Ngungima dia gumona lamba mu muta, hazogele alandudi mu wato, ataganele nu lamba diko. Athu mbadi abala, akhalele nu bademo, azogele gu ndumba (majiamo) akhalele muza gu khanda yakhalele Yesu! Biblia yana zuelela muavula muthu mumoshi mukatshi dia athu ene. Yajiya gukhala egi muthu muene wakhalele wabala gubalega, handaga wakhalele nu bademo sendese mualeha.

Muthu muene wakhalele muwenda thowa. Phipha nu muanya, wakhalele ‘mukaluluga mu ndumba nu mu milundu, wakhalele gudinamenesa nu maseso.’ (Mako 5:5) Wakhalele nu khuta yavula hene athu akhalelego luko mubalega mu njila ya khalele hehi nu ndumba yene. Athu ako alolele gumujitshiga gu mago nu gu malu, uvi wakhalele mubatula malenge. Guakhalelego nga muthu wajiya gumuhenesa.

Hasuenele muthu muene, wafugamele gu malu a Yesu, bademo akhalele mukatshi dienji akalulugile egi: ‘Aye Yesu Mun’a Nzambi Wagudinyinyiga, ngudi naye mulonga ba? Ngudi mugulogela mu jina dia Nzambi egi ungusagesago.’ Yesu wamonesele egi udi nu ufumu holu dia bademo, wazuelele egi: ‘Zoga gudi yala owu, aye nyuma ya bola.’—Mako 5:7, 8.

Muthu muene wakhalele diago nu bademo avula. Tangua diamuhudile Yesu egi: “Jina diaye nanyi?” muene wazuelele egi: ‘Jina diami Legona, handaga tudi avula.’ (Mako 5:9) Legona imoshi ya masuta a enya Roma yakhalele nu bamilio avula a masuta. Ndaga yene yamonesa egi muthu muene wakhalele musagesewa gudi bademo avula. Bademo ene atogele Yesu hagula ‘gaatumigo mu bengi dishigo nu gisugishilo.’ Idi mumonesa egi bademo ene akhalele mujiya ndaga mbayabuila, nu fumu wawo Satana.—Luka 8:31.

Ngulu hehi nu 2 000 jiakhalele mudia hehi nu fundo diene. Mukhuala wa Moise wakhalele mutanga ngulu mukatshi dia shitu jia usala, enya Isalele akhalelego naye gujifuga. Bademo azuelele egi: ‘Tutume gudi jingulu, tungine gudi jiene.’ (Mako 5:12) Yesu waahanele njila ya guya, hene ayile angina mu ngulu. Gungima dienji, ngulu jiene jiagasue 2 000 jiakatugile gosa mulundu, jia bulumugine jiphushi jia nginyine mu kianga.

Tangua abambi a ngulu amonele ngenyi, ayile mu phushi mutela athu agasue lumene mu dimbo. Athu ajile mutala ndaga yene. Tangua ajile, asangele  muthu muene wazolewe bademo, udi gale muabonga. Amusangele wasudiga gale milele, wakhalele hashi mu malu a Yesu!

Athu agasue avile, nu amonene ndaga eyi, woma waakuatele, akhalelego mujiya gula ndaga eyi yakhalele mukotelesa itshi mukunda nu ene. Atogele Yesu ha guzoga mu dimbo diawo mu phushi. Tangua Yesu gakhalele mungina mu wato ha guvutuga, muthu yonyi wakhalele thomo nu bademo wamububile hagula aye n’enji. Uvi Yesu wamuwambelele egi: ‘Nda gumbo diaye gudi akuaku’aye, awambele ndaga jia gutshitshila Yehowa, nu khenda jia guvuila muene.’—Mako 5:19.

Yesu wakhalele muwambela athu agasue akhalele musaga muene egi atelago athu ako lumene, handaga gakhalelego mutshigina egi athu ahage gutshigina gudi muene phamba mukunda nu ndaga jia gushimana jidi muzuela athu gu kano. Uvi haha, muthu muene wakhalele thomo nu bademo wakhalele gijiyishilo gidi mumonesa ngolo jia Yesu, ngenyi, wayile muta lumene luene gudi athu anyi Yesu mbagashigo mutagana nawo. Lumene luenji luakangele athu njila ha guzuela ndaga jia mambo mukunda nu gutota gua ngulu. Hayile muthu muene, wamuangele lukuma lua ndaga ya mutshitshile Yesu mu Dekapholi yagasue.