Yone Mubatiji udi mu bologo givo gimoshi gia balega gale. Uvi, yowu genji muvua lukuma lua midimo yabonga ya Yesu. Tangiza luholo Yone wadivile tangua alandudi enji amuwambelele egi Yesu wafuzumuine mona yala wa mukhetu mumoshi wa gafunda, mu dimbo dia Nayina. Uvi, Yone wakhalele nu funu ya gutegelela Yesu hakhenji ha gujiya gula ndaga jiene jiakhalele mukotelesa itshi. Hene Yone watumine alandudi enji mbadi gudi Yesu. Mukunda natshi? Waatumine ha guya muhula Yesu egi: ‘Aye udi muthu udi naye guza, nga tudi naye gunenga muthu muko?’—Luka 7:19.

Muhu wene wajiya gutuyitugisa. Yone wakhalele mukombeledi wa giamatshidia. Tangua gabatijile Yesu, ivo mbadi ya balega, wamonele nyuma ya Nzambi mubulumuga gifua yembe holu dia Yesu, nu wavuile dijui dia Nzambi dia zuelele egi wamutshigina. Tutangizago egi gutshigina gua Yone gua lebele. Nga gutshigina guenji gua lebele, nga Yesu gamushimanelego gifua luholo gayimonesa henyaha. Uvi, gula Yone gakhalelego nu iphapha, mukunda natshi wahudile muhu owu gudi Yesu?

Yajiya gukhala egi Yone wakhalele nu funu egi Yesu muene hakhenji a muwambele egi udi Masiya. Ngenyi mbayimuhana gikhesa mu lamba gadi mumona mu bologo. Idi mumonega egi muhu wahudile Yone wakotelesele ndaga jiko. Yone wakhalele mujiya profesi jia Biblia jiakhalele muzuela egi Muthu wambiwe maji mu nyuma gudi Nzambi mbawukhala fumu nu muhuluishi. Uvi, Yone udi mu bologo mbeji jiavula jia balega gale sendese Yesu gabatijiwe. Hene, Yone wahudile gula gudi nu muthu muko mbawuza gungima dia Yesu ha gumuhingana, yonu mbawutagenesa profesi jiagasue jiazuelewe gutuama mukunda nu Masiya.

Hafundo dia guwambela alandudi a Yone phamba egi: ‘Yadiago, ame ngudi muthu udi naye guza,’ Yesu wazuelele ndaga jiakhalele mumonesa egi Nzambi wamuhanele ngolo jia gusaga athu avula akhalele nu misongo ya maluholo agasue. Hene, wawambelele alandudi a Yone egi: “Ndienu muwambele Yone imudi muvua nu imudi mumona: Ifofo idi mumona, ikata idi muwenda, enya hute adi musagewa nu afua matshui adi muvua, athu a gufua adi mufuzumuga gu gufua, nu phutu jidi mulongesewa lukuma luabonga.”—Matayo 11:4, 5.

Yajiya gukhala egi muhu wa Yone wakhalele mumonesa egi Yesu mbawukalagala ndaga jiavula jia gushimana gubalega eji akhalele mutshita, luko egi mbawuzola Yone mu bologo. Uvi, Yesu wawambelele Yone egi utangizago egi mbangukalagala ndaga jiavula jia gushimana gubalega eji ngudi mukalagala.

Tangua alandudi a Yone ayile, Yesu wawambelele athu akhalele hene egi Yone wabalega profete gukoma. Muene udi “mutumiwi” wa Yehowa udi muzuelewa mu mukanda wa Malaki 3:1. Luko, udi profete Eliya, wazuelewe gutuama mu mukanda wa Malaki 4:5, 6. Yesu wazuelele egi: ‘Yadiago, ngudi gumiwambela egi, mukatshi dia athu avalewe gudi akhetu khenji gumuenega galego muthu wabalega Yone mubatiji gukoma. Uvi muthu udi wazonda mu Ufumu wa mu dilu wabalega Yone gukoma.’—Matayo 11:11.

Tangua Yesu wazuelele egi muthu wazonda mu Ufumu wa mu dilu wabalega Yone gukoma, wamonesele egi Yone mbagakhadigo mukatshi dia athu mbahingana Ufumu mu dilu. Yone walondele njila mukunda nu Yesu, uvi muene wafuile gutuama egi Klisto akangudile athu njila ya guya mu dilu. (Hebelu 10:19, 20) Yadiago, Yone wakhalele profete wa gujinginyina gudi Nzambi, luko mbawukhala mukatshi dia athu mbaafuzumuga ha gujinga mu Ufumu wa Nzambi ha mavu.