Luholo Afalese nu alongeshi a mikhuala atunyile egi Yesu gashigo muzola bademo nu ngolo jia Nzambi, akhalele hehi nu gushingana nyuma yabonga ya Yehowa. Hene, mbaakhala khanda itshi—ya Nzambi nga ya Satana? Yesu wazuelele egi: ‘Ha gukhala nu mabundu abonga, mudi naye gukhala nu mutshi wabonga. Gula mutshi udi wabola, mabundu awo nji adi mukhala abola, handaga mutshi wana gujiyiwa gu mabundu awo.’—Matayo 12:33.

Ishigo gutema ha gutangiza egi Yesu udi muzola bademo nu ngolo jia Satana. Luholo Yesu wayimonesele mu diskur dienji Holu dia Mulundu, gula mabundu adi abonga, mutshi wawo nji udi wabonga, ushigo wabola. Uvi, luholo Afalese adi mufunda Yesu, idi mumonesa egi mabundu awo adi aluholo lutshi? Adi diago abola. Yesu wawambelele egi: ‘Enue vungu dia thoga, luholo lutshi muajiya guzuela ndaga jiabonga hamudi enue athu abola? Handaga kano guana guzuela ndaga jidi jia guzala mu mutshima.’—Matayo 7:16, 17; 12:34.

Ndaga tuana guzuela, jiana gumonesa luholo mitshima yetu idi, luko mbatusophesewa mukunda nu ndaga jiene. Hene, Yesu wazuelele egi: ‘Ngudi gumiwambela egi, mu Lusugu lua Gusophesewa, athu mbaasophesewa mukunda nu ndaga jiagasue jia gituhu ana guzuela ene; handaga Nzambi mbawugutshigina egi udi muthu watagana mukunda nu ndaga wana guzuela, mbawuguhana ndola mukunda nu ndaga wana guzuela.’—Matayo 12:36, 37.

Yesu wakalegele ndaga jiavula jia gushimana, uvi alongeshi a mikhuala nu Afalese atshiginyile egi muene atshite ndaga jiko jiavula. Azuelele egi: ‘Mulongeshi, tuatshigina gumona gijiyishilo gudi aye.’ Ikhale amonele ndaga jia gushimana jia kalegele Yesu nga ndo, guakhalele nu ijiyishilo yavula yakhalele mumonesa ndaga jia gushimana jia kalegele Yesu. Hene, Yesu wawambelele mafumu a mangumba a enya Yuda egi: ‘Gindongo gia athu abola, ashigo a gujinginyina gudi Nzambi, gidi mukamba gijiyishilo. Uvi gushigo nu gijiyishilo nga gimoshi mbagimihanewa, phamba gijiyishilo gia profete Yona.’—Matayo 12:38, 39.

Yesu gaabembelego ngenyi, waakotelesele ndaga gazuelele. Waadijigile egi: ‘Gifua muakhalele Yona mu vumo dia ishui yakoma masugu atatu nu phipha jitatu, ngenyi nji mun’a muthu mbawukhala moshi’a mavu masugu atatu nu phipha jitatu.’ Ishui imoshi yakoma yaminyile Yona uvi gungima ya mulushile, yakhalele gifua wafuzumugine. Ngenyi, Yesu wa monesele gutuama egi mbawumufua, enji mbawufuzumuga mu lusugu lua thathu. Tangua ndaga yene ya taganele, mafumu a mangumba a enya Yuda atunyile ‘gijiyishilo gia Yona’, atunyile gubalumuna mitshima yawo nu gubemba makalegelo awo abola. (Matayo 27:63-66; 28:12-15) Uvi, ‘enya gu Ninive’ akhalele a gudisha nu enya Yuda handaga ene abalumuine mitshima yawo tangua Yona gaalongesele. Hene, ene mbaafuisa gindongo egi gia enya Yuda milonga. Yesu wazuelele luko egi khadilo dia fumu wa mukhetu wa  gifutshi gia Sheba mbadifuisa nji gindongo egi milonga. Fumu muene wa mukhetu wakhalele nu nzala ya gutegelela ndunge jia fumu Solomo nu ndaga jienji jia gushimana. Gungima, Yesu wazuelele egi, ‘muthu wabalega Solomo gukoma udi haha.’—Matayo 12:40-42.

Yesu wafuanesele gindongo egi gia athu abola nu muthu wazolewe nyuma yabola. (Matayo 12:45) Luholo muthu muene gazaleselego fundo diene nu ndaga jiabonga, nyuma yabola ya vutugile nu nyuma jiko sambadi jia yibalega yene gubola, jia nginyine gudi muthu muene. Luholo lumoshi nji, Nzambi wa wovele gifutshi gia Isalele, wa gilondele muabonga—gifua muthu yonu wazolewe nyuma yabola. Uvi gifutshi giene gia Isalele giatunyile ba profete a Nzambi, giatunyile nji Yesu wago wakhalele nu nyuma ya Nzambi. Ndaga eyi ya monesele egi khadilo dia gifutshi egi diabolele gubalega luholo diakhalele ha thomo.

Tangua Yesu wakhalele muzuela, gin’enji nu aphangi’enji ajile, amaganele hehi nu athu. Athu akhalele nenji hehi a muwambelele egi: ‘Gin’aye nu aphangi’aye adi mumagana hanze, atshigina gugumona.’ Uvi Yesu wamonesele egi wakhalele diago wagujinginyina gudi alandudi enji, anyi akhalele gifua aphangi’enji a mala nu a akhetu nu in’enji ya diago. Wamigile koko guenji gudi alandudi’enji, enji wazuelele egi: ‘Gin’ami nu aphangi’ami adi athu adi mutegelela mbimbi ya Nzambi nu adi muyitumagela.’ (Luka 8:20, 21) Ngenyi Yesu wamonesele diago egi ngatshima uphangi nu enya fami yenji wakhalele wakola, uvi ufuta wenji nu alandudi enji wakhalele nu ndando yavula gubalega. Gukhala nu gudivua guabonga nu aphangi’etu a mu nyuma gudi muhana gikhesa; guana gukuatesa muavula mu tangua athu ako ana gututuna, ana gutusegulula, nga mu tangua ana gusegulula ndaga jietu jiabonga tuana gukalagala!