, wajiya gungusaga.’—Matayo 8:2.

Muthu yowu wakhalele diago nu gutshigina guakola gudi Yesu! Yadiago, misongo eyi yamubuishile lume muenya lamba! Itshi yakalegele Yesu? Gula nga wakhalele hene, itshi wakhalele naye gutshita? Yesu wavuile diago jikhenda, wasunuine koko dienji, enji wakuatele muthu muene. Wamudijigile egi: ‘Ngatshigina! Weluga.’ (Matayo 8:3) Yakhalele lamba egi athu ako atshigine ndaga yene, uvi muenya misongo ya hute wasagewe diago.

Watshigina gukhala nu fumu udi nu khenda nu ngolo gifua Yesu ba? Ndaga Yesu gakalegele muenya misongo ya hute jidi gututshiginyisa diago egi tangua mbagahinyina mavu agasue, profesi eyi ya Biblia mbayitagenesewa: ‘Muene mbawukhala nu jikhenda gudi athu aleba nu gudi jiphutu, muene mbawuhuluisa mionyo ya athu ashigo nu gima.’ (Ngimbo 72:13) Yadiago, Yesu mbawutagenesa nzala idi mu mutshima wenji ya gukuatesa athu agasue adi mumona malamba.

Wunguluga egi gutuama egi Yesu asage muenya hute owu, ndaga jienji nu mudimo wenji wakhalele musuanguluisa athu. Henyaha athu mbaavua luko ndaga ya gushimana yakalagala muene. Uvi, Yesu gashigo mutshigina egi athu ahage gutshigina gudi muene phamba mukunda nu ndaga jia awambelewe gukano. Wakhalele mujiya profesi yana guzuela egi “muene mbagatshigo mikanda mukatshi dia milongo,” hagula adimonese gudi athu. (Yeshaya 42:1, 2) Hene, Yesu wawambelele muenya misongo ya hute egi: ‘Uwambelago muthu ndaga eyi, uvi nda gaye, udijige nganga-nzambi, uhane mulambu wabatuile Moise.’—Matayo 8:4.

Gifua luholo wajiya guyitangiza, muthu muene wasuangulugile diago luholo gasagewe, hene gajiyilego gubamba ndaga eyi yamubuidile. Wayile, enji wawambelele athu mu mafundo agasue. Ndaga yene yatumine athu avula ha gukamba gumona Yesu nu gujiya ndaga jiko. Hene, Yesu gakhalelego nu luholo lua gungina mukatshi dia dimbo dimoshi ngenyi. Wayile gudikhalela muene hakhenji ha fundo dimoshi ngenyi diakhalelego nu athu. Ikhale ngenyi, athu akhalele mukatuga mafundo agasue ayile gudi muene hagula a alongese nu a asage.