Yesu wabalegesele masugu avula ha gulongesa gu Galile handaga enya gu Galile atshiginyile lukuma luabonga gubalega enya gu Yudea. Luko, tangua diakhalele muene gu Yelusalema nu gasagele muthu mumoshi mu Lusugu lua Guhuluguga, ‘enya Yuda asendesele gukamba luholo lua gumushiya.’—Yone 5:18; 7:1.

Henyaha tudi mu givo 32 gia tangua dietu, luko Wano wa Isasa udi diago hehi. Wano wene wakhalele mutshita masugu sambadi; mu lusugu lua nage, akhalele mukalagala gudibungisa guakoma. Wano wene wakhalele nji mumonesa gisugishilo gia givo gia mbuto, luko yakhalele diago tangua dia gusuangula guavula nu dia guhana Nzambi mersi.

Aphangi’a Yesu—Yakoba, Simona, Yozefe, nu Yuda—amuwambelele egi: ‘Katuga ha fundo edi, nda gu Yudea.’ Yelusalema yakhalele fundo enya Yuda agasue akhalele muya mukombelela. Mu sungi ya mawano atatu akhalele mukalegewa mu givo, dimbo diakhalele muzala pha nu athu. Aphangi’a Yesu amulezele egi: ‘Muthu gula udi mutshigina ajiyiwe, ganatshitago ima mu mafumbe. Gula udi mutshita ndaga eji, muabonga udimonese gudi athu agasue.’—Yone 7:3, 4.

Mu tangua diene, aphangi’enji awa nguana ‘akhalelego musha gutshigina guawo gudi muene’ gifua Masiya. Luko, akhalele mutshigina egi athu anyi adibungishile gu wano amone luholo Yesu adi mukalagala ndaga jia gushimana. Yesu wadiangele gumona gingoza, hene waawambelele egi: ‘Athu a ha mavu ajiyilego gukhala n’enu umbalagaji, uvi adi nu ame umbalagaji handaga ngudi muakotolola egi ndaga jidi ene mutshita jidi jiabola. Enue ndjienu genu gu wano; Ame ngushigo mukanduga gu wano, handaga tangua diami khenji ditagana galego muabonga.’—Yone 7:5-8.

Aphangi’a Yesu ayile hamoshi nu Athu ako avula akhalele muya gu Yelusalema. Masugu azonda gungima, Yesu nu alandudi enji ayile mu gisuegi, hagula athu a amonyigo. Hafundo dia guyila mu njila athu agasue akhalele muyila, yakhalele hehi nu Muta wa Yordani, alandudile njila ya gibatu yakhalele mubalegela gu Samaliya. Yesu nu alandudi enji akhalele nu funu ya fundo dia gubanda gu Samaliya, hene watumine athu gutuama ha guya mulondega fundo diawo dia gubanda. Mu dimbo dimoshi, athu atunyile guayamba handaga Yesu wakhalele muya gu Yelusalema mukunda nu wano wa enya Yuda. Yakoba nu Yone ahudile Yesu nu khabu jiagasue egi: ‘Fumu, watshigina tutamege tshiuya tua mu dilu, tubulumuge tuakonde?’ (Luka 9:54) Yesu waabalediele mukunda nu ndaga yazuelele ene; gungima ayile gawo gu Yelusalema.

Tangua akhalele muya mu njila, mulongeshi mumoshi wa mikhuala wawambelele Yesu egi: ‘Mulongeshi, mbangugulandula guagasue gumbawuya.’ Yesu wamuwambelele egi: “Mikenge idi nu mawina ayo, njila jidi nu yanzu yajio, uvi Mun’a muthu gashigo nu fundo dia gubandesa muto wenji.” (Matayo 8:19, 20) Wamonesele mulongeshi wa mikhuala muene egi mbawutagana nu malamba akola gula watshigina gubua mulandudi  wenji. Luko, idi mumonega egi mulongeshi wa mikhuala wasuangulugile muavula ha gutshigina lujingu luene. Muthu wagasue mukatshi dietu udi naye gudihula egi: ‘Itshi ngatshigina diago gubemba ha gulandula Yesu?’

Yesu wawambelele muthu muko egi: ‘Ngulandule.’ Muthu muene wazuelele egi: ‘Fumu, nguye gale thomo ha gufunda sh’ami.’ Luholo Yesu wajiyile ndaga yene, wamuwambelele egi: ‘Bemba agufua, afunde agufua awo, uvi aye nda ujiyise athu ndaga ya Ufumu wa Nzambi.’ (Luka 9:59, 60) Idi yadiago egi sh’enji wakhalele khenji gafua galego. Nga wakhalele wafui gale, nga mun’enji gakhalelego naye guheta tangua dia guta maga nu Yesu. Mona owu gakhalelego hehi ha gusha Ufumu wa Nzambi ha fundo dia thomo mu lujingu luenji.

Hakhalele ene mubulumuga mu njila ha guya gu Yelusalema, muthu muko wawambelele Yesu egi: ‘Fumu mbangugulandula, uvi nguye gale thomo ha guditendelela nu enya inzo yami.’ Yesu wamuwambele egi: ‘Muthu wakuatshi gale temo ha gudima n’adio mavu, gula watala ima idi gungima, gashigo watagana mukunda nu Ufumu wa Nzambi.’—Luka 9:61, 62.

Muthu wagasue watshigina gukhala mulandudi wa Yesu wa giamatshidia, udi naye gusha meso enji mu mudimo wa Ufumu. Gula mudimi wa ilanga gahagelego meso enji gutuama, muhanga wana gubola. Gula wakuata temo ha gukalagala mudimo uvi muene udi mutala ima idi gungima, mudimo mbawushigo muya gutuama. Luholo lumoshi nji, muthu wagasue udi mutala gungima mu ndaga jikulu jia ha mavu’awa, wajiya gubemba njila idi mubata gu monyo wa mayilago.